Eratou marautaka na 12 na yapositolo nodratou cakacaka vakavunau e Kalili, ratou vakasavuya sara vei Jisu na “ka kece eratou cakava kei na nodratou veivakavulici.” Eratou oca, ia e sega na gauna galala me ratou kana kina nira se tabili tiko ga yani e levu, eso era sa lesu. E tukuna kina o Jisu: “Mai, datou lai vakacegu mada vakalailai ena dua na vanua lala.”—Marika 6:30, 31.

Eratou vodo sara ena dua na waqa, rairai volekati Kapenaumi, me ratou vakatikitiki ina dua na vanua lala, ena tokalau ni Uciwai na Joritani ena taudaku kei Peciseita. Ia e levu na lewenivanua era raica ni ratou sa lako, ra lai kila tale ga e levu nodratou sa biubiu. Era mani muri baravi, ni ratou sobu mai o Jisu era sa wawa tu.

Ni sobu yani o Jisu, e raica sara e dua na ilala levu, dua na ka nona lomani ira, nira vaka na sipi e sega na kena ivakatawa. Mani “vakavulici ira ena levu sara na ka” me baleta na Matanitu ni Kalou. (Marika 6:34) E vakabulai ira tale ga na “tauvimate.” (Luke 9:11) Ni sa yakavi mai, eratou tukuna vua na nona tisaipeli: “E vanua lala qo, sa kala tale ga na matanisiga, ni tukuna mada vei ira na ilala levu qo mera lako ina veikoro mera lai volia na kedra.”—Maciu 14:15.

E sauma o Jisu: “E sega ni yaga mera lako, dou vakani ira.” (Maciu 14:16) E kila o Jisu na veika ena vakarau cakava, e vakatovolei Filipi ena nona tarogi koya: “Ena lai voli mai vei na madrai mera kania o ira qo?” E tarogi o Filipi ni cavutu mai Peciseita. Ke voli mada ga na madrai, ena sega ni veirauti nira le 5,000 na tagane, qai rairai vakaruataki na iwiliwili qori ke ra wili tale ga kina na yalewa kei na gone! E sauma sara o Filipi: “Ke ra vakalalai mada ga, ena sega ni rauti ira na madrai e voli ena ruanadrau na dinari [dua na dinari e isau ni dua na tamata cakacaka ena dua na siga].”—Joni 6:5-7.

Me vakaraitaka ni rui dredre na nodra vakani na le levu, e tukuna sara o Adriu: “E tiko qo e dua na gonetagane e tiko vua e lima na madrai kei na rua na ika lalai. Ia ena rauti ira vakacava na ilala vakaitamera qo?”—Joni 6:9.

E veico vinaka tu na vanua ya ni sa vulaitubutubu, sa voleka tale ga na Lakosivia ni 32 G.V. Sa qai tukuna o Jisu vei ira nona tisaipeli mera dabe vakaiwasewase na lewenivanua mera ya50, mera ya100 tale ga. E taura na lima na ibuli madrai kei na rua na ika qai masu vua na Kalou. E tikitikica na madrai, e wasea na ika qai solia vei ratou na tisaipeli mera vota vei ira na lewenivanua. E kurabuitaki nira kana kece ra qai mamau!

E tukuna o Jisu vei ira nona tisaipeli: “Dou kumuna mai na tikitikina sa vo me kua ni maumau.” (Joni 6:12) Ni ratou kumuna na kakana e vo, eratou vakasinaita e 12 na basikete!