Raica sara na lewena

Raica na lewenivola

 WASE 53

iLiuliu e Lewa na Draki

iLiuliu e Lewa na Draki

MACIU 14:22-36 MARIKA 6:45-56 JONI 6:14-25

  • ERA VIA BULI JISU ME TUI

  • TAUBALE E WAI O JISU, VAKARURUYA NA CAGI

E tarai ira dina na lewenivanua na veivakani vakacakamana i Jisu. Era kaya ni “qo dina na Parofita e dodonu me lako mai vuravura,” na Mesaia, ena vinaka nona veiliutaki. (Joni 6:14; Vakarua 18:18) Era mani saga mera vesuki koya mera buli koya me tui.

E kila vinaka o Jisu na nodra inaki. E talaci ira na ilala levu, qai tukuna vei ratou na nona tisaipeli me ratou vodo tale i waqa. Me ratou gole i vei? Me ratou liu i Peciseita qai lako sara i Kapenaumi. Ia e lako o Jisu ina ulunivanua me lai masu taudua.

Ni sa voleka ni kida na mataka, e raica o Jisu ni sa tu e loma ni wasawasa na waqa. E uaua na wasawasa, e tataba na cagi, ratou qai ‘sasaga voce na yapositolo ena bula ni cagi e tadravi ratou.’ (Marika 6:48) Ni siro mai na ulunivanua o Jisu qai taubale yani vei ratou e delaniwai, sa “rauta e tolu se va na maile nodratou voce.” (Joni 6:19) E vaka me lako siviti ratou sara o Jisu, ratou mani qolouvaka: “Kemudou! Na cava qo!”—Marika 6:49.

E tukuna o Jisu: “Dou vakacegu! O yau ga qo, dou kua ni rere.” Sa qai kaya o Pita: “Turaga, ke o kemuni dina, ni vakarota meu lako yani vei kemuni e delaniwai.” E sauma o Jisu: “Lako mai!” E sobu sara mai waqa o Pita, e taubale yani vei Jisu e delaniwai. Ia e rere ni raica na bula ni cagi, mani tekivu dromu vakamalua. E kacivaka: “Turaga, vakabulai au!” E dodoka sara o Jisu na ligana me tauri Pita, qai kaya: “Sa rui lailai na nomu vakabauta, na cava o vakatitiqa kina?”—Maciu 14:27-31.

Ni rau vodo i waqa o Pita kei Jisu, e ruru sara na cagi ratou qai kidroataka qori na tisaipeli. Ia ke ratou a taura rawa “na ibalebale ni ibuli madrai,” nona vakani ira vakacakamana na vica na udolu, eratou na sega ni kurabuitaka na nona taubale e delaniwai kei na nona vakaruruya na cagi. Eratou sa qai cuva vua ratou kaya: “O kemuni dina na Luve ni Kalou.”—Marika 6:52; Maciu 14:33.

Eratou yaco sara yani ena bucabuca totoka qai bulabula o Kenisareti, ena ceva kei Kapenaumi. Eratou vakelea na waqa ratou lako i vanua. Nira kilai Jisu na lewenivanua, era veiciciyaki sara ina yasayasa kece ya mera kauti ira mai na tauvimate. Era vakabulai kece o ira na tara na tutu ni isulu e sau i Jisu.

Era sa qai liaca na ilala levu era vakadinadinataka na veivakani vakacakamana ni sa biubiu o Jisu. Ni kele mai na waqa lalai ni Taiperia, era vodo na lewenivanua mera lai vaqarai Jisu i Kapenaumi. Nira raici koya, era taroga: “Rapai, o lako mai ena gauna cava?” (Joni 6:25) E vunauci ira sara o Jisu, eda na qai dikeva malua na vuna e cakava kina qori.