Ezekiel 40:1-49
40 Ha ika-25 ka tuig han amon pagkadistyero,+ ha tinikangan han tuig, ha ikanapulo ka adlaw han bulan, ha ika-14 ka tuig tikang han kapukan han syudad,+ hito mismo nga adlaw an gahum ni Jehova ginios ha akon,* ngan gindara niya ako ha syudad.+
2 Pinaagi han mga bisyon tikang ha Dios, gindara niya ako ha tuna han Israel ngan iginbutang ako ha hitaas gud nga bukid,+ diin may-ada istraktura nga pariho hin syudad ha sur nga bahin hito.
3 Han gindara niya ako didto, nakakita ako hin lalaki nga sugad hin tumbaga*+ pagkit-on. May ginkakaptan hiya nga higot nga lino ngan tangbo nga isurukol,*+ ngan natindog hiya ha ganghaan.
4 An lalaki nagsiring ha akon: “Anak han tawo, pagkita hin maopay, pamati gud, ngan paghatag hin atensyon* ha ngatanan nga ipapakita ko ha imo, kay ito an hinungdan nga gindara ka dinhi. Isumat ha panimalay ni Israel an ngatanan nga imo makikita.”+
5 Nakakita ako hin pader nga nakapalibot ha gawas han templo.* An lalaki may ginkakaptan nga tangbo nga isurukol nga unom ka siko an kahilaba (ha kada siko, usa ka dapal an igindugang).* Nagtikang hiya pagsukol han pader, ngan an kadakmol hito usa ka tangbo ngan an kahitaas hito usa ka tangbo.
6 Katapos, kinadto hiya ha ganghaan nga naatubang ha este+ ngan sinaka ha mga balitang hito. Han ginsukol niya an ganggang han ganghaan, an kahilapad hito usa ka tangbo, ngan an kahilapad han luyo nga ganggang usa liwat ka tangbo.
7 An tagsa nga kwarto han gwardya usa ka tangbo an kahilaba ngan usa ka tangbo an kahilapad, ngan lima ka siko an giutan han tagsa han mga kwarto han gwardya.+ Usa ka tangbo an sukol han ganggang han ganghaan nga sapit han beranda han ganghaan nga naatubang ha sulod.
8 Ginsukol niya an beranda han ganghaan nga naatubang ha sulod, ngan usa ito ka tangbo.
9 Katapos, ginsukol niya an beranda han ganghaan, nga walo ka siko; ngan ginsukol niya an ligid nga mga harigi hito, nga tagduha ka siko; ngan an beranda han ganghaan nakada ha dapit nga naatubang ha sulod.
10 Ha este nga ganghaan may tagtulo nga kwarto han gwardya nga magkaatbang. Parapriho an kadaku hito nga tulo, ngan parapriho an kadaku han magkaatbang nga ligid nga mga harigi.
11 Katapos, ginsukol niya an kahilapad han entrada han ganghaan, nga 10 ka siko; ngan an kahilaba han ganghaan 13 ka siko.
12 Tag-usa ka siko an inalad nga dapit ha atubangan han mga kwarto han gwardya. Unom ka siko an sukol han tagsa nga magkaatbang nga kwarto han gwardya.
13 Katapos, ginsukol niya an ganghaan tikang ha atop han usa nga kwarto han gwardya* ngadto ha atop han kaatbang nga kwarto han gwardya, ngan 25 ka siko an kahilapad hito; may entrada ito paluyoluyo.+
14 Katapos, ginsukol niya an ligid nga mga harigi, nga 60 ka siko an kahitaas, pati na an ligid nga mga harigi ha mga ganghaan ha palibot han bungsaran.
15 Singkwenta ka siko an sukol tikang ha prente han entrada han ganghaan tubtob ha prente han beranda han ganghaan nga naatubang ha sulod.
16 Ha sulod han ganghaan, may magkaatbang nga mga bintana nga nagtitikahaligot an mga hamba*+ dida ha mga kwarto han gwardya ngan ha ligid nga mga harigi hito. Ha sulod han mga beranda may magkaatbang liwat nga mga bintana, ngan may mga ladawan han kahoy nga palma+ ha ligid nga mga harigi.
