Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 74

iVakasala me Baleta na Veikauaitaki kei na Masu

iVakasala me Baleta na Veikauaitaki kei na Masu

LUKE 10:38–11:13

  • SIKOVI MARICA KEI MERI O JISU

  • BIBI NA MASU VAGUMATUA

E toka na koro o Pecani ena baba tokalau ni Ulunivanua ni Veiolive, rauta ni tolu na kilomita mai Jerusalemi. (Joni 11:18) Ni yaco yani o Jisu e kea, e gole sara ina nodrau vale na veitacini, o Marica kei Meri. Dua na ka nodrau marautaki Jisu na yalewa ni ratou nona itokani kei na ganedrau o Lasarusa.

E ka dokai dina me vulagi yani ena nodrau vale na Mesaia. Ni vinakata vakalevu o Marica me qaravi Jisu vinaka, e ogataka kina e levu na ka me baleta na vakarautaki ni kakana. Ia e dabe voli ga ena mata i Jisu o Meri qai vakarorogo vua. Oti ga vakalailai e tukuna sara vei Jisu o Marica: “Turaga, e sega ni dua na ka vei kemuni nona biuti au duadua o taciqu meu qai cakava kece tu na ka? Ni kaya mada vua me mai vukei au.”—Luke 10:40.

E sega ni vakalewai Meri o Jisu, e vunauci Marica ga ena nona lomaocaocataka vakasivia na veika vakayago: “Marica, Marica, o sa lomaocaoca o qai nuiqawaqawataka e levu na ka. E vica ga na ka e gadrevi, se dua ga. E digia o Meri na ivotavota vinaka ena sega sara ni kau tani vua.” (Luke 10:41, 42) E kaya tiko o Jisu ni vakalusi gauna na kena vakarautaki na veimataqali kakana. Ke dua mada ga na kakana lailai, sa veirauti ya.

E vinaka na inaki i Marica ni via vakaraitaka nona veikauaitaki. Ia sa rui lomaocaocataka na vakarautaki ni kakana, e sega ni rogoca kina na ivakavuvuli totoka ni Luve ni Kalou! E vakabibitaka e keri o Jisu ni na yaga tawamudu vei Meri nona digidigi vakayalomatua qai tiko na ka meda vuli kina.

E basika e dua tale na ituvaki e vakavulica kina o Jisu e dua na tikina bibi. A kerei koya e dua na tisaipeli: “Turaga, vakavulici keitou mada ena ivakarau ni masu, me vaka na nona vakavulici ratou nona tisaipeli o Joni.” (Luke 11:1) Sa cakava oti qori o Jisu ena dua veimama na yabaki yani e liu, ena nona iVunau ena Ulunivanua. (Maciu 6:9-13) De dua a sega ni tiko e keri na tisaipeli ya, mani tokaruataka o Jisu na veitikina bibi mai na ivunau ya. Oti e cavuta sara e dua na vosa vakatautauvata e vakabibitaka kina na masu vagumatua.

“O cei vei kemudou ena lako vua na nona itokani ena lomalomanibogi me lai kaya vua: ‘Noqu itau, meu dinautaka mada vei iko e tolu na ibuli madrai, ni se qai yaco mai e dua na noqu itokani e lako mai vakayawa, qai sega ni dua na ka e tu meu vakarautaka vua.’ E kaya o koya e tiko mai loma, ‘Kua ni vakasosani au. Sa loka na katuba, eratou sa davo tu e yasaqu na luvequ. Au sega ni rawa ni duri meu solia vei iko e dua na ka.’ Au tukuna vei kemudou, e dina ni na sega ni tucake me solia vua e dua na ka ni nona itokani, ia ena nona cikecike ena duri kina me solia vua na ka ga e vinakata.”—Luke 11:5-8.

E sega ni tukuna o Jisu ni dau yalodredre o Jiova me rogoca na vakamamasu, me vaka na itokani ena vosa vakatautauvata. E via vakaraitaka ga ke sa rawa ni vakayacora e dua na itokani yalodredre na ka e cikevi vua, sa qai wacava sara na Tamada vakalomalagi. Io, ena vakayacora tale ga nodra kerekere na nona tamata yalodina! E tomana o Jisu: “Au kaya gona vei kemudou, dou kerekere tiko ga, ena qai soli vei kemudou, dou vaqaqara tiko ga, dou na qai kunea, dou tukituki tiko ga, ena qai dolavi vei kemudou. Ni o koya e kerekere ena soli vua, o koya e vaqaqara ena kunea, o koya tale ga e tukituki ena dolavi vua.”—Luke 11:9, 10.

Sa qai vakamatatataka o Jisu na ka e vakabibitaka ena vosa vakatautauvata me baleti ira na tama vakayago: “O cei na tama e kere ika vua o luvena qai solia vua na gata me isosomi ni ika? Se kere yaloka, ena solia vua na batibasaga? O koya gona, ke sa rawa vei kemudou na tamata ivalavala ca mo dou solia na ka vinaka vei ira na luvemudou, sa na qai wacava na Tamada mai lomalagi ni na solia na yalo tabu vei ira era kerea vua!” (Luke 11:11-13) E veivakacegui dina na noda kila ni dau tu vakarau na Tamada me rogoca qai vakayacora noda kerekere.