Deuteronomio 17:1-20
17 “Ayaw paghalad kan Jehova nga imo Dios hin baka o hin karnero nga may depekto o may bisan ano nga diri maopay dida hito, kay magigin mangil-ad ito kan Jehova nga imo Dios.+
2 “Pananglitan, usa nga lalaki o usa nga babaye an hiagian dida ha iyo, ha bisan diin han iyo mga syudad nga iginhahatag ha iyo ni Jehova nga iyo Dios, nga nagbubuhat hin maraot ha pagkita ni Jehova nga iyo Dios ngan nagtatalapas han kasabotan nga iya ginhimo,+
3 ngan sumimang hiya ngan magsingba ha iba nga mga dios ngan magyukbo ha ira o ha adlaw o ha bulan o ha bug-os nga hugpo han langit,+ nga waray ko igsugo.+
4 Kon ipahibaro ito ha imo o makabati ka mahitungod hito, imbistigaron mo ito hin maopay. Kon makompirma nga tinuod+ nga ginbuhat dida ha Israel ito nga mangil-ad nga butang,
5 kinahanglan dad-on mo an lalaki o an babaye nga nagbuhat hini nga maraot nga butang ha gawas ngadto ha mga ganghaan han syudad, ngan an lalaki o an babaye kinahanglan batuhon tubtob nga mamatay.+
6 Papatayon la an tawo basado ha testimonya* han duha nga testigo o tulo nga testigo.+ Ayaw hiya pagpataya basado ha testimonya han usa nga testigo.+
7 An kamot han mga testigo amo an siyahan nga madapat ha iya basi patayon hiya, ngan katapos an kamot han ngatanan nga katawohan. Kinahanglan kuhaon mo an maraot dida ha iyo butnga.+
8 “Kon magkaada hin kaso ha usa han iyo mga syudad nga makuri hinduro para ha imo nga hukman, kaso man ito may kalabotan ha pagpatay*+ o demanda nga iginpasaka o madarahog nga buhat o iba pa nga mga butang nga ginlalantugian, matindog ka ngan makadto ha lugar nga pilion ni Jehova nga imo Dios.+
9 Pakadto ha mga saserdote nga Levita ngan ha hukom+ nga nag-aalagad hito nga mga adlaw, ngan pagpakiana, ngan ira ipapalusad an desisyon ngada ha imo.+
10 Katapos, buhata an uyon ha desisyon nga ira iginpalusad ngada ha imo tikang ha lugar nga pilion ni Jehova. Ngan buhata gud an uyon ha ngatanan nga ira igtututdo ha imo.
11 Buhata an uyon han balaud nga ira iginpapakita ha imo ngan uyon han desisyon nga ira iginsasaysay ha imo.+ Ayaw pagsimang ha desisyon nga ira igpapalusad ngada ha imo, ha too man o ha wala.+
12 An tawo nga nagpaparagbuot pinaagi ha diri pagpamati ha saserdote nga nag-aalagad kan Jehova nga imo Dios o ha hukom, kinahanglan mamatay.+ Kuhaa an maraot dida ha Israel.+
13 Katapos, an ngatanan nga katawohan makakabati ngan mahahadlok, ngan diri na gud hira magpaparagbuot.+
14 “Kon sumulod ka ha tuna nga iginhahatag ha imo ni Jehova nga imo Dios, ngan pagtag-iyahon mo ito ngan umukoy dida hito, ngan sumiring ka, ‘Magpipili ako hin hadi nga magmamando ha akon pariho han ngatanan nga nasud nga nakapalibot ha akon,’+
15 kon sugad, magpipili ka hin hadi nga pipilion ni Jehova nga imo Dios.+ Magpipili ka hin hadi tikang ha imo kabugtoan. Diri ka puydi magpili hin dayo nga diri mo bugto nga magmamando ha imo.
16 Pero diri hiya sadang magkaada hin damu nga kabayo para ha iya kalugaringon+ o diri niya pabalikon an katawohan ngadto ha Ehipto basi magkaada damu nga kabayo,+ kay hi Jehova nagsiring ha iyo, ‘Ayaw na gud kamo pagbalik hini nga dalan.’
17 Diri liwat hiya kumuha hin damu nga asawa, basi an iya kasingkasing diri mahisimang;+ diri liwat hiya magkaada hin damu hinduro nga silber ngan bulawan para ha iya kalugaringon.+
18 Kon lumingkod hiya ha trono han iya ginhadian, kinahanglan magsurat hiya para ha iya kalugaringon ha usa nga libro* hin kopya hini nga Balaud, nga ginsubad tikang ha usa nga gintitipigan han mga saserdote nga Levita.+
19 “Magpapabilin ito dida ha iya, ngan kinahanglan niya ito basahon ha ngatanan nga adlaw han iya kinabuhi,+ basi mahibaro hiya ha pagkaada hin kahadlok kan Jehova nga iya Dios ngan sundon an ngatanan nga pulong hini nga Balaud ngan hini nga mga regulasyon pinaagi ha pagtuman hito.+
20 Basi an iya kasingkasing diri magpahitaas labaw han iya kabugtoan, ngan diri hiya sumimang ha sugo, ha too man o ha wala, para magpabilin hiya hin maiha nga panahon ha pagmando ha iya ginhadian, hiya ngan an iya mga anak dida ha butnga han Israel.
