Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 8

Drovaka na iLiuliu Dauveivakatotogani

Drovaka na iLiuliu Dauveivakatotogani

MACIU 2:13-23

  • DRO MAI IJIPITA NA VUVALE I JISU

  • TOKITAKA NONA VUVALE I NASARECI O JOSEFA

E vakayadrati Meri o Josefa me tukuna vua e dua na itukutuku bibi. A se qai rairai ga vua ena tadra na agilosi i Jiova, e kaya: “Tucake, kauta na gone kei tinana, dro i Ijipita, qai lesu mai keu sa tukuna yani, sa na vakarau vaqara na gone o Eroti me vakamatea.”​—Maciu 2:13.

Eratou dro sara ena bogi o Josefa, Meri kei na luvedrau. E vinaka mada ga ni ratou dro totolo ni a qai kila o Eroti ni ratou vakaisini koya na dauraikalokalo. Eratou sega ni lesu vua me vaka e vakarota, ratou sa lesu ga ina nodratou vanua. Dua na ka nona cudru o Eroti. Ni se vinakata tiko ga me vakamatei Jisu, e vakarota kina mera vakamatei na gonetagane lalai kece era yabaki rua lako sobu e Peceliema kei na veiyasana voleka. E cakacakataka rawa na yabaki qori mai na nodratou ivakamacala na dauraikalokalo mai na Tokalau.

E vakadomobula nodra vakamatei na gonetagane lalai! Eda sega ni kila se vica na gonetagane era vakamatei, ia na nodra qoqolou kei na nodra tagiyaso na tina e vakayacori kina e dua na ka e parofisaitaka ena iVolatabu o Jeremaia na parofita ni Kalou.​—Jeremaia 31:15.

Eratou sa dro oti i Ijipita ena gauna qori o Josefa kei na nona veitinani, eratou se tiko voli ga mai kea. E rairai tale ena tadra ena dua na bogi vei Josefa na agilosi i Jiova qai kaya: “Tucake, kauta na gone kei tinana, lako ina vanua o Isireli, nira sa mate o ira era via vakamatea tiko na gone.” (Maciu 2:20) E vakadeitaka qori vei Josefa ni ratou sa rawa ni lesu vakavuvale ina nodratou vanua. Qori e vakayacori tale kina e dua na parofisai ena iVolatabu​—e kacivi mai Ijipita na Luve ni Kalou.​—Osea 11:1.

E vinakata o Josefa me ratou vakaitikotiko vakavuvale e Jutia, de dua volekata na tauni o  Peceliema eratou tiko voli kina ni bera nodratou dro i Ijipita. Ia e rogoca o Josefa ni sa tui tiko mai Jutia o Arikelo, na luvena tagane ca o Eroti. E vakasalataki Josefa tale ena dua na tadra o Jiova ena ituvaki rerevaki ya. Eratou mani gole vakayawa ina vualiku o Josefa kei na nona vuvale. Eratou lai vakaitikotiko sara ena korolevu o Nasareci ena yasayasa o Kalili, e sega ni veivakamuai kina na vakabauta vakaJiu. Qori na vanua e susugi kina o Jisu, qai vakayacori kina na parofisai ena iVolatabu: “Ena vakatokai me kai Nasareci.”​—Maciu 2:23.