Raica sara na lewena

Raica na lewenivola

WASE 55

Me Laukana na Lewe i Jisu qai Gunuvi Nona Dra

Me Laukana na Lewe i Jisu qai Gunuvi Nona Dra

JONI 6:48-71

  • LAUKANA NA LEWENA QAI GUNUVI NONA DRA

  • LEVU ERA TARABE RA QAI SEGA NI MURI KOYA

E tukuna o Jisu ena nona veivakavulici ena valenilotu mai Kapenaumi ni o koya na madrai dina mai lomalagi. Qori e ikuri ga ni nona ivakamacala vei ira na lewenivanua era lesu mai na tokalau ni Wasa o Kalili, era vakani ena madrai kei na ika.

E tomana o Jisu na veivosaki ni kaya: “Era kania na mana na tukamuni ena vanua talasiga, ia era sa mate tale.” Sa qai kaya: “O yau na madrai bula e lako sobu mai lomalagi. Ke dua e kania na madrai qo ena bula tawamudu, na madrai au na solia na lewequ ga, me bula kina o vuravura.”—Joni 6:48-51.

Ena vulaitubutubu ni 30 G.V., a tukuna o Jisu vei Nikotimo ni solia mai na Kalou na Luvena me iVakabula ena levu ni nona lomani vuravura. Sa qai vakabibitaka o Jisu me laukana na lewena, oya me vakaraitaka e dua ni vakabauta nona isoro. Qori na sala ena rawati kina na bula tawamudu.

Era sega ni duavata na lewenivanua kei na vosa i Jisu. Era taroga: “Ena solia vakacava na lewena o ka qo meda kania?” (Joni 6:52) E vinakata o Jisu mera kila ni ivakatakarakara ga na kena laukana na lewena, sega ni tukuni me caka dina. Sa qai kilai na ibalebale ni nona vosa ena ka e vakamacalataka tarava.

“Ke oni sega ni kania na lewe ni Luve ni tamata, moni gunuva tale ga na nona dra oni na sega ni bula. O koya e kania na lewequ, e gunuva tale ga noqu dra ena bula tawamudu, . . . ni kakana dina na lewequ qai ka ni gunu dina na noqu dra. O koya e kania na lewequ e gunuva tale ga noqu dra e duavata kei au.”—Joni 6:53-56.

Sa na vakacudrui ira mada ga na Jiu na ka era rogoca qori. De dua era na nanuma ni uqeta tiko o Jisu na veikanikani se me beci na lawa ni Kalou me baleta na laukana ni dra. (Vakatekivu 9:4; Vunau ni Soro 17:10, 11) Ia e sega ni tukuna o Jisu me laukana dina na lewena se gunuvi dina nona dra. E vakaraitaka tiko ga ni o ira kece era via bula tawamudu mera vakaraitaka nira vakabauta na nona isoro ena cabora kina na yagona uasivi qai liviraki kina na nona dra. Era sega mada ga ni kila e levu nona tisaipeli na ibalebale ni nona ivakavuvuli. Eso era kaya: “E dredre me vakabauti na vosa qo, o cei ena muria?”—Joni 6:60.

Ni kila o Jisu nira vosakudrukudru eso na nona tisaipeli, e taroga: “Oni tarabe ena ka qo? Ena vakacava ke oni raica na Luve ni tamata ni lako cake ena vanua a tiko kina e liu? . . . Na ka au tukuna vei kemuni e ka vakayalo, e vu ni bula tale ga. Ia eso vei kemuni era sega ni vakabauta.” Era biubiu e levu na tisaipeli, era sega tale ni muri Jisu.—Joni 6:61-64.

Sa qai tarogi ratou na 12 nona yapositolo o Jisu: “Dou via lako tale ga?” E sauma o Pita: “Turaga, me keitou qai lako tale vei cei? Na nomuni vosa ga e vosa ni bula tawamudu, keitou vakabauta, keitou kila tale ga ni o kemuni na Yalosavasava ni Kalou.” (Joni 6:67-69) E ivakaraitaki vinaka ni yalodina qori, ni ratou sega tale ga ni kila vinaka tu o Pita kei na vo ni yapositolo na ibalebale ni ka e vakavulica o Jisu!

E marautaka o Jisu na vosa i Pita, e kaya ga: “Au a digitaki kemudou na le tinikarua, se sega? Ia e dua vei kemudou e dau vakaucaca.” (Joni 6:70) E tukuni Jutasa Isikarioti tiko o Jisu. De dua sa kidava rawa o Jisu ni sa tekivu muri cala o Jutasa.

E marautaka o Jisu ni ratou muri koya tiko ga o Pita kei na vo ni yapositolo, ratou sega ni cegu ni vakaitavi ena cakacaka ni veivakabulai e cakava tiko.