17 Katapos, gindara niya ako ha gawas nga bungsaran, ngan nakakita ako hin mga kwarto nga pangaonan*+ ngan hin salóg nga bato ha palibot han bungsaran. May-ada 30 nga kwarto nga pangaonan dida ha salóg nga bato.
18 An salóg nga bato ha ligid han mga ganghaan pariho kahilaba han mga ganghaan—ini an ubos nga salóg nga bato.
19 Katapos, ginsukol niya an distansya* tikang ha prente han ubos nga ganghaan tubtob ha prente han sulod nga bungsaran. An sukol hito 100 ka siko ha este ngan ha norte.
20 An gawas nga bungsaran may ganghaan nga naatubang ha norte, ngan ginsukol niya an kahilaba ngan an kahilapad hito.
21 May tagtulo nga kwarto han gwardya nga magkaatbang. An ligid nga mga harigi hito ngan an beranda pariho an sukol han una nga ganghaan. An kahilaba hito 50 ka siko ngan an kahilapad hito 25 ka siko.
22 An mga bintana hito, an beranda, ngan an mga ladawan han kahoy nga palma+ pariho kadaku han aadto ha este nga ganghaan. Pito nga balitang an ginsasaka han mga tawo basi mahingada hito, ngan nakada ha atubangan han mga balitang an beranda hito.
23 Ha sulod nga bungsaran may usa nga ganghaan nga kaatbang han norte nga ganghaan ngan usa nga ganghaan nga kaatbang han este nga ganghaan. Ginsukol niya an distansya tikang ha usa nga ganghaan tubtob ha kaatbang nga ganghaan, ngan 100 ka siko ito.
24 Sunod gindara niya ako tipakadto ha sur, ngan nakakita ako hin ganghaan ha sur nga dapit.+ Ginsukol niya an ligid nga mga harigi ngan an beranda hito, ngan an ngatanan pariho kadaku han iba.
25 Ito ngan an beranda hito may magkaatbang nga mga bintana, pariho han iba nga mga bintana. An kahilaba hito 50 ka siko ngan an kahilapad hito 25 ka siko.
26 May pito nga balitang tipakadto hito,+ ngan nakada ha atubangan han mga balitang an beranda hito. Ngan an ligid nga mga harigi hito may tag-usa nga ladawan han kahoy nga palma.
27 An sulod nga bungsaran may ganghaan nga naatubang ha sur; nagsukol hiya ngadto ha sur tikang ha usa nga ganghaan tubtob ha usa nga ganghaan, ngan an distansya 100 ka siko.
28 Katapos, gindara niya ako ha sulod nga bungsaran pinaagi han sur nga ganghaan; han ginsukol niya an sur nga ganghaan, pariho ito kadaku han iba.
29 An mga kwarto han gwardya hito, an ligid nga mga harigi, ngan an beranda pariho kadaku han iba. Ito ngan an beranda hito may magkaatbang nga mga bintana. An kahilaba hito 50 ka siko ngan an kahilapad hito 25 ka siko.+
30 May mga beranda ha ngatanan nga ganghaan; an tagsa hito 25 ka siko an kahilaba ngan 5 ka siko an kahilapad.
31 An beranda hito naatubang ha gawas nga bungsaran, ngan may mga ladawan han kahoy nga palma ha ligid nga mga harigi hito,+ ngan may walo nga balitang tipakadto hito.+
32 Han gindara niya ako ha sulod nga bungsaran tikang ha este, ginsukol niya an ganghaan, ngan pariho ito kadaku han iba.
33 An mga kwarto han gwardya hito, an ligid nga mga harigi, ngan an beranda pariho kadaku han iba. Ito ngan an beranda hito may magkaatbang nga mga bintana. An kahilaba hito 50 ka siko ngan an kahilapad hito 25 ka siko.
34 An beranda hito naatubang ha gawas nga bungsaran, ngan may mga ladawan han kahoy nga palma ha paluyoluyo nga ligid nga mga harigi hito, ngan may walo nga balitang tipakadto hito.
35 Katapos, gindara niya ako ha norte nga ganghaan+ ngan ginsukol ito; pariho ito kadaku han iba.
36 An mga kwarto han gwardya hito, an ligid nga mga harigi, ngan an beranda pariho kadaku han iba. May magkaatbang ito nga mga bintana. An kahilaba hito 50 ka siko ngan an kahilapad hito 25 ka siko.
