Ezekiel 7:1-27
7 An pulong ni Jehova inabot utro ha akon, nga nasiring:
2 “Mahitungod ha imo, anak han tawo, ini an siring ni Jehova nga Soberano nga Ginoo ngadto ha tuna han Israel: ‘Kataposan! An kataposan inabot na ha upat nga eskina han tuna.
3 An kataposan aada na ha imo yana, ngan bubuhian ko kontra ha imo an akon kasina, ngan huhukman ko ikaw uyon ha imo mga panggawi ngan bubulsan ko ikaw tungod han ngatanan mo nga mangil-ad nga binuhatan.
4 An akon mata diri malolooy ha imo; diri liwat ako mapaid,+ kay ipapadapat ko ha imo an mga resulta han imo mismo mga panggawi, ngan mag-aantos ka han mga resulta han imo mangil-ad nga mga binuhatan.+ Ngan makikilala mo gud nga ako hi Jehova.’+
5 “Ini an siring ni Jehova nga Soberano nga Ginoo: ‘Kitaa! Tiabot an usa nga kadaot, usa nga naiiba nga kadaot.+
6 May tiabot nga kataposan; an kataposan maabot; maabot ito hin tigda* kontra ha imo. Kitaa! Tiabot ito.
7 Inabot na an imo turno,* ikaw nga naukoy ha tuna. Tiabot na an panahon, hirani na an adlaw.+ May-ada kasamok imbes nga malipayon nga pan-gugliat ha kabukiran.
8 “‘Diri na gud mag-iiha ihuhuwad ko ngada ha imo an akon kapungot,+ ngan bubuhian ko kontra ha imo an ngatanan ko nga kasina,+ ngan huhukman ko ikaw uyon ha imo mga panggawi ngan bubulsan ko ikaw tungod han ngatanan mo nga mangil-ad nga binuhatan.
9 An akon mata diri malolooy; diri liwat ako mapaid.+ Ipapadapat ko ha imo an mga resulta han imo mga panggawi, ngan mag-aantos ka han mga resulta han imo mismo mangil-ad nga mga binuhatan. Ngan makikilala gud niyo nga ako, hi Jehova, an naghahampak ha iyo.+
10 “‘Kitaa, an adlaw! Kitaa, tiabot ito!+ Inabot na an imo turno;* an tungkod namukad ngan an pagkaparagbuot nanaringsing.
11 An kamadarahog tinubo ngadto ha pagin tungkod han karaotan.+ Hira o an ira bahandi o an ira katawohan o an ira pagkaprominente diri makakatalwas.
12 Maabot an panahon, maabot an adlaw. An mamaralit diri maglipay, ngan an parabaligya diri mabido, kay may kapungot kontra ha ngatanan nira nga katawohan.*+
13 Kay an parabaligya diri mabalik ha iya iginbaligya, bisan kon tipigan hiya nga buhi, kay kontra ha ngatanan nga katawohan an bisyon. Waray bisan usa nga mabalik, ngan tungod han iya sayop,* waray bisan usa nga makakatipig han iya kinabuhi.
14 “‘Ira ginhuypan an trumpeta,+ ngan andam na an ngatanan, pero waray bisan usa nga napakadto ha pakiggirra, kay an akon kapungot aada ha ngatanan nga katawohan.+
15 An espada aada ha gawas,+ ngan an peste ngan an gutom aada ha sulod. An bisan hin-o nga aada ha uma mamamatay pinaagi han espada, ngan an gutom ngan an peste maglalamoy han mga aada ha sulod han syudad.+
16 An mga makakatalwas nga makakahimo pagpalagiw mapakadto ha kabukiran, ngan pariho han mga sarapati ha mga walog, an tagsa ha ira mangangaraba tungod han iya sayop.+
17 An ngatanan nira nga kamot mawawad-an hin kusog, ngan an ngatanan nira nga tuhod magtuturo hin tubig.*+
18 Nagsul-ot hira hin sako nga panapton,+ ngan naputos* hira hin pangurog. An kada tagsa mahibubutang ha kaarawdan, ngan an tagsa nga ulo makakalbo.*+
19 “‘An ira silber ilalabog nira ha mga kalye, ngan an ira bulawan magigin mangil-ad ha ira. An ira silber ngan an ira bulawan diri makakatalwas ha ira ha adlaw han kapungot ni Jehova.+ Hira* diri matatagbaw, ngan diri nira mabubusog an ira mga tiyan, kay nagin hiparakdolan ito* nga nagin hinungdan han ira sayop.
20 Iginrakudaku nira an katahom han ira mga alahas, ngan tikang hito* ginhimo nira an ira mangil-ad nga mga imahen, an ira mangil-ad nga mga idolo.+ Salit hihimoon ko ito nga mangil-ad ha ira.
21 Ihahatag ko ito* ngadto ha kamot han mga taga-iba nga nasud basi panguhaon nira ngan ngadto ha magraot nga mga tawo ha tuna basi magin dinag-an, ngan papasiparahan nira ito.
22 “‘Malingiw ako tikang ha ira,+ ngan papasiparahan nira an akon tago nga lugar,* ngan susudlon ito hin mga tulisan ngan papasiparahan.+
23 “‘Himoa an kadena,*+ kay an tuna puno hin paghukom nga namantsahan han dugo+ ngan an syudad puno hin kamadarahog.+
24 Dadad-on ko an pinakamagraot han mga nasud,+ ngan pagtatag-iyahon nira an ira mga balay,+ ngan pauundangon ko an pagin hambog han magkusog, ngan an ira mga santuaryo papasiparahan.+
25 Pag-abot han ira duro nga kasakit, mamimiling hira hin kamurayawan, kondi waray kamurayawan.+
26 Maabot an sunod-sunod nga kadaot, ngan an sunod-sunod nga sumat, ngan an mga tawo mamimiling hin bisyon tikang ha usa nga propeta,+ kondi mawawara an balaud* tikang ha usa nga saserdote ngan an sagdon tikang ha mga tigurang.+
27 An hadi mabibido,+ ngan an lider mawawad-an hin paglaom, ngan an mga kamot han katawohan han tuna mangungurog tungod han duro nga kahadlok. Tatrataron ko hira uyon ha ira mga panggawi, ngan huhukman ko hira sugad han ira paghukom ha iba. Ngan makikilala gud nira nga ako hi Jehova.’”+
Mga footnote
^ Lit., “magmamata ito.”
^ O posible nga “an dekorasyon ha ulo.”
^ O posible nga “an dekorasyon ha ulo.”
^ Karuyag sidngon, adton napalit hin propyedad ngan adton nagbabaligya hito pariho diri magpapahimulos, kay an kabungkagan maabot ha ngatanan.
^ O posible nga “ngan pinaagi han iya sayop.”
^ Karuyag sidngon, kay nakaihi tungod han kahadlok.
^ Karuyag sidngon, aahitan an ira mga ulo tungod han kabido.
^ Lit., “natabonan.”
^ O “An ira kalag.”
^ Karuyag sidngon, an ira silber ngan an ira bulawan.
^ Karuyag sidngon, an ira mga butang nga tikang ha bulawan ngan silber.
^ Karuyag sidngon, an ira silber ngan an ira bulawan nga gin-gamit ha paghimo hin mga idolo.
^ Posible nga nagtutudlok ha gisusuluri nga bahin han santuaryo ni Jehova.
^ Karuyag sidngon, mga kadena han pagkabihag.
^ O “instruksyon.”
