Raica sara na lewena

Raica na lewenivola

 WASE 90

“Veivakaturi kei na Bula”

“Veivakaturi kei na Bula”

JONI 11:17-37

  • YACO YANI O JISU NI SA TAKALI O LASARUSA

  • “VEIVAKATURI KEI NA BULA”

A biubiu mai Peria o Jisu qai gole sara i Pecani, dua na koro rauta ni rua na maile ena ceva kei Jerusalemi. Erau lolosi tiko o Meri kei Marica ni se qai takali ga na ganedrau o Lasarusa. Era mani gole yani e levu mera lai vakacegui rau.

E tukuni sara vei Marica ni sa voleka yani o Jisu, sega ni bera nona gole me lai tavaki koya. E tukuna vei Jisu na ka erau rairai vakasamataka voli vakaveitacini ena va na siga sa oti: “Turaga, ke oni a tiko eke, ke a sega ni mate o ganequ.” Sega ni kena ibalebale qori ni sega na inuinui i Marica ni a kaya: “Au kila ena gauna mada ga qo ni ka kece oni kerea vua na Kalou ena solia vei kemuni.” (Joni 11:21, 22) E vakabauta ni rawa ni cakava o Jisu e dua na ka vei ganena.

E sauma o Jisu: “Ena tucake tale na ganemu.” A nanuma o Marica ni vakaibalebaletaka tiko o Jisu na veivakaturi e vuravura ena gauna se bera mai, na inuinui e vakanamata kina o Eparama kei na so tale. E vakabauta o Marica ni na yaco dina, e kilai qori mai na ka e cavuta: “Au kila ni na tucake tale ena gauna ni veivakaturi ena iotioti ni siga.”​—Joni 11:23, 24.

Vakacava ena rawa ni cakava o Jisu e dua na ka ena gauna sara ga ya? E tukuna o Jisu vei Marica ni solia vua na Kalou na kaukaua me vakamalumalumutaki mate, ena nona kaya: “O koya e vakaraitaka ni vakabauti au, ke mani mate, ena bula tale. O koya tale ga e bula tiko qai vakaraitaka ni vakabauti au ena sega sara ni mate.”​—Joni 11:25, 26.

E sega ni tukuna tiko o Jisu nira na bula tu ga nona tisaipeli. A tukuna mada ga vei ratou na nona yapositolo ni na mate o koya. (Maciu 16:21; 17:22, 23) E vakabibitaka tiko ga nira na bula tawamudu o ira na vakabauti koya. Levu era na qai rawata qori nira sa vakaturi. Ia o ira na yalodina era bula donuya na icavacava ni ituvaki qo era na rairai sega sara ni mate. Se mani cava e yaco, mera vakadeitaka o ira na vakabauti Jisu nira na bula tawamudu.

Se qai cavuta oti ga o Jisu “o yau na vu ni veivakaturi kei na bula,” ia vakacava e rawa ni vakabulai Lasarusa ni sa vica tu na siga nona mate? E tarogi Marica o Jisu: “O vakabauta?” E sauma o Marica: “Io Turaga, au vakabauta ni o kemuni ga na Karisito na Luve ni Kalou, o koya ena lako mai vuravura.” E vakabauta o Marica ni rawa vei Jisu me cakava e dua na ka ena siga tiko ga ya, e mani vakatotolo i vale me lai tukuna vei tacina: “Sa tiko qo na Qasenivuli, e tarogi iko tiko.” (Joni 11:25-28) E biubiu sara mai vale o Meri ra qai muri koya eso tale nira nanuma ni gole ena ibulubulu i Lasarusa.

E gole ga o Meri vei Jisu, cuva sobu i yavana, e tagi qai cavuta na ka vata ga e kaya o tacina: “Turaga, ke oni a tiko eke, ke a sega ni mate o ganequ.” E tarai Jisu ni raica na nona tagi o Meri kei ira na ilala levu. E vusolo na lomana qai tagi. Nira raica qori o ira na tu e kea, era luluvu tale ga. Ia eso era taroga: “Na cava a sega ni tarova rawa kina o koya na nona mate na tamata qo ni a vakavuna mada me rai na mataboko?”​—Joni 11:32, 37.