Ezekiel 3:1-27
3 Katapos nagsiring hiya ha akon: “Anak han tawo, kaona an aada ha imo atubangan.* Kaona inin linukot nga basahon, ngan lakat, pakiistorya ha panimalay ni Israel.”+
2 Salit iginnganga ko an akon baba, ngan ginpakaon niya ha akon inin linukot nga basahon.
3 Nagsiring pa hiya ha akon: “Anak han tawo, kaona inin linukot nga basahon nga akon iginhahatag ha imo, ngan busoga an imo tiyan hini.” Salit ginkaon ko ito, ngan ha akon baba sugad ito katam-is hin dugos.+
4 Nagsiring hiya ha akon: “Anak han tawo, pakadto ha panimalay ni Israel ngan isumat ha ira an akon mga pulong.
5 Kay ginsusugo ka diri ngadto ha katawohan nga nagyayakan hin yinaknan nga makuri masabtan o hin pinulongan nga diri hinbabaroan, kondi ngadto ha panimalay ni Israel.
6 Diri ka ginsusugo ngadto ha damu nga katawohan nga nagyayakan hin yinaknan nga makuri masabtan o hin pinulongan nga diri hinbabaroan, nga an mga pulong diri mo masasabtan. Kon susugoon ko ikaw ngadto ha ira, mamamati hira ha imo.+
7 Kondi an panimalay ni Israel magdudumiri ha pagpamati ha imo, kay nadiri hira ha pagpamati ha akon.+ An ngatanan ha panimalay ni Israel magtig-a an ulo ngan diri namamati.+
8 Kitaa! An imo nawong ginhimo ko nga sugad gud katig-a han ira mga nawong ngan an imo agtang nga sugad gud katig-a han ira mga agtang.+
9 An imo agtang ginhimo ko nga pariho hin diamante, nga mas matig-a kay han matig-a nga bato.+ Ayaw kahadlok ha ira o kalisang tungod han ira mga nawong,+ kay rebelyoso hira nga panimalay.”
10 Nagsiring pa hiya ha akon: “Anak han tawo, ibutang ha imo kasingkasing ngan pamatii an ngatanan ko nga pulong nga akon iginyayakan ha imo.
11 Pakadto ha mga nadistyero ha imo katawohan*+ ngan pakiistorya ha ira. Sidnga hira, ‘Ini an siring ni Jehova nga Soberano nga Ginoo,’ mamati man hira o magdumiri ha pagpamati.”+
12 Katapos, gin-alsa ako han usa nga espiritu+ ngan hinbatian ko ha akon luyo an usa nga makusog nga hagubuhob nga nasiring: “Hinaot an himaya ni Jehova dayawon tikang ha iya lugar.”
13 Nabatian ko an aringasa han mga pako han buhi nga mga linarang samtang nagsasaghiray ito,+ ngan an aringasa han mga kaliding ha sapit nira,+ ngan an makusog nga hagubuhob.
14 Ngan gin-alsa ngan gindara ako han espiritu, ngan linakat ako nga masurub-on ngan duro nga nasisina an akon espiritu, ngan an gahum ni Jehova ginios gud ha akon.*
15 Salit kinadto ako ha nadistyero nga katawohan ha Tel-abib, nga naukoy ha ligid han salog han Kebar,+ ngan nagpabilin ako didto ha ira gin-uukyan; ngan inukoy ako kaupod nira hin pito ka adlaw nga blangko an hunahuna tungod han kahipausa.+
16 Ha kataposan han pito ka adlaw an pulong ni Jehova inabot ha akon:
17 “Anak han tawo, igintoka ko ikaw sugad nga bantay ha panimalay ni Israel;+ ngan kon makabati ka hin pulong tikang ha akon baba, kinahanglan mo isumat ha ira an pahamangno nga tikang ha akon.+
18 Kon magsiring ako ha maraot, ‘Sigurado nga mamamatay ka,’ kondi diri mo hiya pahamangnoan, ngan diri ka magyakan basi pahamangnoan an maraot nga tawo nga bayaan an iya maraot nga pagkinabuhi basi makapadayon hiya nga buhi,+ mamamatay hiya tungod han iya sayop kay maraot hiya,+ pero susukton ko ha imo an iya dugo.*+
19 Pero kon pahamangnoan mo an maraot ngan diri niya bayaan an iya karaotan ngan an iya maraot nga pagkinabuhi, mamamatay hiya tungod han iya sayop, pero matatalwas mo gud an imo kalugaringon nga kinabuhi.*+
20 Pero kon bayaan han matadong an iya pagkamatadong ngan magbuhat hin sayop,* magbubutang ako hin hiparakdolan ha iya atubangan ngan mamamatay hiya.+ Kon waray mo hiya pahamangnoi, mamamatay hiya tungod han iya sala ngan an iya magtadong nga mga buhat diri mahinunumdoman, pero susukton ko ha imo an iya dugo.*+
21 Pero kon ginpahamangnoan mo an matadong nga diri hiya magbuhat hin sala, ngan diri hiya makasala, sigurado nga magpapadayon hiya nga buhi kay ginpahamangnoan hiya,+ ngan natalwas mo an imo kalugaringon nga kinabuhi.”*
22 An gahum ni Jehova ginios ha akon* didto, ngan nagsiring hiya ha akon: “Buhát ngan pakadto ha kapatagan, ngan makikiistorya ako ha imo didto.”
23 Salit binuhát ako ngan kinadto ha kapatagan, ngan kitaa! nakadto an himaya ni Jehova,+ pariho han himaya nga akon nakita ha ligid han salog han Kebar,+ ngan linuhod ako nga nahapa.
24 Katapos, an espiritu sinulod ha akon ngan ginpatindog ako,+ ngan nakiistorya hiya ha akon ngan nagsiring:
“Pakadto ha imo balay ngan ayaw paggawas.
25 Mahitungod ha imo, anak han tawo, gagapuson ka nira hin mga pisi basi diri ka makagawas ngadto ha ira.
26 Ngan an imo dila padudukuton ko ha imo ngalangala, ngan mangungula ka ngan diri makakasaway ha ira, kay rebelyoso hira nga panimalay.
27 Pero ha panahon nga makiistorya ako ha imo aabrihan ko an imo baba, ngan kinahanglan sidngan mo hira,+ ‘Ini an siring ni Jehova nga Soberano nga Ginoo.’ An namamati mamati,+ ngan an nagdudumiri ha pagpamati magdumiri, kay rebelyoso hira nga panimalay.+
Mga footnote
^ Lit., “kaona an imo hin-aagian.”
^ Lit., “ha mga anak nga lalaki han imo katawohan.”
^ Lit., “an kamot ni Jehova makusog ngadi ha akon.”
^ O “tatagdon ko ikaw nga may baratunon tungod ha iya dugo.”
^ O “kalag.”
^ O “tatagdon ko ikaw nga may baratunon tungod ha iya dugo.”
^ O “magbuhat hin kawaray-hustisya.”
^ O “kalag.”
^ Lit., “An kamot ni Jehova kinadto ha akon.”
