Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 73

Dauloloma Dina na Kai Samaria

Dauloloma Dina na Kai Samaria

LUKE 10:25-37

  • RAWATI VAKACAVA NA BULA TAWAMUDU?

  • KAI SAMARIA DAULOLOMA

Era torovi Jisu e levu na Jiu ni volekati Jerusalemi yani. Era via vakarogoci koya eso, ia eso tale era via vakatovolei koya. E tarogi koya sara e dua e kila vinaka na Lawa: “Qasenivuli, na cava meu cakava meu bula tawamudu kina?”—Luke 10:25.

Sa kila rawa tu o Jisu ni sega ni via kila dina na turaga qori na isau ni taro. E rairai vinakata ga me tukuna o Jisu e dua na ka ena vakacudrui ira na Jiu. E siqema o Jisu ni sa tiko rawa nona rai na turaga ya, mani maqosataka nona ivakamacala me kilai kina nona nanuma.

E taroga o Jisu: “Na cava e volai ena Lawa? Na cava o wilika kina?” E kila na Lawa ni Kalou na turaga qo mani yavutaka mai kea nona isaunitaro. E cavuqaqataka na Vakarua 6:5 kei na Vunau ni Soro 19:18, e kaya: “‘Mo lomani Jiova na nomu Kalou ena lomamu taucoko, ena nomu vinaka taucoko, ena nomu kaukaua taucoko, kei na nomu vakasama taucoko,’ mo qai ‘lomana na kainomu me vaka nomu lomani iko.’” (Luke 10:26, 27) Vakacava e donu na isaunitaro ya?

E tukuna o Jisu vua na tagane: “Donu vinaka nomu isaunitaro, cakava tiko ga qori o na qai vakabulai kina.” E sega ni lomavakacegu na tagane ya ni sega ni vinakata me saumi wale ga nona taro. Ia e “via sakitaka ni tamata dodonu,” me tukuni vua ni donu nona rai kei na nona ivalavala vei ira eso tale. E mani taroga: “O cei sara mada na kainoqu?” (Luke 10:28, 29) E taro rawarawa ga qori, ia e titobu na kena ibalebale.

Era vakabauta na Jiu ni vosa “kainoqu” e baleti ira ga na muria na ivakarau vakaJiu, e vaka tale ga me tokona na vakasama qori na Vunau ni Soro 19:18. Ia e rawa ni kaya e dua na Jiu ni “cala” me veitokani kei na dua tale na matatamata. (Cakacaka 10:28) E nanuma gona na tagane qori kei na so na tisaipeli i Jisu nira yalododonu ke ra caka vinaka vei ira na kainodra era Jiu. Ia era sega ni caka vinaka vei ira na sega ni Jiu nira sega ni ‘kainodra.’

Ena vakadodonutaka vakacava o Jisu nona rai na tagane ya, ia me kua ni veivakacudrui na ka e tukuna? E talanoa sara o Jisu: “E biuti Jerusalemi e dua na turaga me gole sobu i Jeriko, e qai sotavi ira na daubutako. Era luvata na nona isulu qai mokulaki koya me voleka ni mate, ra qai lako yani.” E tomana o Jisu: “Donuya sara nona gole sobu yani ena gaunisala ya e dua na bete, ia ni raici koya, e vakatikitiki mani gole yani. E muri tale ga yani e dua na Livai, ia ni raici koya, se baci vakatikitiki. E gole sara mai e dua na kai Samaria. Ni raici koya, e tubu sara ga nona loloma.”—Luke 10:30-33.

E kila na tagane e talanoa tiko vua o Jisu nira vakaitikotiko mai Jeriko e levu na bete kei na Livai era veiqaravi ena valenisoro. Na ilakolako lesu mai na valenisoro e rauta ni 22 na kilomita na kena yawa, e vakarerevaki tale ga na sala era muria nira dau vuni tu e kea na daubutako. Ke sotava na leqa e dua na Jiu, e dodonu me rau veivuke na bete kei na Livai ni ratou kaivata. Ia erau sega ni cakava qori ena italanoa i Jisu. A veivuke ga e dua na kai Samaria, na matatamata sara ga era cata na Jiu.—Joni 8:48.

A vukea vakacava na Jiu e mavoa na kai Samaria? E kaya o Jisu: “E lako yani vua, livia na waiwai kei na waini ena nona mavoa, qai vadretitaka. Oti, e vakavodoka ena nona manumanu, qai kauti koya sara ina dua na burenivulagi me lai qaravi koya kina. Ena siga e tarava, e solia e rua na dinari vua na itaukei ni burenivulagi qai kaya: ‘Qaravi koya toka mada, ke lailai na ilavo qo, au na qai sauma niu lesu mai.’”—Luke 10:34, 35.

Ni sa talanoa oti na Qasenivuli Levu o Jisu, e dua sara nona taro vakavure vakasama: “O cei vei  ratou na le tolu qo o nanuma ni kainona na tagane e laumoku vei ira na daubutako?” E rairai sega ni via sauma vakadodonu qori o tagane ni a veivuke na “kai Samaria,” mani kaya ga: “O koya ga a yalololoma vua.” Sa qai vakamatatataka o Jisu na ka e vakabibitaki ena nona italanoa ena nona kaya: “Lako mo lai cakava tale ga qori.”—Luke 10:36, 37.

E iwalewale laulau dina ni veivakavulici qori! Ena rairai sega ni ciqoma na tagane ya ke tukuna ga vakadodonu vua o Jisu nira kainona tale ga o ira na sega ni Jiu, era na rairai sega ni ciqoma tale ga na vo ni Jiu. Ia ni vakayagataka o Jisu na italanoa era kila vinaka na vakarorogo na ka e vakamacalataki kina, e saumi vinaka sara ga kina na taro: “O cei sara mada na kainoqu?” E kainona dina e dua o koya e muria na ivakaro vakaivolatabu me dauloloma qai veikauaitaki.