Raica sara na lewena

Raica na lewenivola

 WASE 64

Bibi na Veivosoti

Bibi na Veivosoti

MACIU 18:21-35

  • VEIVOSOTI VAKAVITU?

  • DAUVEIQARAVI E SEGA NI VEIVOSOTI

Sa rogoca o Pita na ivakasala i Jisu me rau veivakameautaki na veileqaleqati ni rau tiko taurua ga. Ia e rairai via kila sara o Pita me cakava vakavica qori e dua.

E taroga kina: “Turaga, me valavala ca vakavica vei au na taciqu meu na vosoti koya tiko ga? Me vakavitu?” Era vakavulica eso na iliuliu ni lotu ni dodonu me veivosoti vakatolu e dua. De dua e nanuma kina o Pita ni sa totoka sara ke vosota “vakavitu” na tacina.—Maciu 18:21.

Ia e veisaqasaqa kei na ivakavuvuli i Jisu na nona katona e dua na cala e caka vua. E mani vakadodonutaki Pita o Jisu: “Au kaya vei iko, me kua ni vakavitu, ia me vaka77.” (Maciu 18:22) Kena ibalebale ena lako tu ga na veivosoti, e sega ni vakaiyalayala na gauna me vosoti tacina kina o Pita.

Sa qai vakamacalataka o Jisu vei Pita kei na so tale e dua na vosa vakatautauvata me vakabibitaka kina na veivosoti. Qori e baleta na dauveiqaravi a sega ni veivosoti me vaka na nona turaga. E vinakata na tui mera sauma nodra dinau na nona dauveiqaravi. E kau sara yani vua e dua na tagane e dinautaka e 10,000 na taledi [60,000,000 na dinari]. E sega ni sauma rawa nona dinau qori, mani vakarota na tui me volitaki o koya, na watina kei ratou na luvena me saumi kina nona dinau. Sa qai tekiduru na dauveiqaravi e mata i nona turaga qai vakamamasu: “Ni solia mada vei au na gauna, au na sauma kece vei kemuni na noqu dinau.”—Maciu 18:26.

E tubu sara ga nona loloma na tui, e vosoti nona dauveiqaravi qai bokoca na dinau a binia tu. Oti ga na ka e cakava vua na tui, erau sota sara na dauveiqaravi qori kei na dua tale nona itokani e dinautaka vua e 100 na dinari. E tauri koya, kidomoka qai kaya vua: “Sauma kece mai na nomu dinau.” Ia e tekiduru na nona itokani qai  vakamamasu: “Solia mada vei au na gauna, au na sauma kece vei iko na noqu dinau.” (Maciu 18:28, 29) Ia e sega ni veivosoti me vaka na tui na dauveiqaravi, e balati nona itokani e lailai sara nona dinau e valeniveivesu me yacova ni sa sauma kece nona dinau.

E tukuna sara o Jisu nira lai tukutuku vua na tui eso tale na dauveiqaravi era raica na ivakarau vakaloloma qo. E cudru sara ga na tui, e kaciva mai na dauveiqaravi qai kaya: “O iko na dauveiqaravi torosobu, au bokoca kece nomu dinau ni o mai vakamasuti au. E dodonu mo vosoti nomu itokani dauveiqaravi me vaka ga na noqu vosoti iko!” Na levu ni nona katakata na tui, e soli koya kina na dauveiqaravi a sega ni veivosoti vei ira na ivakatawa ni valeniveivesu me yacova ni sauma taucoko nona dinau. Sa qai tinia o Jisu: “Ena sega tale ga ni vosoti kemuni na Tamaqu mai lomalagi ke sega ni vu mai lomamuni na nomuni vosoti ira na tacimuni.”—Maciu 18:32-35.

Eda vulica e keri ni bibi meda dau veivosoti! Sa vosota na Kalou e levu noda cala. E lailai sara na cala cava ga era cakava vei keda na tacida vakayalo. E vosoti keda tale ga vakavica vata na udolu o Jiova, sega ni vakadua ga. Ke da cudruvaka mada ga e dua na ka me baleti ira na tacida, e dodonu ga meda veivosoti. Nanuma tiko, a vakavulica o Jisu ena iVunau ena Ulunivanua ni na ‘vosota na noda cala na Kalou ke da vosoti ira era cala vei keda.’—Maciu 6:12.