Deuteronomio 14:1-29
14 “Mga anak kamo ni Jehova nga iyo Dios. Ayaw kamo pagsamad han iyo kalugaringon+ o ayaw pag-ahita an iyo mga kiray* tungod han patay nga tawo.+
2 Kay kamo baraan nga katawohan+ para kan Jehova nga iyo Dios, ngan ginpili kamo ni Jehova nga magin iya katawohan, iya espesyal nga propyedad,* tikang ha ngatanan nga mga katawohan ha bawbaw han tuna.+
3 “Ayaw pagkaon hin bisan ano nga mangil-ad.+
4 Ini an mga hayop nga puydi niyo kaunon:+ an baka, an karnero, an kanding,
5 an bugsok, an gasela, an bugsok nga lalakí, an ihalas nga kanding, an antelop, an ihalas nga karnero, ngan an karnero ha bukid.
6 Puydi niyo kaunon an bisan ano nga hayop nga magkabulag an kulo nga natutunga ngan nagkikisam utro han kinaon.
7 Pero ayaw niyo pagkaona ini nga mga hayop nga nagkikisam utro han kinaon o magkabulag an kulo: an kamelyo, an kuneho, ngan an kuneho ha bato kay nagkikisam ito utro han kinaon pero diri magkabulag an kulo. Mahugaw ito para ha iyo.+
8 Pati liwat an baboy kay magkabulag an kulo hito pero diri nagkikisam utro han kinaon. Mahugaw ito para ha iyo. Ayaw niyo pagkaona an karne hito o pagkapti an patay nga mga lawas hito.
9 “Ha ngatanan nga may kinabuhi nga aada ha katubigan, ini an puydi niyo kaunon: Bisan ano nga may mga kapay ngan mga hingbis, puydi niyo kaunon.+
10 Pero ayaw niyo pagkaona an bisan ano nga waray mga kapay ngan waray mga hingbis. Mahugaw ito para ha iyo.
11 “Puydi niyo kaunon an bisan ano nga malimpyo nga tamsi.
12 Pero ayaw niyo ini pagkaona: an agila, an banog ha dagat, an itom nga buwitre,+
13 an pula nga banog, an itom nga banog, an ngatanan nga klase han iba pa nga banog,
14 an ngatanan nga klase han uwak,
15 an ostrits, an bukaw, an kanaway, an ngatanan nga klase han falkon,
16 an bukaw nga gutiay, an bukaw nga hilaba an talinga, an swan,
17 an pelikan, an buwitre, an gamaw,
18 an sigwenya, an ngatanan nga klase han talabong, an abubilya, ngan an kulalaknit.
19 An ngatanan nga panon han gudtiay nga linarang* nga may pako mahugaw liwat para ha iyo. Diri ito sadang kaunon.
20 Bisan ano nga malimpyo nga nalupad nga linarang puydi niyo kaunon.
21 “Ayaw niyo pagkaona an bisan ano nga hayop nga hin-agian nga patay.+ Puydi niyo ito ihatag ha dayo nga residente nga aada ha sulod han iyo mga syudad,* ngan puydi niya ito kaunon, o puydi ito ibaligya ha dayo. Kay kamo baraan nga katawohan para kan Jehova nga iyo Dios.
“Ayaw pagpakaladkari an nati nga kanding ha gatas han nanay hito.+
22 “Pirme gud paghatag han ikanapulo han ngatanan nga produkto han imo binhi dida ha uma ha kada tuig.+
23 Kakaunon mo o iinumon an ikanapulo nga bahin han imo lugas, han imo bag-o nga bino, han imo lana, ngan an suhag han imo mga baka ngan han imo mga karnero ha atubangan ni Jehova nga imo Dios ha lugar nga iya pilion basi ukyan han iya ngaran,+ basi mahibaro ka ha pagkaada pirme hin kahadlok kan Jehova nga imo Dios.+
24 “Pero kon hirayo hinduro an biyahe para ha imo ngan diri mo ito maakos pagdara ha lugar nga pilion ni Jehova nga imo Dios sugad nga lugar para han iya ngaran+ kay hirayo ito ha imo (kay bibendisyonan ka ni Jehova nga imo Dios),
25 mahimo mo ito igbaligya, ngan dara an kwarta ha imo kamot, pagbiyahe ngadto ha lugar nga pipilion ni Jehova nga imo Dios.
26 Katapos, an kwarta mahimo mo gamiton pagpalit han bisan ano nga imo ginhihingyap*—mga baka, mga karnero, mga kanding, bino ngan iba pa nga de-alkohol nga mga irimnon, ngan bisan ano nga imo karuyag;* ngan kakaunon mo ito didto ha atubangan ni Jehova nga imo Dios ngan pagrayhak, ikaw ngan an imo panimalay.+
27 Ngan ayaw pagpabay-i an Levita nga aada ha sulod han imo mga syudad,+ kay waray hiya tagi hin malon o panurundon nga sugad han imo.+
28 “Ha kataposan han kada tulo ka tuig, igawas an ngatanan nga ikanapulo nga bahin han imo produkto hito nga tuig ngan ibutang ito ha sulod han imo mga syudad.+
29 Katapos, an Levita nga waray tagi hin malon o panurundon nga sugad han imo, an dayo nga residente, an bata nga waray tatay,* ngan an balo nga babaye nga aada ha imo mga syudad makanhi ngan makaon tubtob nga mabusog hira,+ basi hi Jehova nga imo Dios magbendisyon ha imo ha ngatanan nga imo ginbubuhat.+
