Raica sara na lewena

Raica na lewenivola

 WASE 137

Rairai o Jisu ni Bera na Penitiko

Rairai o Jisu ni Bera na Penitiko

MACIU 28:16-20 LUKE 24:50-52 CAKACAKA 1:1-12; 2:1-4

  • RAIRAI O JISU VEI IRA E LEVU

  • LESU I LOMALAGI

  • SOVARAKI NA YALO TABU VEI IRA E RAUTA NI 120 NA TISAIPELI

Ni vakaturi oti o Jisu, e tuvanaka me ratou sota kei na 11 na nona yapositolo ena dua na ulunivanua e Kalili. Era tiko tale ga e kea rauta ni 500 na tisaipeli, eso vei ira qori era vakatitiqa e liu. (Maciu 28:17; 1 Korinica 15:6) Ia na ka e cavuta tarava o Jisu e vakadeitaka vei ira ni sa vakaturi dina.

E vakamacalataka o Jisu ni sa solia vua na Kalou na lewa kece mai lomalagi kei vuravura. E veiuqeti sara: “O koya gona, ni lako moni vakavulici ira na lewe ni veivanua kece ga mera noqu tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.” (Maciu 28:18-20) Sa vakaturi o Jisu, ia e se kauaitaka tiko ga na vunautaki ni itukutuku vinaka.

O ira kece na imuri i Jisu, ira na tagane, yalewa, kei na gone era vakaroti mera veivakatisaipelitaki. De dua era na saga na dauveitusaqati mera tarova nodra vunau kei na veivakavulici, e vakadeitaka kina vei ira o Jisu: “Sa soli vei au na lewa kece mai lomalagi kei vuravura.” Ena yaga vakacava qori vei ira na nona imuri? E kaya vei ira: “Raica, au tiko vata kei kemuni ena veisiga kece me yacova na ivakataotioti ni veika vakavuravura.” A sega ni tukuna o Jisu nira na cakamana kece o ira era vunautaka na itukutuku vinaka. Ena tokoni ira ga na yalo tabu.

Ni vakaturi o Jisu, e rairai vei ratou nona tisaipeli “ena loma ni 40 na siga.” E rairai ena yago vakayago qai ‘levu na ivakadinadina me vakaraitaka kina ni bula tiko,’ ena nona vakavulici ira ena “veika e baleta na Matanitu ni Kalou.”—Cakacaka 1:3; 1 Korinica 15:7.

Eratou se tiko voli mai Kalili na yapositolo, sa dusimaki ratou o Jisu me ratou lesu i Jerusalemi. Ni ratou soqoni vata tiko ena korolevu, e kaya: “Dou kua ni biuti Jerusalemi, dou waraka tiko ga na ka e yalataka o Tamaqu, me vaka dou rogoca vei au, ni a veipapitaisotaki ena wai o Joni, ia dou na papitaisotaki ena yalo tabu ni oti ga qo e vica na siga.”—Cakacaka 1:4, 5.

Ni soqoni tale kei ratou nona yapositolo o Jisu, e “kauti ratou yani me yaco sara i Pecani” ena baba tokalau ni Ulunivanua ni Veiolive. (Luke 24:50) Dua na ka na levu ni ka e vakamacalataka vei ratou o Jisu me baleta na vanua ena gole kina, ia ratou se nanuma tiko ga na yapositolo ni na tauyavutaki e vuravura na Matanitu ni Kalou.—Luke 22:16, 18, 30; Joni 14:2, 3.

Ratou tarogi Jisu na yapositolo: “Turaga, oni na vakalesuya tale na matanitu vei Isireli ena gauna qo?” E sauma vei ratou: “E sega ni nomudou mo dou kila na gauna kei na siga sa lokuca o Tamaqu ena nona lewa.” E vakabibitaka tale o Jisu na cakacaka me ratou cakava: “Dou na rawata na kaukaua ni sobuti kemudou na yalo tabu, dou na qai tukuni au e Jerusalemi, e Jutia taucoko, e Samaria, kei na veivanua yawa sara kei vuravura.”—Cakacaka 1:6-8.

Ni ratou se tiko kei Jisu ena Ulunivanua ni Veiolive na yapositolo, e tekivu gole cake i lomalagi o Jisu qai tabonaki koya sara na o mai matadratou. Ni vakaturi oti o Jisu, e rairai ena yago vakayago. Ia sa biuta tu mai na yago qori qai gole i lomalagi ena yago vakayalo. (1 Korinica 15:44, 50; 1 Pita 3:18) Ni ratou se raici Jisu tiko na yapositolo yalodina, e basika vakasauri e yasadratou “e rua na tagane erau vakaisulu vulavula.” Erau rairai yani ena yago vakayago, rau qai taroga: “Kemudou na kai Kalili, na cava dou wadrava tiko i macawa? O Jisu e kau tani cake vei kemudou qo i macawa ena lako mai ena sala vata ga dou raica ni kau cake kina i macawa.”—Cakacaka 1:10, 11.

Ni biuti vuravura o Jisu, e sega ni uvu na kena davui ratou qai raica ga nona imuri yalodina. Ena lesu mai o Jisu ena “sala vata ga” qori—ena sega  ni uvu na kena davui, o ira ga na nona imuri yalodina era na kila nona tiko me veiliutaki ena Matanitu ni Kalou.

Eratou lesu i Jerusalemi na yapositolo. Ena vica na siga tarava, ratou soqoni kei ira na vo ni tisaipeli, wili kina o “Meri na tinai Jisu kei ratou na taci Jisu.” (Cakacaka 1:14) Era sega ni cegu na masu, qai okati ena nodra qaqanimasu nona digitaki e dua na tisaipeli me isosomi kei Jutasa Isikarioti me ratou le 12 tale kina na yapositolo. (Maciu 19:28) Era vinakata me digitaki e dua e vakadinadinataka na cakacaka kei na vakaturi i Jisu. Qo na iotioti ni gauna e tukuni ena iVolatabu me caka kina na vakawirimadigi, me kilai kina na loma ni Kalou. (Same 109:8; Vosa Vakaibalebale 16:33) A digitaki qai “wili vata kei ratou na le 11 na yapositolo” o Mataiasi, a rairai dua vei ira na le 70 e tala o Jisu mera lai vunau.—Cakacaka 1:26.

Ni oti e tini na siga nona lesu i lomalagi o Jisu, e tekivu sara na Soqo ni Penitiko 33 G.V. Rauta ni 120 na tisaipeli era soqoni ena dua na tabavale e cake e Jerusalemi. E qai rogo vakasauri e dua na rorogo e vaka na cagi kaukaua e vakasinaita na lomanivale. E laurai na veika era vaka na yameyame ni buka ni lai toka vei ira kece na tisaipeli. Era tekivu vosataka na veimataqali vosa. Qori sara ga na veisobuti ni yalo tabu a yalataka o Jisu!—Joni 14:26.