Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 77

iVakasala i Jisu me Baleta na iYau

iVakasala i Jisu me Baleta na iYau

LUKE 12:1-34

  • VOSA VAKATAUTAUVATA NI TURAGA VUTUNIYAU

  • REVENI KEI NA LILI

  • LEWE NI MATANITU NA “QELENISIPI LAILAI”

Era wawa tu e tuba e vica vata na udolu ni kana tiko o Jisu ena nona vale na Farisi. Era dau cakava tale ga qori na ilala levu mai Kalili. (Marika 1:33; 2:2; 3:9) Era via raici Jisu e levu ena nona tiko voli e Jutia, mera rogoci koya tale ga. Ia era sega ni va qori na Farisi era tiko ena kanavata.

E vosa e liu o Jisu vei ratou na nona tisaipeli ena dua na ka me ratou qarauna: “Dou qarauni kemudou mai na nodra leveni na Farisi, ya na veivakaisini.” Sa veivakasalataki oti ena leqa qori o Jisu, ia e kila mai na ka e raica ena gauna ni kana ni sa qai bibi sara na ivakasala qori. (Luke 12:1; Marika 8:15) Era vakaraitaka na Farisi nira daulotu mera vunitaka kina nodra ivakarau ca. Ia e dodonu me vakavotui nira rawa ni veivakaleqai, mani kaya o Jisu: “E sega ni dua na ka e vunitaki matua me na sega ni vakatakilai, kei na ka lo me sega ni kilai.”—Luke 12:2.

De dua era kai Jutia e levu na lewenivanua era wavoliti Jisu tu, era se sega tale ga ni rogoca nona veivakavulici e Kalili. E mani tokaruataka na ka se qai cavuta oti ga. E uqeti ira kece na vakarorogo: “Dou kua ni rerevaki ira era vakamatea wale ga na yago, ra qai sega ni cakava rawa tale e dua na ka.” (Luke 12:4) E vakabibitaka o Jisu mera nuidei nona imuri ni na karoni ira na Kalou. E bibi tale ga mera vakabauta na Luve ni tamata ra qai nuidei ni na vukei ira na Kalou.—Maciu 10:19, 20, 26-33; 12:31, 32.

E tukuna sara e dua e maliwai ira tu na ilala levu na ka e kauai voli kina: “Qasenivuli, ni tukuna mada vua na tuakaqu me wasea mai na iyau e dodonu me noqu.” (Luke 12:13) E tukuni ena Lawa ni na rua nona ivotavota na ulumatua tagane, e sega ni dodonu gona me yaco na veileti. (Vakarua 21:17) Sa tiko rawa nona ivotavota na tagane e kerekere tiko vei Jisu, ia e rairai vinakata me soli tale vua eso na ka. E sega ni via veitovaki o Jisu, mani taroga: “O cei mada e lesi au meu turaganilewa se meu vota na iyau vei kemudrau?”—Luke 12:14.

E qai vakasalataki ira kece na vakarorogo o Jisu: “Ni yadra tiko, ni qarauni kemuni mai na ivakarau ni yalokocokoco kece, ke levu mada ga na ka e tu vua e dua, ena sega ni vakatau na nona bula ena veika e taukena.” (Luke 12:15) Se mani vakacava na levu ni ka e taukena e dua, ena biuta kece tu mai qori ena gauna e mate kina. E vakabibitaka qori o Jisu ena dua na vosa vakatautauvata guiguilecavi dredre, e vakaraitaka tale ga kina ni bibi me vinaka na keda irogorogo vua na Kalou:

“E vuavuaivinaka na nona were e dua na vutuniyau. Mani kaya lo e lomana, ‘Na cava mada meu cakava, sa sega na vanua meu maroroya kina na vua ni noqu were?’ E qai kaya, ‘Qo na ka au na cakava: Au na basuka na noqu lololo meu tara eso e levu cake me maroroi kina na noqu witi kei na noqu iyau kece, au na qai kaya: “Sa levu na noqu iyau me rauta na veiyabaki se bera mai, meu se tei vakacegu mada, meu kana, meu gunu, meu marau.”’ Ia e qai kaya vua na Kalou, ‘Sa dua na ka nomu sesewa, ena tarogi vei iko nomu bula ena bogi ga nikua. Ena qai nei cei na ka o binia?’ E vaka tale ga kina o koya e binia vakalevu na nona iyau, ia e sega ni vutuniyau ena mata ni Kalou.”—Luke 12:16-21.

Era rawa ni coriti na tisaipeli i Jisu kei ira na vakarogoci koya tiko mera qara se binia na iyau. E rawa tale ga ni vakalatilati ena nodra qaravi Jiova na ogataki ni bula ni veisiga. Sa qai tokaruataka o Jisu na nona ivakasala momona ena dua veimama na yabaki yani e liu ena iVunau ena Ulunivanua:

“Dou kua ni lomaocaocataka na nomudou  bula ena ka mo dou kania, se na yagomudou ena ka mo dou sulumaka. . . . Dou raici ira vinaka mada na reveni. Era sega ni kaburaka na sorenikau se tatamusuki, e sega tale ga na nodra lololo, ia e vakani ira na Kalou. Dou sega ni uasivi ira na manumanuvuka? . . . Dou vakasamataka na bula ni lili: Era sega ni cakacaka se tali, ia au kaya vei kemudou, na iukuuku kece i Solomoni e sega ni bau yacova na kedra totoka. . . . O koya gona, dou kua ni vakasaqara tiko ga na ka mo dou kania se gunuva, dou kua tale ga ni lomaocaoca, . . . sa kila tu na Tamamudou ni bibi vei kemudou na ka qori. . . . Dou vakasaqara tiko ga na nona Matanitu, ena qai vakarautaki vei kemudou na veika qo.”—Luke 12:22-31; Maciu 6:25-33.

O cei ena vakasaqara na Matanitu ni Kalou? E kaya o Jisu ni le lailai ga era na yalodina ni cakava qori, e dua ga na “qelenisipi lailai.” Ena qai kilai e muri nira le 144,000. Na cava ena soli vei ira? E vakadeitaka vei ira qori o Jisu: “Sa vakadonuya na Tamamudou me solia vei kemudou na Matanitu.” Era na sega ni kumuna na iyau vakavuravura e rawa ni butakoci. Ia na yalodra ena tiko ena “iyau mai lomalagi e sega ni oti rawa,” mera veiliutaki kei Karisito.—Luke 12:32-34.