Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 22

Gonedau ni Tamata e Va na Tisaipeli

Gonedau ni Tamata e Va na Tisaipeli

MACIU 4:13-22 MARIKA 1:16-20 LUKE 5:1-11

  • KACIVI RATOU NA TISAIPELI O JISU ME RATOU MURI KOYA VAKATABAKIDUA

  • GONEDAU NI TAMATA

Era via vakamatei Jisu na kainona, mani toki i Kapenaumi volekata na Wasawasa o Kalili, e dau vakatokai tale ga me “batinidrano o Kenisereti.” (Luke 5:1) Qori e vakayacori kina na parofisai i Aisea nira na raica na rarama levu na kai Kalili era toka e baravi.​​—Aisea 9:1, 2.

E lai vunautaka tiko ga e Kalili o Jisu ni “sa voleka na Matanitu vakalomalagi.” (Maciu 4:17) E sotavi ratou sara e va na nona tisaipeli o Jisu. Eratou dau tomani koya voli e liu, ia eratou lesuva na cakacaka vagonedau ni ratou lesu mai Jutia kei Jisu. (Joni 1:35-42) Sa vinakati qo me ratou muri Jisu vakatabakidua, me rawa ni vakavulici ratou ena cakacaka vakaitalatala eratou na tomana ni sa na yali.

Ni taubale voli e baravi o Jisu, e raici Saimoni Pita, na tacina o Adriu, kei na so nodrau itokani eratou vakavinakataka tiko na nodratou lawa. E golevi ratou sara yani, vodo ena waqa i Pita qai kerea me toso vakalailai i wai. Ni sa yawa vakalailai mai vanua, e dabe o Jisu qai vakavulici ira na ilala levu era tu e baravi me baleta na ka dina ni Matanitu ni Kalou.

Oti e kaya o Jisu vei Pita: “Toso mada yani i vanua titobu mo dou talaca na nomudou lawa me rawa mai kina eso na ika.” E tukuna sara o Pita: “Qasenivuli, keitou sa bau oca dina ena bogi taucoko keitou sega ni rawata e dua na ka, ia au na talaca na lawa me vaka oni tukuna.”​—Luke 5:4, 5.

Ni ratou talaca na lawa, e kabote sara ga na lawa ena levu ni ika e coko kina! Eratou yalovi ratou nodratou itokani ena waqa adua me ratou mai veivuke. E voleka tale ni luvu na waqa ruarua ni sa sinai ena levu ni ika. Ni raica o Pita na ka e yaco ya, e tekiduru qai kaya vei Jisu: “Ni biuti au Turaga, niu tamata ivalavala ca.” E kaya o Jisu: “Kua ni rere. Me tekivu qo o sa na qolivi ira na tamata.”​—Luke 5:8, 10.

E tukuna vei rau o Pita kei Adriu o Jisu. “Drau muri au, au na lesi kemudrau mo drau gonedau ni tamata.” (Maciu 4:19) E kaciva e rua tale na gonedau, o Jemesa kei Joni, na luvei Sepeti. Sega ni bera rau sa muri koya. Eratou isevu ni tisaipeli na le va qori, eratou biuta na cakacaka vagonedau me ratou muri Jisu vakatabakidua.