Raica sara na lewena

Raica na lewenivola

 WASE 102

Vodoka i Jerusalemi na Tui na Luveniasa

Vodoka i Jerusalemi na Tui na Luveniasa

MACIU 21:1-11, 14-17 MARIKA 11:1-11 LUKE 19:29-44 JONI 12:12-19

  • CURU I JERUSALEMI O JISU ENA LAGILAGI

  • PAROFISAITAKI NONA RUSA O JERUSALEMI

Ena mataka ni Siga Tabu, ika9 ni Naisani, eratou biuti Pecani o Jisu kei na nona tisaipeli me ratou gole i Jerusalemi. Ni ratou volekati Pecifaki yani ena Ulunivanua ni Veiolive, e tukuna o Jisu vei rau na nona tisaipeli:

“Drau lako ina koro e tu mai ya, drau na raica sara e dua na asa e vesu tu kei na luvena. Drau sereka, drau kauta mai vei au. Ke dua e vosa kina, mo drau kaya, ‘E vinakata na Turaga.’ Ena solia mai o koya.”​—Maciu 21:2, 3.

Eratou sega ni kila na tisaipeli ni ivakasala ya i Jisu e umani tiko ena parofisai vakaivolatabu. Ia ratou qai kila e muri ni vakayacori kina na parofisai i Sakaraia. A parofisaitaka ni na curu i Jerusalemi na Tui yalataki ni Kalou ena “yalomalumalumu, e vodo tiko ena asa, ena luveniasa, na luve ni asa yalewa.”​—Sakaraia 9:9.

Ni rau yaco yani i Pecifaki na tisaipeli, rau sereka sara na luveniasa tagane kei na tinana. Era kaya vei rau na duri tu e kea: “Na cava drau sereka kina na luveniasa qori?” (Marika 11:5) Ia era laiva me rau kauta nira rogoca ni vinakata na Turaga o Jisu na manumanu. Erau tevuka na tisaipeli nodrau isulu e sau ena asa kei na luvena, ia e vodoka o Jisu na luveniasa.

Era tabili yani na ilala levu ena ilakolako i Jisu i Jerusalemi. E levu era tevuka na nodra isulu e gaunisala, eso tale era musu tabanikau “mai lomanivanua.” Era kacivaka: “Keimami masulaka me vakabulai! E kalougata o koya e lako mai ena yaca i Jiova! E kalougata na Matanitu i Tevita na tamada sa roro mai!” (Marika 11:8-10) Na itukutuku qori e vakacudrui ira eso na Farisi era maliwai ira voli na ilala levu. Era kaya vei Jisu: “Qasenivuli, bau vosa mada vei ira nomu tisaipeli.” E sauma o Jisu: “Au tukuna vei kemuni, ke ra galu qo, era na vosa na vatu.”​—Luke 19:39, 40.

Ni raici Jerusalemi o Jisu, e tagi qai kaya: “Ke o kila mada ga ena gauna qo na ka ena kauta mai na vakacegu​—ia qo era sa vunitaki mai matamu.” Ena totogitaki o Jerusalemi ni nakita nona talaidredre. E parofisaitaka o Jisu: “Era na viribaiti iko na kemu meca ena bai momoto. Era na tagavi iko, era na viribaiti iko mai na veiyasana kece. Era na botolaki iko kei ira na luvemu ina qele, ena sega tale ni vo vei iko na vatu e veitaqai.” (Luke 19:42-44) A yaco dina na vosa i Jisu ni vakarusai o Jerusalemi ena 70 G.V.

Ni curu yani o Jisu i Jerusalemi, ‘era maue na lewenikoro nira kaya: “O cei qo?”’ Era kaya tiko ga na ilala levu: “Qo na parofita o Jisu mai Nasareci e Kalili!” (Maciu 21:10, 11) Era maliwai ira tiko na ilala levu eso era raica nona vakaturi Lasarusa o Jisu, era talanoataka sara na cakamana qori. Nira kila na Farisi nira sega ni cakava rawa e dua na ka, era sa qai veikayaka ga: “Era sa muri koya na kai vuravura kece.”​—Joni 12:18, 19.

E gole ina valenisoro o Jisu me lai veivakavulici me vaka ga na nona ivakarau ni sikovi Jerusalemi. E vakabulai ira na mataboko kei na lokiloki. Era cudru na iliuliu ni bete kei na vunivola ena ka e cakava o Jisu, kei na nodra rogoci ira na gonetagane lalai nira kacivaka voli ena valenisoro: “Keimami masulaka me vakabulai na Luvei Tevita!” Era tarogi Jisu na iliuliu ni lotu: “O rogoca na ka era kacivaka tiko?” E sauma: “Vakaevei oni sega tale ga ni wilika qo, ‘Oni vakavuna me veivakacaucautaki na gusudra na gone lalai kei na gone dramidrami’?”​—Maciu 21:15, 16.

E veiraiyaki o Jisu ena loma ni valenisoro, oti e biubiu sara kei ratou na yapositolo ni sa yakavi mai na vanua. E lesu i Pecani ni bera na ika10 ni Naisani me lai moce kina ena Sigatabu.