Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 26

“Sa Vosoti na Nomu iValavala Ca”

“Sa Vosoti na Nomu iValavala Ca”

MACIU 9:1-8 MARIKA 2:1-12 LUKE 5:17-26

  • VOSOTA O JISU NONA CALA NA PARALASI QAI VAKABULAI KOYA

E tete e veivanua na itukutuku kei Jisu. Levu era gole mai vakayawa mera rogoci koya, mera raica tale ga nona cakacaka veivakurabuitaki. Oti e vica na siga e lesu o Jisu i Kapenaumi, na vanua e dau tiko kina vakalevu. E tete totolo ena korolevu qori ena baravi kei Kalili na itukutuku ni sa lesu yani. Era mani gole e levu ina vale e tiko kina. Eso vei ira qori era Farisi, era qasenivuli ni lawa mai na koro kece e Kalili, Jutia, kei Jerusalemi.

“Ra baci tabili yani na lewenivanua, e osodrigi na vale bau lai yaco sara i katuba, sa qai tekivu vunautaka vei ira na itukutuku vinaka.” (Marika 2:2) Sa vakarau yaco e dua na ka vakatubuqoroqoro. Qori ena vakadeitaka ni tu vei Jisu na kaukaua me kauta laivi na ka e vakararawataka tu na kawatamata ra qai bula vinaka tale o ira kece e via vakabula.

E osodrigi na vale e veivakavulici tiko kina o Jisu, ratou laveta sara yani e dua na paralasi e va na tagane. Eratou vinakata me vakabula o Jisu nodratou itokani. Ia ratou sega ni “kauti koya rawa vei Jisu” ena vukudra na ilala levu. (Marika 2:4) Sa wacava nodratou rarawa! Eratou mani kaba i delanivale, eratou basuka, ratou qai vakalutulututaka sobu na tavata e davo toka kina na paralasi.

Vakacava e cudru o Jisu ni vakasosani? Sega! E qoroya dina nodratou vakabauta qai kaya vua na turaga paralasi: “Sa vosoti na nomu ivalavala ca.” (Maciu 9:2) E rawa dina ni vosota na ivalavala ca o Jisu? Era veiletitaka qori na vunivola kei na Farisi ra qai kaya: “Na cava e kaya tiko o ka qo? E vosabeca na Kalou! E sega tale ni dua e rawa ni vosota na ivalavala ca, na Kalou duadua ga.”​—Marika 2:7.

Ni kila o Jisu na ka era veinanuyaka, e kaya vei ira: “Na cava oni veinanuyaka tiko kina na ka kece qo e lomamuni? I vei e rawarawa me tukuni vua na paralasi, ‘Sa vosoti na nomu ivalavala ca,’ se me tukuni, ‘Tucake, taura nomu idavodavo, lako’?” (Marika 2:8, 9) Io, e rawa ni vosota o Jisu nona ivalavala ca na turaga qori ena vuku ni isoro ena qai cabora malua.

Sa qai vakaraitaka o Jisu vei ira na ilala levu kei ira na dau vakalewai koya ni tu vua na lewa me vosota na ivalavala ca e vuravura. E vakarota na tagane paralasi: “Au tukuna vei iko, tucake, taura nomu idavodavo, lako i nomu vale.” E tucake sara o koya, taura nona idavodavo qai taubale yani e matadra na tu e kea. Era kurabui na lewenivanua! Era vakalagilagia na Kalou nira kaya: “Eda se sega ni bau raica e dua na ka va qo”!​—Marika 2:11, 12.

E vakavure vakasama ni sema o Jisu na ivalavala ca kei na tauvimate, na vosoti ni ivalavala ca ina bulabula vakayago. E tukuna na iVolatabu ni a valavala ca na imatai ni noda itubutubu o Atama qai dewavi keda kece mai na kena revurevu, oya na tauvimate kei na mate. Ia ena veiliutaki ni Matanitu ni Kalou, ena vosota o Jisu na nodra ivalavala ca o ira kece era lomana ra qai qarava na Kalou. Sa na qai kau laivi kina vakadua na tauvimate.​—Roma 5:12, 18, 19.