A tiko me rua na siga o Jisu mai Samaria ni bera ni gole ina nona yasayasa. Dua na ka nona vunau mai Jutia, ia e sega ni lesu i Kalili me lai vakacegu. Sa qai lai gumatua sara na vunau ena vanua a susugi kina. E kila o Jisu ni na sega ni taleitaki e keri ni a tukuna “ni sega ni rokovi na parofita ena nona vanua.” (Joni 4:44) Eratou biuti koya na nona tisaipeli, ratou lesu ina nodratou dui vuvale kei na nodratou cakacaka e liu.

Na itukutuku cava e vunautaka sara o Jisu? “Sa voleka na Matanitu ni Kalou. Ni veivutuni, ni vakabauta na itukutuku vinaka.” (Marika 1:15) Na cava era cakava na lewenivanua? Era ciqomi Jisu e levu na kai Kalili ra qai rokovi koya. Era sega ni cakava ga qori ena vuku ni nona itukutuku. Ena vica na vula yani e liu, era tiko mai Jerusalemi eso na kai Kalili ra qai raica na cakamana i Jisu.​—Joni 2:23.

E tekivuna e vei o Jisu na nona cakacaka vakaitalatala e Kalili? Kena irairai e Kena, a vukica kina ena dua na gauna na wai me waini ena magiti ni vakamau. Ni tiko voli mai kea ena ikarua ni gauna qo, e rogoca o Jisu ni davo bibi tiko e dua na gonetagane, sa voleka ni mate. Qori na luvena na vakailesilesi i Eroti Anitipasa, na tui a vakarota me tamusuki na ului Joni na Dauveipapitaisotaki. Ni rogoca na turaga qo ni sa biubiu mai Jutia o Jisu sa tiko e Kena, e biubiu mai na nona itikotiko e Kapenaumi me lai vaqarai Jisu e Kena. E rarawa vakalevu na vakailesilesi, mani vakamasuti Jisu: “Turaga, ni lako sobu mada mai ni bera ni mate na luvequ.”​—Joni 4:49.

E rairai kurabuitaka na turaga qori na nona tukuna o Jisu: “Lako, sa bula na luvemu.” (Joni 4:50) E vakabauti Jisu na vakailesilesi i Eroti qai lesu i vale. Era mai tavaki koya na nona dauveiqaravi mera tukuna vua ni sa bula vinaka tale o luvena! E vaqaqa na vakailesilesi se rawa vakacava ya, mani tarogi ira: ‘Na gauna cava e bula vinaka kina?’

Era kaya: “Enanoa ena ikavitu ni aua, sa qai ruru kina nona katakata.”​—Joni 4:52.

E kila sara na vakailesilesi ni gauna sara ga ya e kaya kina o Jisu: “Sa bula na luvemu.” E turaga vutuniyau na vakailesilesi qori nira tu nona dauveiqaravi. A qai mai tisaipeli i Karisito kei ratou nona vuvale.

A cakamana vakarua mai Kena o Jisu, a vukica na wai me waini qai vakabula e dua na gonetagane mai na vanua yawa sara e tu kina, rauta ni 26 na kilomita. Eso tale na cakamana i Jisu, ia na nona veivakabulai e vakatakilakilataka ni sa lesu mai Kalili. E parofita dina ni Kalou o koya, ia vakacava ena ‘rokovi ena nona vanua’?

Ena qai kilai qori ni sa lesu ina nona koro o Nasareci. Na cava ena sotavi e kea?