Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 81

Duavata kei Tamana, ia e Sega ni Kalou

Duavata kei Tamana, ia e Sega ni Kalou

JONI 10:22-42

  • “KEIRAU DUAVATA KEI TAMAQU”

  • VAKACALA O JISU NONA BEITAKI NI KALOU

E gole e Jerusalemi o Jisu ena Soqo ni Vakatabui ni Valenisoro (se Hanukkah). Na soqo qo e vakananumi kina na kena vakatabui tale na valenisoro. A tara ena rauta na dua na senitiuri yani e liu na Tui Siria o Antiochus IV Epiphanes e dua na icabocabonisoro ena dela ni icabocabonisoro ni Kalou. Ni sa vagalalataki o Jerusalemi mai na nona lewa, sa qai vakatabui tale vei Jiova na valenisoro. E tekivu solevutaki tale ga e veiyabaki na soqo qori ena 25 ni vula o Chislev, e veitaudonui kei na icavacava ni Noveba kei na itekitekivu ni Tiseba.

E donuya tu qo na vulaililiwa, e lako voli o Jisu ena valenisoro ena varada i Solomoni. Era wavokiti koya na Jiu, era qai taroga: “Ena vakacava mada na dede ni neimami lomatarotaro tiko? Ke o Karisito, mo tukuna mai vakadodonu.” (Joni 10:22-24) E sauma o Jisu: “Au sa tukuna vei kemuni, oni qai sega ni vakabauta.” A sega ni tukuna vakadodonu o Jisu ni o koya na Karisito, me vaka e cakava vua na yalewa ni Samaria ena yasa ni toevu. (Joni 4:25, 26) Ia sa vakatakilai koya ena nona kaya: “Au a bula e liu qai muri sara o Eparama.”—Joni 8:58.

E vinakata o Jisu mera vakadeitaka vakataki ira na lewenivanua ni o koya na Karisito ena nodra vakatauvatana nona cakacaka kei na ka e parofisaitaki ena iVolatabu ni na cakava na Karisito. Qori na vuna e tukuna kina ena so na gauna vei ira nona tisaipeli mera kua ni tukuna vua e dua ni o koya na Mesaia. Ia qo e tukuna vakadodonu vei ira na Jiu dauveivorati: “E tukuni au na cakacaka au cakava tiko ena yaca i Tamaqu. Ia oni sega ni vakabauta.”—Joni 10:25, 26.

Na cava era sega ni vakabauta kina ni Karisito o Jisu? E kaya: “Oni sega ni vakabauta ni oni sega ni noqu sipi. Era rogoca na domoqu na noqu sipi, au kilai ira tale ga, ra qai muri au. Au solia vei ira na bula tawamudu, era na sega sara ni rusa, ena sega tale ga ni dua me na kaliraki ira mai ligaqu. Na sipi e solia vei au o Tamaqu e uasivia na ka kece.” Sa qai vakamacalataka o Jisu na nodrau veiwekani kei Tamana, e kaya: “Keirau duavata kei Tamaqu.” (Joni 10:26-30) Gauna e cavuta kina qori o Jisu, a se tiko e vuravura qai tiko mai lomalagi o Tamana. Kena ibalebale e sega ni tukuna tiko ni rau le dua ga kei Tamana, erau duavata ga ena inaki.

Na ka e tukuna o Jisu e vakacudrui ira na Jiu, era baci tomi vatu kina me vakaviriki mate. E sega ni rere o Jisu, e kaya: “E levu na cakacaka vinaka i Tamaqu au vakaraitaka vei kemuni. Na cakacaka cava oni via vakaviriki au kina?” Era sauma: “Keimami sega ni vakaviriki iko ena vuku ni cakacaka vinaka, ia ena nomu vosaveibeci, ni o . . . viavia kalou.” (Joni 10:31-33) A sega vakadua ni tukuna o Jisu ni kalou, ia na cava era beitaki koya kina?

E tukuna o Jisu ni tu vua na kaukaua era vakabauta na Jiu ni tiko ga vua na Kalou. Kena ivakaraitaki, e tukuna me baleti ira na “sipi”: “Au solia vei ira na bula tawamudu.” Qori e sega ni rawa ni cakava na tamata. (Joni 10:28) Sa vakamacalataka oti o Jisu ni o Tamana e solia vua na lewa kece qori, ia era sega ni taura rawa na Jiu.

E sabaya o Jisu nodra veibeitaki lasu ena nona taroga: “Vakaevei, e sega ni volai ena nomuni Lawa [ena Same 82:6], ‘Au a kaya: “Oni sa kalou”’? Ke vakatoka o koya mera ‘kalou’ o ira e tau vei ira na vosa ni Kalou . . . oni tukuna vakacava vei au, o koya e digitaka qai tala mai vuravura o Tamaqu, ‘O vosabeca na Kalou,’ niu tukuna niu ‘Luve ni Kalou’?”—Joni 10:34-36.

Na iVolatabu mada ga e vakatokai ira na turaganilewa era sega ni dau tauca vakadodonu na lewa mera “kalou.” Na cava gona mera beitaki koya kina na Jiu ni kaya “Niu Luve ni Kalou”? Sa qai vakamacalataka e dua na ka e dodonu me veisautaka nodra rai: “Keu sega ni cakava tiko na cakacaka i Tamaqu, ni kua ni vakabauti au. Ia keu cakava tiko na cakacaka i Tamaqu, oni qai sega ni  vakabauti au, ni vakabauta mada ga na cakacaka, moni qai kila sara kina ni duavata kei au o Tamaqu, au duavata tale ga kei Tamaqu.”—Joni 10:37, 38.

Nira rogoca qori na Jiu, era saga mera vesuki koya, ia e dro o Jisu. E biuti Jerusalemi e gole sara ena tai adua ni Uciwai na Joritani, a tekivu veipapitaisotaki kina o Joni ena va na yabaki yani e liu. Na vanua qori e rairai toka ena ceva ni Wasa o Kalili.

Era tabili vei Jisu na lewenivanua ra qai kaya: “E sega mada ga ni dua na cakamana e cakava o Joni, ia e dina kece na ka e tukuna me baleta na tamata qo.” (Joni 10:41) Era mani vakabauti Jisu e levu na Jiu.