Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 68

“Na Rarama kei Vuravura”​—Na Luve ni Kalou

“Na Rarama kei Vuravura”​—Na Luve ni Kalou

JONI 8:12-36

  • VAKAMACALATAKA O JISU O CEI NA LUVE NI KALOU

  • NODRA MAI BOBULA NA JIU

Ena iotioti ni siga ni Soqo ni Valevakacevaceva, e veivakavulici tiko o Jisu ena dua na yasa ni valenisoro e vakatokai me “kato ni iyau.” (Joni 8:20; Luke 21:1) E rairai toka qori ena Lomanibai ni Marama, era dau biuta kina na lewenivanua nodra cau.

Ena bogi kece ni soqo, e dau vakararamataki na yasa ni valenisoro qo. E tu e kea e va na tutu ni cina lelevu qai va na beseni lelevu e tawa kina na waiwai. Na kaukaua ni ramase ni tutu ni cina qori e rawa ni vakararamataka e dua na vanua levu. Sa qai cavuta o Jisu e dua na ka era na rairai nanuma lesu kina na vakarorogo na rarama qori: “O yau na rarama kei vuravura. O koya e muri au ena sega sara ni lako ena butobuto, ena cilavi koya ga na rarama e veivakabulai.”—Joni 8:12.

Era sega ni duavata na Farisi ena ka e tukuna o Jisu ra qai kaya: “O tukuni iko tiko ga, e sega ni dina na nomu itukutuku.” E sauma o Jisu: “Keu tukuni au mada ga, e dina na noqu itukutuku niu kila na vanua au lako mai kina kei na vanua au lako tiko kina. Ia o kemuni, oni sega ni kila na vanua au lako mai kina kei na vanua au lako tiko kina.” Sa qai kuria: “E volai tale ga ena nomuni Lawa: ‘E dina na nodrau itukutuku na le rua.’ Au dau tukuni au, e dau tukuni au tale ga o Tamaqu e talai au mai.”—Joni 8:13-18.

Era sega ni via ciqoma na Farisi nona ivakamacala, era taroga: “I vei o Tamamu?” E sauma vakadodonu o Jisu: “Oni sega ni kilai au, oni sega tale ga ni kilai Tamaqu. Ke oni kilai au, oni na kilai Tamaqu tale ga.” (Joni 8:19) Era se vinakata tiko ga na Farisi mera vesuki Jisu, ia e sega ni dua e tarai koya rawa.

E taleva o Jisu na ka a cavuta ena dua na gauna: “Au sa lako qo, oni na vaqarai au, ia oni na mate ena nomuni valavala ca. Na vanua au  lako kina oni na sega ni lako rawa yani kina.” Era sega ni taura rawa na Jiu na ka e vakaibalebaletaka o Jisu, ra mani veinanuyaka: “De dua sa via lai vakamatei koya! ni kaya, ‘Na vanua au lako kina oni na sega ni lako rawa yani kina.’” Era sega ni kila na ka e vakaibalebaletaka o Jisu nira sega ni kila se vu mai vei o koya. E tukuna: “O kemuni oni lako mai ra, o yau au lako mai cake. Oni vu mai vuravura, o yau au sega ni vu mai vuravura qo.”—Joni 8:21-23.

E vakaibalebaletaka tiko o Jisu ni se bera ni mai bula vakatamata, sa bula tu mai lomalagi. O koya na Mesaia yalataki se Karisito. E dodonu mera namaki koya na iliuliu ni lotu. Ena nodra veibeci era tarogi koya: “O cei o iko?”—Joni 8:25.

Nira sega ni ciqomi Jisu ra qai tusaqati koya, e tukuna kina vei ira: “Na cava mada au mai vosa tiko kina vei kemuni?” E tukuni Tamana sara, kei na vuna mera vakarorogo kina na Jiu vua na Luve ni Kalou: “E dina o koya e talai au mai, na veika au rogoca vua au tukuna i vuravura.”—Joni 8:25, 26.

Sa qai vakaraitaka o Jisu na nona nuitaki Tamana, qori sara ga na ka era lekata na Jiu: “Ni oni sa laveta cake na Luve ni tamata, oni na qai kila ni o yau ga o koya, niu sega tale ga ni cakava vakataki au e dua na ka, ia au tukuna ga na ka e vakavulici au kina o Tamaqu. E tiko vata kei au o koya e talai au mai, e sega ni biuti au taudua tu, niu dau cakava na ka e vinakata.”—Joni 8:28, 29.

Eso na Jiu era vakabauti Jisu, e tukuna gona vei ira: “Oni noqu tisaipeli dina ke oni muria tiko ga na noqu vosa, oni na kila na ka dina, na ka dina ena qai sereki kemuni.”—Joni 8:31, 32.

Era kurabui eso ni cavuta o Jisu na veisereki. Era sega ni duavata kina ena nodra kaya: “O keimami qo na kawa i Eparama, keimami se sega ni bau bobula vua e dua. O qai kaya vakacava, ‘Oni na sereki?’” Era kila na Jiu ni so na gauna e dau vakarurugi nodra vanua ena veiliutaki ni so tale na matanitu, ia era sega ni vinakata mera vakatokai mera bobula. Se mani cava era nanuma, e kaya o Jisu nira se bobula tiko ga: “Au tukuna vakadodonu vei kemuni, o koya yadua e valavala ca e bobula ina ivalavala ca.”—Joni 8:33, 34.

Sa rerevaki dina na kedra ituvaki na Jiu, nira sega ni vakadinata nira vakabobulataki tu ena ivalavala ca. E vakamacalataka o Jisu: “Na bobula tale ga ena sega ni lewe tudei ni vuvale, na luvei itaukeinivale ga ena tiko kina me tawamudu.” (Joni 8:35) Ena sega ni soli na ivotavota ni vuvale vua na bobula, ni rawa tale ga ni vakatalai ena dua ga na gauna. Ia na luvei itaukeinivale se gone e sucu se susugi ena vuvale qori ena tiko kina me “tawamudu” se nona bula taucoko.

Kena ibalebale, na ka dina me baleta na Luve ni Kalou ena sereki ira tawamudu na tamata mai na ivalavala ca e kena itinitini na mate. E tukuna o Jisu: “Ke sa sereki kemuni na Luvena, oni sa qai sereki dina.”—Joni 8:36.