Raica sara na lewena

Raica na lewenivola

 WASE 61

Vakabula o Jisu na Cauravou e Curumi Timoni

Vakabula o Jisu na Cauravou e Curumi Timoni

MACIU 17:14-20 MARIKA 9:14-29 LUKE 9:37-43

  • BIBI ME KAUKAUA NA VAKABAUTA

Ni ratou siro mai na ulunivanua o Jisu, Pita, Jemesa, kei Joni, eratou sotava sara e dua na ilala levu. Era wavoliti ratou na tisaipeli na vunivola ra qai veiba tiko kei ratou. Era marau vakalevu na lewenivanua nira raici Jisu, era mani cici yani mera kidavaki koya. E taroga sara o Jisu: “Na cava oni veiba tiko kina kei ratou?”—Marika 9:16.

E torovi Jisu yani e dua na tagane, e tekiduru qai kaya: “Qasenivuli, au kauta mai vei kemuni na luvequ tagane ni curumi koya tiko e dua na yalo velavela e galu. Ena gauna e curumi koya kina, e bitalaki koya ina qele, e vuso na gusuna qai dau katibati, oti sa qai malumalumu tu yani. Au kerei ratou nomuni tisaipeli me ratou vakasava na timoni, ia eratou sega ni rawata.”—Marika 9:17, 18.

Era rairai vakalewai ratou na tisaipeli na vunivola qai vakasewasewani ratou ni guce nodratou sasaga me ratou vakabula na cauravou. E sega ni vosa vua na tama e rarawa tu o Jisu, ia e kaya vei ira na ilala levu: “Isa na itabatamata sega ni vakabauta qai yalovakatani, me vakacava na dede ni noqu tiko vata kei kemuni? Me vakacava na dede ni noqu vosoti kemuni?” E vagolei sara tiko ga vei ira na vunivola na ivakasala qori, era dau vakatubuca vei ratou nona tisaipeli ni dau yali. Sa qai vuki vua na tama e rarawa tu, e kaya: “Kauti koya mai vei au.”—Maciu 17:17.

Ni volekati Jisu yani na cauravou, e cuquraki koya ina qele na timoni e curumi koya tu, e bitabitalaki koya, qai vuso na gusuna ni veiqiqiyaki voli. E taroga o Jisu: “Sa dede na kena yacovi koya tiko na ka qo?” E sauma o tama: “Io, tekivu ga ni se gone, e dau kolotaki koya vakalevu ina bukawaqa kei na wai me vakamatei koya.” E vakamamasu na tamai cauravou: “Ke oni rawa ni cakava kina e dua na  ka, ni lomani keirau, ni vukei keirau.”—Marika 9:21, 22.

Ni ratou sega ni vakabulai cauravou rawa na tisaipeli i Jisu, sa vaqara eso tale na sala o tama me bula kina o luvena. E vakayaloqaqataki koya o Jisu ni kaya: “O taroga tiko ‘Ke oni rawa ni cakava’? E sega ni dua na ka e dredre vei koya e vakabauta.” E kacivaka yani ena gauna vata ya na tamanigone: “Au vakabauta! Yalovinaka ni vukei au meu vaqaqacotaka tale noqu vakabauta!”—Marika 9:23, 24.

E raica o Jisu nira sa tabili yani vua na ilala levu. Nira rai kece tu, sa qai vunauca na yalovelavela: “O iko yalo velavela galu qai didivara, au vakaroti iko mo biuti koya, kua tale ni lesu vua!” Oti nona qoqolou kei na nona cuquraki koya tale vakavica, e lako tani vua na timoni, sa qai davo cibaciba tu o gonetagane. Nira raica qori, era kaya e levu: “Sa mate!” (Marika 9:25, 26) Ia e taura na ligana o Jisu qai vakaduri koya, e “bula na gone ena gauna vata ya.” (Maciu 17:18) Era kurabuitaka sara ga na lewenivanua na ka e cakava o Jisu.

Ni talai ratou e liu na tisaipeli o Jisu me ratou lai vunau, eratou rawa ni vakasava na timoni. Qo ni ratou sa tiko ga vakataki ratou ena dua na vale, eratou tarogi Jisu sara: “Na cava keitou sega ni vakasava rawa kina na timoni ya?” E vakamacalataka o Jisu ni lailai nodratou vakabauta, e kaya: “Na masu ga ena vakasavi rawa kina na timoni va ya.” (Marika 9:28, 29) E bibi me kaukaua na vakabauta, me masuti tale ga na kaukaua ni Kalou me vakasavi kina na timoni.

E tinia o Jisu: “Au tukuna vakadodonu vei kemudou, ke vaka mada ga na levu ni sore ni musita na nomudou vakabauta, dou rawa ni kaya ina ulunivanua qo, ‘Toki i kea,’ ena toki dina. Sega ni dua na ka ena dredre vei kemudou.” (Maciu 17:20) E vakasakiti dina na ka e rawa ni cakava na vakabauta!

Na ituvaki dredre e dau vakataotaka na noda qaravi Jiova ena rairai vaka e dua na ulunivanua, e sega ni taqei se wali rawa. Ia eda rawa ni vosota na ituvaki dredre va qori ke tiko vei keda na vakabauta.