37 An ligid nga mga harigi hito naatubang ha gawas nga bungsaran, ngan may mga ladawan han kahoy nga palma ha paluyoluyo nga ligid nga mga harigi hito, ngan may walo nga balitang tipakadto hito.
38 May kwarto nga pangaonan nga may purtahan hirani ha ligid nga mga harigi han mga ganghaan, diin ginhuhugasan an bug-os nga mga halad nga sinunog.+
39 Ha beranda han ganghaan may tagduha nga lamesa nga magkaatbang diin gin-iihaw* an bug-os nga mga halad nga sinunog,+ an mga halad tungod han sala,+ ngan an mga halad tungod han pagin salaan.+
40 Ha dalan tipasaka ha norte nga ganghaan, may duha nga lamesa ha gawas han entrada. May duha liwat nga lamesa ha atbang hito, dida ha beranda han ganghaan.
41 May tag-upat nga magkaatbang nga lamesa ha ganghaan—walo nga lamesa ngatanan—diin gin-iihaw an mga halad.
42 An upat nga lamesa para ha bug-os nga mga halad nga sinunog hinimo ha tinabas nga mga bato. An tagsa hito usa ngan tunga ka siko an kahilaba, usa ngan tunga ka siko an kahilapad, ngan usa ka siko an kahitaas. Dida hito gintitipigan an mga gamit para ha pag-ihaw han mga halad nga sinunog ngan han iba pa nga mga halad nga hayop.
43 May mga estante, nga usa ka dapal an kahilapad, nga nakataod ha palibot han sulod nga bahin han bungbong; ngan an unod han mga halad iginbubutang ha mga lamesa.
44 Ha gawas han sulod nga ganghaan may mga kwarto nga pangaonan para ha mga parakanta;+ nakada ito ha sulod nga bungsaran hirani ha norte nga ganghaan ngan naatubang ha sur. May usa pa nga kwarto nga pangaonan hirani ha este nga ganghaan ngan naatubang ha norte.
45 Nagsiring hiya ha akon: “Ini nga kwarto nga pangaonan nga naatubang ha sur para ha mga saserdote nga may responsabilidad ha mga buruhaton ha templo.+
46 An kwarto nga pangaonan nga naatubang ha norte para ha mga saserdote nga may responsabilidad ha buruhaton ha halaran.+ Hira an mga anak ni Zadok,+ adton tikang ha mga Levita nga gintokahan ha pagdaop kan Jehova basi magserbi ha iya.”+
47 Katapos, ginsukol niya an sulod nga bungsaran. An kahilaba hito 100 ka siko ngan an kahilapad hito 100 ka siko, kwadrado. An halaran nakada ha atubangan han templo.
48 Katapos, gindara niya ako ha beranda han templo,+ ngan ginsukol niya an ligid nga harigi han beranda, ngan lima ka siko ito ha usa nga ligid ngan lima ka siko ha kaatbang nga ligid. An kahilapad han ganghaan tulo ka siko ha usa nga ligid ngan tulo ka siko ha kaatbang nga ligid.
49 An beranda 20 ka siko an kahilaba ngan 11* ka siko an kahilapad. An mga tawo napakadto pinaagi ha pagsaka ha mga balitang. May tag-usa nga harigi ha sapit han ligid nga mga poste.+
Mga footnote
^ Lit., “an kamot ni Jehova kinadi ha akon.”
^ Ha Ingles, copper.
^ Lit., “isentro an imo kasingkasing.”
^ Lit., “balay.” “Templo” an gin-gamit ha kapitulo 40-48 kon an “balay” nagtutudlok ha kabug-osan han templo o ha templo la mismo.
^ Lit., “tangbo nga isurukol nga unom ka siko, usa ka siko ngan usa ka dapal.” Nagtutudlok ini ha higlaba nga mga siko. Kitaa an Ap. B14.
^ Posible nga nagtutudlok ha bawbaw han pader han kwarto han gwardya.
^ O “may magkaatbang nga nagtitikaguti (nagtitikakipot) nga mga bintana.”
^ O “nakakita ako hin mga ruwang.”
^ Lit., “kahilapad.”
^ Ha iba nga lugar, “ginpapatay.”
^ O posible nga “12.”
