Raica sara na lewena

Raica na lewenivola

 WASE 86

Yali sa Qai Kune Tale

Yali sa Qai Kune Tale

LUKE 15:11-32

  • VOSA VAKATAUTAUVATA NI GONE CIDROI

A cavuta o Jisu na vosa vakatautauvata ni sipi kei na ilavo e yali ni se rairai tiko voli mai Peria ena tokalau ni Uciwai na Joritani. Eda vulica ena vosa vakatautauvata qori ni dodonu meda marautaka nona veivutuni e dua e valavala ca qai lesu vua na Kalou. Era vakalewai Jisu na Farisi kei na vunivola ni ciqomi ira na valavala ca. Vakacava era bau vulica e dua na ka na dauvakalelewa ena rua na vakatautauvata i Jisu? Era taura rawa na rai i Jiova me baleti ira na valavala ca era sa veivutuni? Sa qai cavuta o Jisu e dua na vosa vakatautauvata veiuqeti e vakabibitaki kina na lesoni qo.

E vakamacalataki ena vosa vakatautauvata e dua na tama e rua na luvena tagane. Na vosa vakatautauvata qo e baleti koya e gone. E dodonu mera vuli na Farisi, vunivola, kei ira na lewenivanua ena ka e tukuna o Jisu me baleti koya e gone ena vosa vakatautauvata. Ia me kauaitaki tale ga na ka e tukuna o Jisu me baleta na nodrau rai o tama kei na nona ulumatua. Koya gona, meda vakasamataki ratou kece na veitamani nida wilika tiko na vosa vakatautauvata i Jisu.

E tekivu o Jisu ena nona kaya: “E dua na turaga e rua tiko na luvena tagane. E kaya vei tamana o koya e gone, ‘Tamaqu, solia mada vei au na ivotavota ni yau e dodonu me noqu.’ Sa mani wasea vei rau na luvena na veika e taukena.” (Luke 15:11, 12) E se bula tiko o tamana, ia sa vinakata o gone me soli vua nona ivotavota me rawa ni lewa ga nona bula kei na veika e vakayagataka kina nona ivotavota.

E vakamacalataka o Jisu: “Oti e vica na siga, sa qai vakasosolo na luvena gone, e lako sara yani ina dua na vanua yawa. E lai vakasabusabutaka e kea nona iyau ena nona sa lai goleva e dua na ivakarau ni bula e torosobu sara.” (Luke 15:13) E sega ni dua na ka me leqataka e vale, ni lomani rau na luvena o tama qai karoni rau vinaka. Ia e biubiu o gone qai gole ina dua tale na vanua, e lai vakasabusabutaka e kea  nona iyau ena marau vakasisila. Sa qai veisau na ituvaki me vaka e tukuna tarava o Jisu:

“Ni sa oti vinaka sara ga nona iyau, sa qai tatara e dua na dausiga levu ena vanua taucoko, tekivu vakila o koya na leqa. Tini sara me sa lai bolea me veiqaravi vua e dua na lewenivanua e kea, oti sa dau talai i veikau me lai vakatawa vuaka. E mani garova voli na kedra kakana na vuaka, ia e sega ni dua e solia vua e dua na ka.”​—Luke 15:14-16.

Na Lawa ni Kalou e okata me manumanu tawasavasava na vuaka, ia qo sa vakatawa vuaka tu o gonetagane. Dua na ka nona walokai, mani kania na kedra na vuaka.c Ni sa sotava na leqa, sa qai “kilai yalona tale.” Cava sa qai cakava? E kaya e lomana: “Na kedra levu na tamata cakacaka nei tamaqu, era kana madrai e vo tale, ia o yau, au sa kolaiciba ena viakana! Au na tucake meu lesu vei tamaqu, au na kaya vua: ‘Tamaqu, au sa ivalavala ca i lomalagi, vei iko tale ga. E sega ni ganita meu vakatokai tale meu luvemu. Mo okati au ga meu nomu tamata cakacaka.’” E tucake sara me gole vei tamana.​—Luke 15:17-20.

Na cava ena cakava o tamana? Ena cudruvi luvena ni a biubiu mai vale? Ena dokadoka qai sega ni veiciqomi? Vakacava ke luvemu qori, cava o na cakava?

 KUNE TALE NA TAGANE A YALI

E vakamacalataka o Jisu na rai nei tama kei na ka e cakava: “Ni se yawa tu yani sa raici koya mai o tamana, e lomani koya sara ga. E cici yani, mokoti koya, qai reguca.” (Luke 15:20) De dua sa rogoca o tamana na vakasisila ni bula i luvena, ia e ciqomi koya ga. Era kaya na iliuliu ni Jiu nira kila ra qai sokaloutaki Jiova, ia vakacava era raica rawa ena vakatautauvata qo na nona rai na Tamada vakalomalagi me baleti ira na veivutuni? Era raica rawa ni ciqomi ira tale ga na veivutuni o Jisu?

