Deuteronomio 13:1-18
-
Pagtratar ha mga apostata (1-18)
13 “Kon magkaada dida ha iyo usa nga propeta o tawo nga nagtatagna pinaagi hin mga inop ngan naghahatag ha iyo hin tigaman o hin prediksyon,
2 ngan an tigaman o an prediksyon nga iya ginyakan ha iyo mahitabo samtang nagyayakan hiya hini, ‘Magsunod kita hin iba nga mga dios,’ mga dios nga diri niyo kilala, ‘ngan mag-alagad kita ha ira,’
3 ayaw pamati ha mga pulong hito nga propeta o hito nga parainop,+ kay ginsasarihan kamo ni Jehova nga iyo Dios+ basi hibaroan kon hinigugma niyo hi Jehova nga iyo Dios ha bug-os niyo nga kasingkasing ngan ha bug-os niyo nga kalag.*+
4 Hi Jehova nga iyo Dios an sadang niyo sundon, hiya an sadang niyo kahadlokan, an iya mga sugo an sadang niyo sugton, an iya tingog an sadang niyo pamatian; hiya an sadang niyo alagaran, ngan ha iya sadang kamo magin duok gud.+
5 Pero ito nga propeta o ito nga parainop sadang patayon,+ kay nag-aghat hiya hin pagrebelde kan Jehova nga iyo Dios—nga naggawas ha iyo ha tuna han Ehipto ngan nagtubos ha iyo tikang ha balay han pagkauripon—basi isimang kamo tikang ha dalan nga iginsugo ni Jehova nga iyo Dios nga iyo laktan. Ngan kinahanglan kuhaon niyo an maraot dida ha iyo butnga.+
6 “Kon an imo bugto nga lalaki, nga anak han imo nanay, o an imo anak nga lalaki o an imo anak nga babaye o an imo minayuyo nga asawa o an imo pinakaduok nga kaupod* mangalimbasog ha pagsulay ha imo hin sekreto, nga nasiring, ‘Lakat kita ngan mag-alagad hin iba nga mga dios,’+ mga dios nga diri mo kilala ngan diri liwat kilala han imo mga kaapoy-apoyan,
7 nga tikang ha mga dios han mga katawohan ha iyo palibot, hirani man ito o hirayo ha imo, tikang ha usa nga kataposan han tuna tubtob ha luyo nga kataposan han tuna,
8 ayaw pagpadaog ha iya o pamati ha iya,+ ayaw liwat pagpakita hin kalooy o pag-abat hin pagpaid o pagpanalipod ha iya;
9 lugod, kinahanglan gud nga patayon mo hiya.+ An imo kamot amo an siyahan nga madapat ha iya basi patayon hiya, ngan katapos an mga kamot han ngatanan nga katawohan.+
10 Ngan kinahanglan batuhon mo hiya tubtob nga mamatay,+ kay nangalimbasog hiya nga italikod ka kan Jehova nga imo Dios, nga naggawas ha imo ha tuna han Ehipto, tikang ha balay han pagkauripon.
11 Katapos, an bug-os nga Israel makakabati ngan mahahadlok, ngan diri na gud hira magbubuhat utro hin bisan ano nga maraot pariho hini dida ha iyo.+
12 “Kon ha usa han imo mga syudad nga iginhahatag ha imo ni Jehova nga imo Dios basi ukyan, mabatian mo nga ginsiring ini,
13 ‘May-ada waray pulos nga mga tawo nga ginawas tikang ha iyo basi italikod an mga umurukoy han ira syudad, nga nasiring: “Lakat kita ngan mag-alagad hin iba nga mga dios,” mga dios nga diri niyo kilala,’
14 kinahanglan panginanoon mo ito, usisaha hin maopay ngan pagpakiana;+ ngan kon makompirma nga inin mangil-ad nga butang tinuod nga ginbuhat dida ha iyo,
15 kinahanglan gud nga imo patayon an mga umurukoy hito nga syudad pinaagi han espada.+ Bungkaga ito ngan an ngatanan nga aada hito, pati an mga hayop hito,+ pinaagi han espada.
16 Katapos, tiroka ha butnga han plasa hito an ngatanan nga dinag-an hito ngan sunoga ha kalayo an syudad, ngan an dinag-an hito magigin pariho hin bug-os nga halad kan Jehova nga imo Dios. Magigin permanente ito nga tambak han kagubaan. Diri na gud ito tutukuron utro.
17 An imo kamot waray kukuhaon nga bisan ano nga iginlain basi bungkagon,*+ para mawara an naglalaga nga kasina ni Jehova ngan pakitaan ka hin kalooy ngan pagpaid ngan padamuon ka, sugad han iya iginpanumpa ha imo mga kaapoy-apoyan.+
18 Kay sadang mo sugton hi* Jehova nga imo Dios pinaagi ha pagsunod han ngatanan niya nga sugo nga akon iginsusugo ha imo yana nga adlaw, hito nga paagi ginbubuhat mo an husto ha pagkita ni Jehova nga imo Dios.+
