Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 95

Veisere kei na Nodra Lomani na Gone

Veisere kei na Nodra Lomani na Gone

MACIU 19:1-15 MARIKA 10:1-16 LUKE 18:15-17

  • RAI NI KALOU ME BALETA NA VEISERE

  • ISOLISOLI NI BULA VAKADAWAI

  • BIBI MERA VAKATAKI IRA NA LALAI

Ni ratou biubiu mai Kalili o Jisu kei na nona tisaipeli, eratou takosova na Uciwai na Joritani kei na yasayasa vakaPeria ratou gole sara ina ceva. Sa vakamacalataka oti vei ira na Farisi o Jisu ena nona ilakolako e liu i Peria na lawa ni Kalou me baleta na veisere. (Luke 16:18) Era kauta cake tale mai na ile qori mera vakatovolei Jisu kina.

A kaya o Mosese ni rawa ni sereki e dua na yalewa ke raici vua “e dua na ka tawakilikili.” (Vakarua 24:1) E duidui na ka era vakabauta eso me yavu ni veisere. Eso era kaya ni rawa ni wili mada ga e keri na leqa lalai. Era mani taroga na Farisi: “E vakatarai vua na tagane me sereki watina ena dua ga na yavu e rawa?”​—Maciu 19:3.

E sega ni tokona na vakasama vakatamata o Jisu, e vakamacalataka ga vakamaqosa na inaki ni Kalou me baleta na vakawati. “Vakacava, oni sega ni wilika ni o koya e bulia na tamata mai na ivakatekivu e bulia na tagane kei na yalewa qai kaya, ‘Ena biuti tamana kei tinana o tagane me kabiti watina me rau sa na lewe dua ga?’ Erau na sega ni lewe rua tiko, erau sa na dua ga na yago. O koya gona, na ka sa vauca vata na Kalou me kua ni tawasea na tamata.” (Maciu 19:4-6) Gauna e tauyavutaka kina na Kalou na vakawati, sega ni tukuna e dua na yavu me rau veisere kina o Atama kei Ivi.

Era vaqara veiba sara na Farisi ena nodra tarogi Jisu: “Na cava e tukuna kina o Mosese me solia o tagane vei watina na ivola ni veisere qai vakatalai koya?” (Maciu 19:7) E kaya vei ira o Jisu: “Ena vuku ni nomuni lomaqa, a vakatara kina o Mosese moni sereki watimuni, ia a sega ni kena inaki mai na ivakatekivu.” (Maciu 19:8) Na “ivakatekivu” e cavuti e keri e sega ni gauna i Mosese, ia e dusia na gauna a tauyavutaka kina na Kalou na vakawati mai Iteni.

Sa qai vakabibitaka o Jisu: “Au tukuna vei kemuni, na tagane e sereka na watina qai vakawati tale e sa wili me veibutakoci ke sega ni veiyacovi tawadodonu [vaKirisi, por·neiʹa] o watina.” (Maciu 19:9) Kena ibalebale e yavu ga vakaivolatabu ni veisere na veiyacovi tawadodonu.

Eratou kaya sara na tisaipeli: “Ke va qori na vakawati, sa vinaka cake ga me kua na vakawati.” (Maciu 19:10) Me nanuma tiko gona o koya e via vakawati ni dodonu me dei na vakawati!

Ni vakamacalataka o Jisu na bula vakadawai, e kaya nira sega ni vakawati eso ni vakaleqai na yagodra nira se qai sucu. Eso era sega ni vakawati nira sele. Ia eso tale era lewai ira vinaka ra qai vakatulewataka mera kua ni vakawati me levu kina na gauna era vakayagataka ena veika e vauca na Matanitu ni Kalou. E uqeti ira na vakarorogo o Jisu: “Vei ira era rawata qo [bula vakadawai], mera cakava sara.”​—Maciu 19:12.

Era kau sara yani vei Jisu na lalai. Ia eratou cudruvi ira na lewenivanua na tisaipeli, eratou rairai sega ni vinakata me vakasosani o Jisu. E sega ni taleitaka qori o Jisu, mani kaya vei ratou: “Laivi ira na gone lalai mera lako mai vei au, dou kua ni tarovi ira, ni o ira va qo e nodra na Matanitu ni Kalou. Au tukuna vakadodonu vei kemudou, ni o koya e sega ni ciqoma na Matanitu ni Kalou me vaka e dua na gonelailai, ena sega sara ni curu kina.”​—Marika 10:14, 15; Luke 18:15.

Eda vulica e keri ni bibi meda yalomalumalumu qai tuberi rawarawa me vakataki ira na gone lalai ke da via vakarurugi ena veiliutaki ni Matanitu ni Kalou. E keveti ira na gone qai vosa vakalougatataki ira o Jisu ni lomani ira. E lomani ira tale ga va qori na “ciqoma na Matanitu ni Kalou me vaka e dua na gone lailai.”​—Luke 18:17.