Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 87

Raiyawa kei na Vuku

Raiyawa kei na Vuku

LUKE 16:1-13

  • IVAKATAUTAUVATA NI DAUNIYAU TAWADODONU

  • VAKAYAGATAKA NOMU IYAU ME ‘SO KINA NOMU ITOKANI’

E dodonu mera vulica na daukumuni ivakacavacava, vunivola kei ira na Farisi ena ivakatautauvata i Jisu me baleta na gonetagane a yali, ni dau tu vakarau na Kalou me vosoti ira na valavala ca era sa veivutuni. (Luke 15:1-7, 11) Sa qai vosa vei ira na nona tisaipeli o Jisu. E cavuta e dua tale na vosa vakatautauvata me baleta e dua na turaga vutuniyau a sega ni cakacaka vakadodonu na nona dauveiqaravi e lewa na vale se dauniyau.

E tukuna o Jisu ni beitaki na dauniyau ni vakasabusabutaka na iyau ni nona turaga. Sa qai tukuna na turaga ni na kau laivi vua nona itavi vakadauniyau. E vosavosaiyalona na dauniyau: “Cava meu cakava ni sa na kauta laivi na turaga na noqu itutu vakadauniyau? Au sega ni rawa ni kelikeli niu malumalumu, au madua tale ga na kerekere.” E veinanuyaka na ka me cakava, e kaya sara: “Au sa qai kila na ka meu cakava, mera kauti au kina i nodra vale na lewenivanua niu sa na vakacegui mai na noqu itutu vakadauniyau.” E kacivi ira na dinau tu qai taroga: “Vica o dinautaka vua na noqu turaga?”​—Luke 16:3-5.

E sauma na kena imatai: “E duanadrau na paca waiwai olive.” Qori e rauta ni 2,200 na lita na waiwai. De dua e tiko nona veiolive o koya e dinau tu se dau volitaki waiwai. E tukuna sara vua na dauniyau: “Taura tale yani nomu ivola ni veidinadinati, dabe, vola vakatotolo me 50 ga [1,100 na lita].”​—Luke 16:6.

E taro o dauniyau vua e dua tale: “O iko, e vica o dinautaka?” E sauma: “E duanadrau na ivakarau witi.” Qori e rauta ni 22,000 na lita witi. E tukuna vua na dauniyau: “Taura tale yani nomu ivola ni veidinadinati, dabe, vola vakatotolo me 80 ga.” E vakalailaitaki nona dinau ena 20 na pasede.​—Luke 16:7.

E se qarava tiko na dauniyau na veika vakailavo ni nona turaga, e rawa gona ni vakalailaitaka na ka era dinautaka eso vua nona turaga. Ni cakava qori, e sa veitokani tiko kina o dauniyau kei ira era na rairai vukei koya ni sa na vakacegui mai na nona cakacaka.

E rawa ni vakaleqa nona bula vakailavo na nona turaga na ka e cakava na dauniyau, ia e qoroya nona turaga na ka e cakava. A “sega ni cakacaka vakadodonu” o dauniyau, ia e vakacaucautaki ena nona “qaseqase.” E tomana o Jisu: “[E]ra qaseqase cake vei ira na luve ni rarama na gone ni vuravura qo ena veika e baleti ira.”​—Luke 16:8.

Sega ni kena ibalebale qori ni vakadonuya o Jisu na ka e cakava na dauniyau, e sega tale ga ni uqeta na caka bisinisi vakailawaki. E uqeti ratou tiko ga na tisaipeli: “Dou vakayagataka na iyau tawadodonu me so kina nomudou itokani, ni gauna ena tawayaga kina na iyau, era na ciqomi kemudou ina itikotiko e tudei.” (Luke 16:9) E laurai e keri ni bibi na raiyawa kei na qaseqase. E bibi mera vakayagataka vakavuku nodra iyau vakayago na “luve ni rarama” se o ira na dauveiqaravi  ni Kalou, mera vakasamataka na veika ena dei ena gauna se bera mai.

O Jiova ga kei na Luvena erau na lewa o cei me lewena na Matanitu vakalomalagi se bula ena Parataisi e vuravura ena ruku ni veiliutaki ni Matanitu ya. Meda saga sara ena noda vinaka kece meda veitokani kei rau nida vakayagataka noda iyau ena tokoni ni veika e vauca na Matanitu ni Kalou. Qori ena dei kina noda inuinui ni gauna se bera mai, nira sa na tawayaga se vakarusai na koula, siliva kei na iyau vakayago tale eso.

E kaya tale ga o Jisu ni o ira era yalodina ni qarava se vakayagataka na nodra iyau vakayago, era na yalodina ni qarava na veika e bibi cake. E tukuna kina o Jisu: “Ke dou sega gona ni dina ena iyau tawadodonu, dou na qai nuitaki vakacava mo dou dina ena iyau e dodonu [me vaka na veika e vauca na Matanitu ni Kalou]?”​—Luke 16:11.

E kaya tiko o Jisu ni levu na ka me ratou na cakava nona tisaipeli me ratou qai ciqomi “ina itikotiko e tudei.” E sega ni rawa ni yalodina ni qarava na Kalou e dua me qai bobula tale tiko ena iyau vakayago e tawadodonu. E tinia o Jisu: “E sega ni dua na dauveiqaravi e qarava rawa e rua na turaga, ni na cata e dua ena lomana e dua, se kabita e dua ena beci koya adua. Dou na sega ni qarava rawa na Kalou kei na iYau.”​—Luke 16:9, 13.