Raica sara na lewena

Raica na lewenivola

 WASE 4

Bukete o Meri, ia e Sega ni Vakawati

Bukete o Meri, ia e Sega ni Vakawati

MACIU 1:18-25 LUKE 1:56

  • KILA O JOSEFA NI SA BUKETE O MERI

  • VAKAWATI O MERI KEI JOSEFA

Sa vula va na bukete i Meri. O se rairai nanuma tiko ni gauna se qai bukete kina, a lai sikovi Ilisapeci ena veidelana e Jutia. Ia qo sa lesu o Meri ina nona koro o Nasareci, sega ni dede era sa na kila na lewe ni nona koro ni sa bukete. Sa na leqataka mada ga na ituvaki qori!

E ikuri ni lomaleqa nodrau sa veimusumusuki tu o Meri kei na matai o Josefa me rau vakawati. E kila tale ga o Meri ni tukuni ena lawa ni Kalou vei ira na Isireli ni na vakaviriki mate na yalewa sa musuki tu vua e dua na tagane, qai veiyacovi kei na dua tale. (Vakarua 22:23, 24) A sega ni vakayacora o Meri na ivalavala tawakilikili, ia ena rairai veinanuyaka se na vakamacalataka vakacava vei Josefa na nona bukete kei na cava ena yaco.

Ni lako tu o Meri me vula tolu, macala ga ni na via raici koya sara ga o Josefa. Gauna rau sota kina, ena rairai tukuna vua o Meri na kena ituvaki qai saga ena nona vinaka taucoko me vakamacalataka ni a bukete ena vuku ni yalo tabu ni Kalou. Ia sa na dredre mada ga me ciqoma qai vakabauta o Josefa na itukutuku qori.

E kila o Josefa ni yalewa vinaka o Meri qai vinaka na kena irogorogo. Dua tale ga na ka na levu ni nona lomani koya. Ia se mani cava e tukuna, ena rairai vakasamataka ga o Josefa ni vakabuketetaki koya e dua tale na tagane. E sega ni vinakata o Josefa me vakaviriki mate se me vakamaduataki e matanalevu. Sa mani nanuma me sereki koya vuni. E rua erau veimusumusuki ena gauna ya e vaka ga rau sa vakamau, qai vinakati na veisere me muduki kina na veimusumusuki.

 Ni se vakananuma voli ga na veika qo o Josefa, e lutu sara nona moce. Sa qai rairai vua na agilosi i Jiova ena tadra qai kaya: “Kua ni rere ni kauti Meri na watimu i vale, ni gone e kunekunetaka tiko e cakacaka ni yalo tabu. Ena vakasucuma e dua na gonetagane, mo vakayacani koya o Jisu, ni na vakabulai ira nona tamata mai na nodra ivalavala ca.”​—Maciu 1:20, 21.

Ni yadra o Josefa, ena vakavinavinaka sara ga ni sa qai matata vua na ka e yaco vei Meri! E sega ni weletaka na ivakasala ni agilosi, e kauti Meri sara ina nona vale. Ni vakayacori qori e matanalevu, sa vaka ga na vakamau qai vakaraitaki kina ni rau sa vakawati o Josefa kei Meri. Ia a sega ni veiyacovi kei Meri o Josefa ena gauna a buketetaki Jisu voli kina.

Oti e vica na vula, erau vakavakarau o Josefa kei Meri sa bukete levu tu ena gauna ya me rau biuta nodrau koro o Nasareci. Me rau lako i vei ni sa voleka tu ni sucu o Meri?