Erau sega ni lesu i Nasareci o Josefa kei Meri, rau tiko voli ga e Peceliema. Ni sa siga walu o Jisu, erau cilivi koya me vaka e vakaroti ena Lawa ni Kalou vei ira na Isireli. (Vunau ni Soro 12:2, 3) E kena ivakarau tale ga me vakayacani na gonetagane lailai ena siga ya. Erau vakayacani luvedrau sara me o Jisu, me vaka ga e veidusimaki kina na agilosi o Keperieli.

Sa siga 40 o Jisu ni sa oti e dua vakacaca na vula nona sucu. Erau kauti koya sara nona itubutubu ina valenisoro mai Jerusalemi, vica ga na kilomita mai na vanua eratou tiko kina. E tukuni ena Lawa me cabora ena valenisoro o tina na isoro ni nona vakasavasavataki, ni oti e 40 na siga nona vakasucuma na luvena tagane.​—Vunau ni Soro 12:4-7.

E vakayacora qori o Meri. E kauta yani e rua na manumanu vuka lalai me nona isoro. Eda kila rawa e keri na nodrau bula vakailavo o Josefa kei Meri. E vakaroti ena Lawa me cabori e dua na luvenisipi tagane kei na dua na manumanuvuka. Ia ke sega ni rawata o tina e dua na sipi, e rawa ni cabora e rua na ruve se kukuru. E cabora gona qori o Meri ni sega ni ceguva rawa e dua na sipi.

Ni rau yaco yani ena valenisoro o Josefa kei Meri, e tavaki rau mai na kenaturaga o Simioni. Sa vakatakila oti vua na Kalou, ni bera ni mate ena raica mada na Karisito se Mesaia a yalataka o Jiova. E veidusimaki na yalo tabu me lako ena siga qori o Simioni ena valenisoro, lai sotavi ratou rawa kina na veitamani. E roqota sara na gone o Simioni.

Ni keveti Jisu o Simioni, e vakavinavinaka vua na Kalou: “Kemuni na Turaga Cecere Duadua, moni laiva na nomuni tamata me lako ena vakacegu me vaka na nomuni vosa, niu sa raici koya oni lesia me veivakabulai, oni vakarautaka e matadra na tamata kece, e rarama me vakararamataki ira na veimatanitu, mera lagilagi tale ga kina na nomuni tamata na Isireli.”​—Luke 2:29-32.

Erau kurabui ni rau rogoca qori o Josefa kei Meri. E vosa vakalougatataki rau o Simioni qai kaya vei Meri ni luvena tagane “ena vakavuna nodra bale kei na nodra tucake e levu e Isireli.” Na rarawa ena vakila kina ena vaka ga e curu basikati koya e dua na iseleiwau gata.​—Luke 2:34.

A tiko tale ga ena valenisoro ena siga qori na parofita yalewa o Ana, sa yabaki 84. E dau lako ina valenisoro e veisiga. Ni raici Josefa, Meri kei Jisu, e golevi ratou qai vakavinavinaka vua na Kalou. E tukuni Jisu tale ga vei ira kece era na rogoci koya.

Sa wacava nodrau marautaka o Josefa kei Meri na veika e yaco ena valenisoro! Io, na ka kece qori e vakadeitaka vei rau ni o luvedrau tagane na gone yalataki ni Kalou.