Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 1

Rua na iTukutuku ni Kalou

Rua na iTukutuku ni Kalou

LUKE 1:5-33

  • PAROFISAITAKA NA AGILOSI O KEPERIELI NA SUCU I JONI NA DAUVEIPAPITAISOTAKI

  • TUKUTUKU VEI MERI O KEPERIELI ME BALETA NA SUCU I JISU

Eda kila ni iVolatabu taucoko e nona itukutuku na Kalou. E vakarautaka na Tamada vakalomalagi meda vakavulici kina. Ia meda raica mada e rua na itukutuku bibi a vakasavui ena sivia na 2,000 na yabaki sa oti. A kacivaka qori o Keperieli, e dua na agilosi e “dau tiko ena mata ni Kalou.” (Luke 1:19) Na ituvaki cava a vakasavuya kina na agilosi na itukutuku bibi qori?

A vakasavuya o Keperieli na imatai ni itukutuku ena rauta na yabaki 3 B.G.V. E tiko voli ena veidelana e Jutia, volekati Jerusalemi o Sakaraia e dua na bete i Jiova. Rau sa qase sara kei na watina o Ilisapeci rau qai sega ni vakaluveni. Ni lai veiqaravi vakabete ena dua na siga o Sakaraia ena valenisoro ni Kalou mai Jerusalemi, e rairai vakasauri vua volekata na icabocabo ni ka boi vinaka o Keperieli.

E rere sara ga o Sakaraia. Ia e vakacegui koya o Keperieli ni kaya: “Kua ni rere Sakaraia, sa rogoci na nomu masu, ena vakasucuma na watimu o Ilisapeci e dua na luvemu tagane, mo vakayacani koya o Joni.” E tukuna tale o Keperieli ni na “talei sara . . . ena mata i Jiova” o Joni, ena ‘vakarautaki ira na tamata mera nei Jiova.’​—Luke 1:13-17.

E sega ni vakabauta qori o Sakaraia ni rau sa qase kei Ilisapeci. Sa qai tukuna vua o Keperieli: “O na galu, o na sega ni vosa me yaco mada na ka kece qo, ni o sega ni vakabauta na ka au tukuna.”​—Luke 1:20.

Era veinanuyaka o ira na tiko e tuba se cava sa rui dede kina o Sakaraia. Ni curu mai tuba sa sega ni vosa rawa, sa vosa ga vagalu. Macala ga ni a raica e dua na ka vakatubuqoroqoro ena valenisoro.

Ni veiqaravi oti ena valenisoro o Sakaraia, e lesu i nodratou. Sega ni dede sa bukete o Ilisapeci! E vula lima nona vunitaki koya voli e vale o Ilisapeci ni waraka tiko nona vakasucu.

E vakasavuya na ikarua ni itukutuku o Keperieli vua na goneyalewa o Meri, e vakaitikotiko ena vualiku kei Jerusalemi, ena yasayasa o Kalili, ena koro o Nasareci. Na cava e tukuna vua na agilosi? E kaya: “Sa vakadonui iko na Kalou.” E kaya tale vei Meri: “Raica! O na bukete, o na vakasucuma tale ga e dua na gonetagane, qai vakayacani koya o Jisu.” E tomana o Keperieli: “Ena dokai o koya, ena vakatokai me Luvei koya e Cecere Duadua . . . ena lewa vakatui ena vuvale i Jekope me tawamudu, ena sega ni mudu na nona Matanitu.”​—Luke 1:30-33.

Sa na ka dokai mada ga vei Keperieli me vakasavuya na itukutuku e rua qo. Nida wilika e levu tale na ka me baleti rau o Joni kei Jisu, eda na kila na vuna e bibi kina na itukutuku e rua qo mai lomalagi.