Ni dau kauai o tama, e kila rawa mai na matararawa i luvena ni sa veivutuni. Ni vakaliuliu o tama me veikidavaki, e rawarawa kina ni tusanaka nona cala o gone. E tukuna o Jisu: “E qai kaya vei tamana: ‘Tamaqu, au sa ivalavala ca i lomalagi, vei iko tale ga. E sega ni ganita meu vakatokai tale meu luvemu.’”​—Luke 15:21.

Sa qai vakaroti ira nona dauveiqaravi o tamana: “Totolo, dou kauta mai e dua na isulu balavu, na ka vinaka duadua, dou vakasulumi koya kina, me dua na mama e ligana, me vakaivava tale ga na yavana. Me kau tale ga mai na luvenibulumakau tagane uro, dou vakamatea meda kana, meda soqo, ni a mate na luvequ qo, sa qai bula tale, a yali tu, sa qai kune tale.” Era sa qai “marau.”​—Luke 15:22-24.

Ia e tiko mai na iteitei na luvena qase. E tukuna o Jisu me baleti koya: “Ni sa voleka mai vale, e rogoca sara na ivakatagi kei na meke. E kaciva sara e dua na dauveiqaravi me taroga se cava e marautaki tiko. E sauma vua, ‘Sa lesu bula mai o tacimu, mani vakamatea o tamamu na luvenibulumakau tagane uro.’ E tuburi koya na cudru qai bese ni curu i vale. E lako mai tuba o tamana qai mai vakamasuti koya. E qai kaya vei tamana, ‘Raica! Vica vata na yabaki noqu qaravi iko tu, au sega ni beca vakadua nomu lewa, ia o sega ni solia mada ga vei au e dua na luve ni me meu kania vata kei ira noqu itokani. Ni yaco ga mai  na luvemu qo, a vakasabusabutaka na nomu iyau kei ira na saqamua, o vakamatea sara vua na luvenibulumakau tagane uro.’”​—Luke 15:25-30.

O cei era vaka na tuakai gone cidroi nira vakalewa nona dau lomani ira na tauvanua kei ira na valavala ca o Jisu? O ira na vunivola kei na Farisi. E cavuta o Jisu na vosa vakatautauvata qo nira vakalewai koya ni ciqomi ira na valavala ca. O koya e dau vakalewa nona yalololoma na Kalou, e dodonu me vakasamataka vakabibi na vosa vakatautauvata qo.

Sa qai tinia o Jisu nona vakatautauvata ena nona cavuta na vakamamasu nei tama vei luvena qase: “Luvequ, o dau tiko vata kei au e veigauna, na noqu iyau kece e nomu. E dodonu ga meda soqo, meda marau vakalevu ni a mate na tacimu qai bula tale, a yali tu sa qai kune tale.”​—⁠Luke 15:31, 32.

A sega ni vakamacalataka o Jisu na ka e vakayacora na tuakai gone cidroi. Ia ni oti na mate kei na vakaturi i Jisu, “era mai vakabauta tale ga e levu sara na bete.” (Cakacaka 6:⁠7) De dua era wili tale ga e keri o ira na rogoca na vosa vakatautauvata i Jisu me baleta na gone cidroi. Io, e rawa nira kilai yalodra tale, ra veivutuni qai lesu vua na Kalou.

Eda vulica na tisaipeli i Jisu ena vakatautauvata qori ni ka vakayalomatua meda maliwai ira tiko ga na dauveiqaravi ni Kalou, ena karoni keda kina na Tamada dauloloma qai vakarautaka na ka eda gadreva. Meda kua ni biubiu meda gole ina “dua na vanua yawa” se qara na marau vakasisila.

Dua tale na ka eda vulica, ke da gole tani mai na sala ni Kalou, e bibi meda yalomalumalumu meda lesu vua na Tamada me rawa ni vakadonui keda tale.

Eda vuli tale ga ena nona veiciqomi o tama kei na nona veivosoti, vaka kina nona sega ni veiciqomi se veivosoti na tuakai gone cidroi. E bibi meda dauveivosoti na dauveiqaravi ni Kalou, meda ciqomi ira era lakosese ia era sa veivutuni dina ra qai lesu ina ‘vale i Tamadra.’ Io, meda marautaka ni sa ‘bula tale na tacida a mate,’ a “yali tu, sa qai kune tale.”