Deuteronomio 34:1-12
34 Katapos, tikang ha disyerto nga kapatagan han Moab hi Moises sinagka ha Bukid Nebo,+ ha pungkay han Pisga,+ nga naatubang ha Jerico.+ Ngan iginpakita ha iya ni Jehova an bug-os nga tuna, tikang ha Gilead tubtob ha Dan,+
2 ngan an bug-os nga Neptali ngan an tuna han Efraim ngan Manases, ngan an bug-os nga tuna han Juda tubtob ha dagat ha weste,*+
3 ngan an Negeb+ ngan an Distrito,+ an kapatagan han Jerico, an syudad han kakahoyan nga palma, tubtob ha Zoar.+
4 Katapos, hi Jehova nagsiring ha iya: “Ini an tuna nga akon iginpanumpa kanda Abraham, Isaac, ngan Jacob, nga nasiring, ‘Ihahatag ko ito ha imo tulin.’*+ Iginpapakita ko ito ha imo, pero diri ka makakatabok ngadto.”+
5 Katapos hito, hi Moises nga surugoon ni Jehova namatay didto ha tuna han Moab sugad han ginsiring ni Jehova.+
6 Iya iginlubong hiya ha walog ha tuna han Moab, ha atubangan han Bet-peor, ngan waray maaram kon hain an iya lubnganan tubtob hini nga adlaw.+
7 Hi Moises 120 anyos han namatay hiya.+ An iya mga mata waray maharap, ngan an iya kusog waray mawara.
8 An katawohan han Israel nagtangis tungod kan Moises didto ha disyerto nga kapatagan han Moab ha sulod hin 30 ka adlaw.+ Ngan natapos an mga adlaw han pagtangis ngan pagtaguminatay para kan Moises.
9 Hi Josue nga anak ni Nun puno han espiritu han kinaadman, kay igintungbaw ni Moises an iya kamot ha iya;+ ngan an mga Israelita namati ha iya, ngan ginbuhat nira an iginsugo ni Jehova kan Moises.+
10 Pero waray na gud iba nga nagin propeta ha Israel nga pariho kan Moises,+ nga kilala gud* ni Jehova.+
11 Ginbuhat niya an ngatanan nga tigaman ngan an mga milagro nga iginsugo ha iya ni Jehova nga pagbuhaton ha tuna han Ehipto ha Paraon ngan ha ngatanan niya nga surugoon ngan ha iya bug-os nga tuna,+
12 upod an gamhanan nga kamot ngan an urusahon gud nga gahum nga iginpakita ni Moises ha atubangan han bug-os nga Israel.+
Mga footnote
^ Karuyag sidngon, an Daku nga Dagat, an Mediteraneo.
^ Lit., “binhi.”
^ Lit., “hin nawong-ha-nawong.”
