Sa oti qo e dua veimama na yabaki mai na gauna a tukuna kina o Joni na Dauveipapitaisotaki ni o Jisu na Lami ni Kalou. Eratou yalomalumalumu eso me ratou tisaipeli i Jisu ni tekivu nona cakacaka vakaitalatala, me vakataki Adriu, Saimoni Pita, Joni, rairai o Jemesa tale ga (na taci Joni), o Filipi, kei Pacolomiu (e kilai tale ga me o Nacanieli). E levu tale era muri Karisito ni toso na gauna.​—Joni 1:45-47.

Sa vakarau digitaki ratou na nona yapositolo o Jisu. Eratou na nona itokani voleka, ratou na vakarautaki tale ga ena so na itavi bibi. Ia ni bera ni digitaki ratou, a lako o Jisu ina dua na ulunivanua rairai volekata na Wasa o Kalili volekati Kapenaumi. E masu voli e kea ena bogi taucoko, de dua me kerea na vuku kei na veivakalougatataki ni Kalou. E kacivi ira na nona tisaipeli ena siga tarava qai digitaka e le 12 me ratou yapositolo.

E digitaki ratou na le ono sa cavuti oti mai o Jisu, a digitaki Maciu tale ga na daukumuni ivakacavacava. Eratou digitaki e lima tale, o Jutasa (e kilai tale ga me o Cateo kei na “luvei Jemesa”), Saimoni na Gugumatua, Tomasi, Jemesa na luvei Alifio, kei Jutasa Isikarioti.​—Maciu 10:2-4; Luke 6:16.

Ni ratou dau tomani Jisu na le 12 qo, sa kilai ratou vinaka sara o koya. Eso ratou wekana, o rau na veitacini o Jemesa kei Joni ratou rairai veitatacini. Ke dina nodra nanuma eso me rau veitacini o Alifio kei Josefa na tamai Jisu vakacabecabe, erau na veitatacini tale ga o Jisu kei na yapositolo o Jemesa na luvei Alifio.

E rawarawa nona nanuma o Jisu na yacadratou nona yapositolo. Vakacava o nanuma na yacadratou? Qo e dua na sala mo nanuma kina na yacadratou na le walu na yapositolo: E rua na Saimoni, rua na Jemesa, rua na Jutasa, o Saimoni (Pita) e taci Adriu, o Jemesa (luvei Sepeti) e taci Joni. O ratou na le va tale e wili kina e dua na daukumuni ivakacavacava (Maciu), e dua a vakatitiqa e muri (Tomasi), dua e kacivi mai na ruku ni vunikau (Nacanieli), kei na itokani i Nacanieli (Filipi).

Eratou le tinikadua na yapositolo mai Kalili, na vanua i Jisu. O Nacanieli mai Kena, o Filipi, Pita kei Adriu eratou kai Peceseita. Erau qai toki e muri i Kapenaumi o Pita kei Adriu, e rairai vakaitikotiko kina o Maciu. Erau vakaitikotiko tale ga e Kapenaumi se dua na vanua voleka o Jemesa kei Joni rau qai vakabisinisi ni qoli. Kena irairai ni yapositolo duadua mai Jutia o Jutasa Isikarioti, a qai veretaki Jisu e muri.