Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 29

Rawa na Caka Vinaka ena Siga ni Vakacecegu?

Rawa na Caka Vinaka ena Siga ni Vakacecegu?

JONI 5:1-16

  • VUNAU E JUTIA O JISU

  • VAKABULA E DUA NA TAUVIMATE

E vuavuaivinaka na nona vunau vagumatua e Kalili o Jisu. Ia e sega ni vakasamataki Kalili ga ni tukuna: “E dodonu meu tukuna tale ga na itukutuku vinaka ni Matanitu ni Kalou ena koro tale eso.” Oya na vuna e lai vunau kina “ena nodra valenilotu e Jutia.” (Luke 4:43, 44) E veiganiti qori ni sa donuya na vulaitubutubu, sa vakarau vakayacori e dua na solevu e Jerusalemi.

Sega ni vakamacalataki vakalevu ena Kosipeli na cakacaka i Jisu e Jutia, me vaka na nona cakacaka vakaitalatala e Kalili. Era sega ni kauai e levu e Jutia, ia e gumatua ni vunau o Jisu qai caka vinaka ena vanua kece e lakova.

E mua sara na ilakolako i Jisu ina koro rogo o Jerusalemi e Jutia, me lai tiko ena Lakosivia ni 31 G.V. Ena dua na vanua osooso volekata na Matamata ni Sipi, e tiko kina e dua na tobu levu ni sisili e vakatokai me Peceseita. Era dau gole yani ina tobu qori na tauvimate, mataboko, kei na lokiloki ni vakabauti era na vakabulai ke ra sili ena gauna e yavalati kina na wai.

E raica ena tobu qori o Jisu ena Siga ni Vakacecegu e dua na tagane sa 38 na yabaki nona tauvimate voli. E tarogi koya o Jisu: “O via bula?” E kaya na tagane: “Turaga, e sega ni dua me keveti au ina tobu ena gauna e yavalati kina na wai, niu se lako tiko, e liu tale vei au e dua.”​—Joni 5:6, 7.

Ena rairai kurabuitaka na tagane ya kei na so tale na nona kaya o Jisu: “Tucake, taura nomu idavodavo, mo lako.” (Joni 5:8) E bula vakasauri o tagane, e taura sara nona idavodavo, mai taubale yani!

Era sega ni marautaka na Jiu na ka totoka e yaco ya, era vakalelewa ga nira kaya: “E Siga ni Vakacecegu nikua, e tabu mo kauta tu va qori nomu idavodavo.” E kaya vei ira o tagane: “O koya ga e vakabulai au e kaya, ‘Taura nomu idavodavo mo lako.’” (Joni 5:10, 11) Era vakalewa na Jiu qori nona veivakabulai e dua ena Siga ni Vakacecegu.

Era tarogi tagane na ilala ya: “O cei e kaya vei iko, ‘Taura nomu idavodavo mo lako’?” Era via kila qori “ni sa curu maliwai ira na ilala levu” o Jisu, e sega tale ga ni kila na yaca i Jisu na tagane a vakabula. (Joni 5:12, 13) Ia rau qai sota ena dua tale na gauna kei Jisu ena valenisoro, sa qai kila na tagane qori se o cei a vakabulai koya ena tobu.

E gole tale vei ira na Jiu na tagane a vakabulai, me lai tukuna ni a vakabulai koya o Jisu. Era gole sara vei Jisu na Jiu. Vakacava era via kila se cakava rawa vakacava o Jisu na ka veivakurabuitaki qori? Sega. Era via vaqara cala ga mera beitaki Jisu kina ena nona caka vinaka ena Siga ni Vakacecegu. Era tusaqati koya tale ga!