Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 48

Cati e Nasareci

Cati e Nasareci

MACIU 9:27-34; 13:54-58 MARIKA 6:1-6

  • VAKABULA O JISU NA MATABOKO KEI NA GALU

  • CATI E NASARECI

E osooso dina o Jisu. A soko mai na Tikapoli, a vakabula na yalewa e lako tu ga vua na dra, vakaturi luvei Jairo tale ga. Sega ni kena ibalebale ni sa oti e kea na ka e cakava o Jisu. Ni biubiu mai na vale i Jairo o Jisu, erau muri koya e rua na mataboko rau qai kacivaka: “Ni lomani keirau, Luvei Tevita.”​—Maciu 9:27.

Nodrau vakatokai Jisu me “Luvei Tevita” e vakaraitaka ni rau vakabauta ni Mesaia o Jisu, ena soli vua na idabedabe vakatui i Tevita. E sega ni kauaitaka o Jisu nodrau vakamamasu, rairai e via raica ke rau na kerekere tiko ga. Qori sara ga na ka e yaco. Erau muri Jisu ina dua na vale e curu kina. Sa qai tarogi rau o Jisu: “Drau vakabauta niu rawa ni cakava na ka drau kerea?” Erau kaya ena nuidei: “Io, Turaga.” E tara sara na matadrau o Jisu qai kaya: “Me yaco na ka drau kerea ena vuku ni nomudrau vakabauta.”​—Maciu 9:28, 29.

Erau sa rai tale na tagane e rua! Me vaka ga e cakava o Jisu vei ira eso tale e liu, e vakaroti rau tale ga na tagane qo me rau kua ni talanoataka na ka e cakava. Ia ena levu ni nodrau marau, rau lai talanoa kina ena yasayasa kece ya.

Ni rau biubiu na le rua, e kau yani vei Jisu e dua na galu e curumi timoni. E vosa rawa tale na galu ni vakasava o Jisu na timoni. Era kurabuitaka qori na ilala levu, ra kaya: “Se sega ni bau laurai e dua na ka va qo e Isireli.” Era raica tale ga na cakamana qori na Farisi. Nira sega ni tukuna rawa e dua na ka, era beitaki Jisu tale ena nodra ile e liu: “O ka qori e vakasavi ira na timoni ena nona kaukaua na nodra iliuliu na timoni.”​—Maciu 9:33, 34.

E lesu o Jisu ina nona koro o Nasareci, ratou qai tomani koya na nona tisaipeli. Sa oti toka e dua na yabaki nona veivakavulici ena valenilotu mai kea. Era qoroya na lewenivanua na ka e tukuna, ia e muri era sega ni taleitaka na nona ivakavuvuli ra qai via vakamatei koya. Ena saga tale qo o Jisu me lai vukei ira na kainona.

E lako tale ena valenilotu ena Siga ni Vakacecegu me veivakavulici. Era kurabui e levu, era taroga: “E rawata mai vei na tamata qo na nona vuku kei na cakacaka veivakurabuitaki? E sega ni luve ni matai o koya? E sega ni yaca i tinana o Meri kei ratou na tacina o Jemesa, Josefa, Saimoni, kei Jutasa? Eratou tiko tale ga qo na ganena! E rawata ga mai vei na ka kece qo?”​—Maciu 13:54-56.

Era nanuma na lewenivanua ni o Jisu e vakataki ira ga. De dua era na vakasamataka se rawa vakacava ni Mesaia ni a susu ga ena nodra yasayasa. Na levu ni vuku i Jisu kei na nona cakacaka veivakurabuitaki e ivakadinadina ni Mesaia, ia era cati koya na kai Nasareci. Era tarabe tale ga ena vukuna na wekana nira kilai koya vinaka, e kaya kina o Jisu: “E dokai na parofita ena veivanua kece, vakavo ga ena nona vanua kei na nona vuvale.”​—Maciu 13:57.

E kurabuitaka o Jisu nira sega ni vakabauta. E sega ni cakamana kina e kea, “e tarai ira ga e vica na tauvimate ra qai bula.”​—Marika 6:5, 6.