Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 98

Vaqara Rogo na Yapositolo

Vaqara Rogo na Yapositolo

MACIU 20:17-28 MARIKA 10:32-45 LUKE 18:31-34

  • PAROFISAITAKA TALE O JISU NA NONA MATE

  • ERATOU VAQARA ROGO NA YAPOSITOLO

Eratou takosova na Uciwai na Joritani volekati Jeriko o Jisu kei na nona tisaipeli me vakacavari kina nodratou ilakolako mai Peria i Jerusalemi. Era veitomani eso tale ena ilakolako qori ina Lakosivia ni 33 G.V.

E liu sara tiko o Jisu vei ratou na tisaipeli, ni via yaco ena korolevu ni bera na Lakosivia. Ia eratou rere na tisaipeli. Gauna e mate kina o Lasarusa qai vakarau biubiu mai Peria o Jisu me gole i Jutia, a tukuna o Tomasi vei ratou na vo ni tisaipeli: “Me datou lako tale ga me datou mate vata kei koya.” (Joni 11:16, 47-53) Sa rauta me ratou rere na tisaipeli ena ilakolako qo i Jerusalemi.

Me vakarautaki ratou na yapositolo ena veika sa tu mai liu, e kauti ratou vakatikitiki o Jisu qai kaya: “Tou sa lako cake tiko qo i Jerusalemi, ena lai soli na Luve ni tamata vei ira na iliuliu ni bete kei ira na vunivola. Era na tauca vua na itotogi mate era na soli koya vei ira na kai veimatanitu mera vakalialiai koya, kuitataki koya, qai vakamatei koya ena kau, ia ena vakaturi ena ikatolu ni siga.”​—Maciu 20:18, 19.

Qo na ikatolu ni gauna e tukuna kina vei ratou na nona tisaipeli o Jisu na nona mate kei na vakaturi. (Maciu 16:21; 17:22, 23) Ia sa qai vakamatatataka ni na vakamatei ena kau. Eratou vakarogoci koya tiko na tisaipeli, eratou sega ga ni kila na ibalebale ni nona vosa. De dua eratou nanuma ni na vakalesui mai vuravura na veiliutaki ni matanitu o Isireli, ni ratou via lagiti qai rokovi ena nodratou veiliutaki kei Karisito ena dua na matanitu e vuravura.

E maliwai ira voli na matailakolako qo o Salome, na tinadrau na yapositolo o Jemesa kei Joni. E vakatokai rau na yapositolo qori o Jisu ena dua na yaca e kena ibalebale “Luve ni Kurukuru,” ni rau dau yalokatakata. (Marika 3: 17; Luke 9:54) Erau sa dau vinakata voli mai na le rua qo me rau rogo ena Matanitu i Karisito. E kila tale tiko ga qori o tinadrau, mani lai raici Jisu, e cuva vua me kerea e dua na ka. E taroga o Jisu: “Na cava o vinakata?” E kaya na tinadrau na tisaipeli: “Ni vakadonuya mada me rau dabe ena nomuni Matanitu na luvequ, e dua ena yasamuni imatau kei na dua ena yasamuni imawi.”​—Maciu 20:20, 21.

Qori na nodrau kerekere o Jemesa kei Joni. Ni vakamacalataka oti ga o Jisu ni na vakamadualaki qai vakayacori vua na itovo lolovira, e kaya vei rau na le rua: “Drau sega ni kila na ka drau kerea. Vakaevei, e rawa ni drau gunu ena bilo au vakarau gunu kina?” Rau kaya vei Jisu: “Keirau rawa.” (Maciu 20:22) Erau se rairai sega tiko ga ni taura rawa na tisaipeli na ibalebale ni ka erau kerea.

E mani kaya vei rau o Jisu: “Drau na gunuva dina na mequ bilo, ia au sega ni lewa se o cei me dabe ena yasaqu imatau se yasaqu imawi, sa tiko ga o ira e vakarautaki me nodra me vaka sa lewa o Tamaqu.”​—Maciu 20:23.

Ni ratou rogoca na vo ni le tini na yapositolo na nodrau kerekere o Jemesa kei Joni, eratou katakatataki rau sara ga. De dua erau vosa doudou o Jemesa kei Joni ena nodratou a veibataka ena dua na gauna e liu na yapositolo se o cei e uasivi vei ratou. (Luke 9:46-48) Se mani cava e yaco, e laurai ena nodrau kerekere o Jemesa kei Joni ni ratou se sega ni muria na le Tinikarua na ivakasala i Jisu me baleta na vakamalumalumu. Eratou se vaqara rogo tiko ga.

E mani nanuma o Jisu me cakava e dua na ka ena ituvaki qo kei na yaloca sa laurai tiko ena kedratou maliwa na le Tinikarua. E kacivi ratou sara o Jisu qai vakasalataki ratou vakayalololoma: “Dou kila nira dau vakacolasau na iliuliu ni veimatanitu qai dau voravora na nodra veiliutaki na vetaicake. Mo dou kua ni va ya, ia o koya e via turaga vei kemudou me nomudou dauveiqaravi, o koya e via liu, me nomudou tamata cakacaka.”​—Marika 10:42-44.

Sa qai kaya o Jisu me ratou vakatotomuria nona ivakaraitaki: “A sega ni lako mai na Luve ni tamata me qaravi, ia me veiqaravi ga, me solia tale ga na nona bula me kedra ivoli e le levu.” (Maciu 20:28) E rauta ni tolu na yabaki nona veiqaravi voli mai o Jisu, ena cakava tiko qori me yacova sara nona vakamatei ena vukudra na kawatamata! E bibi mera vakatotomuri Karisito tale ga na tisaipeli, mera kua ni qaravi, ia mera veiqaravi. Mera kua ni vaqara rogo, ia mera vakamalumalumutaki ira.