Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 101

Kanavata ena Vale i Saimoni e Pecani

Kanavata ena Vale i Saimoni e Pecani

E gole i Pecani o Jisu ni biubiu mai Jeriko. E rauta ni 20 na kilomita na ilakolako qori qai cabeti na veiulunivanua. Na vanua e toka kina o Jeriko e rauta ni 250 na mita kena cere mai waitui, o Pecani e rauta ni 610 na mita kena cere mai waitui. Eratou vakaitikotiko ena koro o Pecani o Lasarusa kei rau na ganena, rauta ni tolu na kilomita mai Jerusalemi qai toka ena baba tokalau ena Ulunivanua ni Veiolive.

Sa ra tekivu yaco yani e levu i Jerusalemi mera lai solevutaka na Lakosivia. Era yaco totolo yani mera lai “vakasavasavataki ira” de ra tara mai e dua na yagonimate se vakayacora e dua na ka e vakadukadukalitaki ira. (Joni 11:55; Tiko Voli Mai na Lekutu 9:6-10) Era gole sara ena valenisoro eso era yaco totolo yani ra qai via kila ke na tiko tale ga ena Lakosivia o Jisu.​—Joni 11:56.

E veitalanoataki tiko vakalevu o Jisu. Era via vesuki koya eso na iliuliu ni lotu me vakamatei. Era vakarota me tukutuku yani vei ira o koya e kila na vanua e tiko kina o Jisu “mera lai vesuki koya.” (Joni 11:57) O ira ga na iliuliu ni lotu qori era via vakamatei koya ena gauna a vakaturi Lasarusa kina. (Joni 11:49-53) Sa rauta mera lomatarotarotaka eso ena vakaraitaki koya o Jisu e matanalevu se sega..

E yaco yani i Pecani o Jisu ena Vakaraubuka, “ni vo e ono na siga me vakayacori na Lakosivia.” (Joni 12:1) E tekivu e dua na siga vou (Siga ni Vakacecegu, ika8 ni Naisani) ni dromu na siga. Kena ibalebale sa vakacavara nona ilakolako o Jisu ni bera na Siga ni Vakacecegu. E sega ni rawa ni biuti Jeriko ena Siga ni Vakacecegu​—ni dromu na siga ena Vakaraubuka ina dromunisiga ena Vakarauwai baleta e vakatabui na veilakoyaki ena siga qori ena nodra lawa na Jiu. Me vaka ga e dau cakava e liu o Jisu, e rairai gole sara ina vale i Lasarusa.

Ena yakavi ni Vakarauwai, e sureti sara o Jisu kei ira na nona itokani, wili kina o Lasarusa, ina kanavata ena vale i Saimoni e Pecani. E vakatokai na turaga qori me o Saimoni “na vukavuka,” de dua a vukavuka tu e liu qai vakabulai koya o Jisu. E baci ogataki ira na vulagi o Marica me vaka ga na nona ivakarau. O Meri e kauaitaki Jisu ga, ia e qai cakava e dua na ka e vakavu veivosaki vakalevu.

E dolava o Meri na tavaya waiwai e tawa tu kina “e dua na paudi na waiwai boivinaka, e vakaisaluaki ena narita dina.” (Joni 12:3) E waiwai talei dina qori qai (300 na dinari) na kena isau, qori e tautauvata kei na isau ni tamata cakacaka ena dua na yabaki! E livia o Meri na waiwai ena ului Jisu kei na yavana qai qusia na yavana ena drauniuluna. E curuoso e vale na iboi sareguregu ni waiwai.

Eratou cudru na tisaipeli ratou qai taroga: “Na cava e vakasabusabutaki kina na waiwai boivinaka qo?” (Marika 14:4) E bau vosavosa tale ga o Jutasa Isikarioti, e kaya: “Na cava e sega ni volitaki  kina na waiwai boivinaka qori ena 300 na dinari me qai soli vei ira na dravudravua?” (Joni 12:5) E sega ni nanumi ira dina na dravudravua o Jutasa. Sa dau butakoca voli mai na ilavo e maroroya tu ena vukudratou na tisaipeli.

E tokoni Meri o Jisu ena nona kaya: “Na cava dou vakalewa kina na yalewa qo? E cakava tiko vei au e dua na cakacaka vinaka. Ni dou na tiko ga kei ira na dravudravua, ia dou na sega ni dau tiko vata ga kei au. Ni lumuta na yagoqu na yalewa qo, sa vakarautaki au tiko ena noqu bulu. Au tukuna vakadodonu vei kemudou, ni vunautaki na itukutuku vinaka ena veiyasa i vuravura kece, ena tukuni tale ga na ka e vakayacora na yalewa qo me kena ivakananumi.”​—Maciu 26:10-13.

Se sega ni dede nona tiko voli e Pecani o Jisu, sa tete na kena itukutuku. Era gole yani ina vale i Saimoni e levu na Jiu mera raici Jisu kei Lasarusa “e vakatura [o Jisu] mai na mate.” (Joni 12:9) Era veivosakitaka sara na iliuliu ni bete me rau vakamatei o Jisu kei Lasarusa. Era vakabauta na iliuliu ni lotu qori nira sa vakabauti Jisu tiko e levu ena vuku ni nona vakaturi Lasarusa. Sa laurai votu sara tu ga e keri nodra ivakarau ca na iliuliu ni lotu!