Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 39

Kalouca na iTabatamata Qo

Kalouca na iTabatamata Qo

MACIU 11:16-30 LUKE 7:31-35

  • VUNAUCA ESO NA KORO O JISU

  • E VEIVUKE QAI VEIVAKACEGUI

E dau dokai Joni na Dauveipapitaisotaki o Jisu, ia vakacava nodra rai e levu me baleti Joni? “Na itabatamata qo,” e tukuna o Jisu, “era vakataki ira na gone era tiko ena makete, era kacivi ira na nodra icaba, era kaya, ‘Keimami uvuca vei kemuni na bitunivakatagi, ia oni sega ni meke, keimami tagiyaso ia oni sega ni rarawa.’”​—Maciu 11:16, 17.

Na cava e vakaibalebaletaka o Jisu? E vakamatatataka: “O Joni, e sega ni kana se gunu ia era kaya na tamata, ‘E tiko vua na timoni.’ Ia ni lako mai na Luve ni tamata e kana e gunu, era kaya, ‘Raica! E tamata daukana qai daugunu waini, era nona itokani na daukumuni ivakacavacava kei ira na ivalavala ca.’” (Maciu 11:18, 19) E Nasaraiti o Joni, e bula rawarawa ga qai sega ni gunu waini, ia era kaya na itabatamata ena gauna ya ni curumi yalo velavela. (Tiko Voli Mai na Lekutu 6:2, 3; Luke 1:15) Ni kana qai gunu vakarauta o Jisu me vakataki ira na vo ni lewenivanua, e beitaki ni cakava vakasivia. Sa levu ga nodra vakalelewa.

E vakatauvatana na itabatamata ya o Jisu vei ira na gone ena makete, era sega ni meke nira uvuca eso tale na gone na bitunivakatagi se rarawa nira tagiyaso eso tale. “Ia” e kaya o Jisu “ena kilai na vuku ena ka e cakava.” (Maciu 11:16, 19) Io, na ka erau “cakava” o Joni kei Jisu e vakadinadinataka ni lasu na ka erau beitaki kina.

Ni vakamacalataka oti o Jisu nodra sega ni vakarorogo na itabatamata, e vunauca sara na korolevu o Koresini, Peciseita kei Kapenaumi, na vanua a cakava kina na ka veivakurabuitaki. E kaya o Jisu ni rau rawa ni veivutuni na korolevu o Taia kei Saitoni mai Finaisi ke vakayacora kina na cakacaka veivakurabuitaki. E cavuti Kapenaumi tale ga na vanua e dau tiko kina vakalevu. Levu e kea era sega ni vakarorogo, qai tukuna vei ira o Jisu: “Ena lailai na cudru e tau vei Sotoma ena Siga ni Lewa, ena levu e tau vei kemuni.”​—Maciu 11:24.

E vakavinavinaka o Jisu vei Tamana, e vunia na ka dina vakayalo “vei ira na vuku kei na vuli vinaka,” e vakatakila ga vei ira na yalomalumalumu era vaka na gonelalai. (Maciu 11:25) E sureti ira qori o Jisu ni kaya: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu. E veivakacegui na noqu ivua, e mamada tale ga na noqu icolacola.”​—Maciu 11:28-30.

E veivakacegui vakacava o Jisu? E veivakaocai qai veivakabobulataki na ivakarau vakavanua era lavaka na iliuliu ni lotu mera muria na lewenivanua. Kena ivakaraitaki, sa rui kaukaua tale nodra lawa ni Siga ni Vakacecegu. Ia ni vakacegui ira o Jisu ena nona vakavulica na ka dina me baleta na Kalou, era galala kina mai na itovo vakavanua dukadukali. E vakacegui ira tale ga era yalolailai ena nodra veivakalolomataki na iliuliu vakapolitiki kei ira na lomabibitaka nodra ivalavala ca. Sa qai vakaraitaka vei ira o Jisu na sala e rawa ni vosoti kina nodra ivalavala ca ra qai veiyaloni kei na Kalou.

Era rawa ni yalataki ira vua na Kalou o ira kece na tu vakarau mera colata na ivua veivakacegui i Jisu, ra qai qarava na Tamada vakalomalagi e dauveinanumi qai dauyalololoma. E sega ni veivakaocai qori, ni sega ni icolacola bibi na ivakaro ni Kalou.​—1 Joni 5:3.