Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 42

Vunauci Ira na Farisi o Jisu

Vunauci Ira na Farisi o Jisu

MACIU 12:33-50 MARIKA 3:31-35 LUKE 8:19-21

  • CAVUTA O JISU ‘NA IVAKATAKILAKILA I JONA’

  • ERA VOLEKA CAKE VEI JISU NA TISAIPELI

Era rawa ni vosavakacacataka na yalo tabu na vunivola kei na Farisi nira sega ni vakabauta ni vakasavi ira na timoni o Jisu ena kaukaua ni Kalou. Vakacava era ito ni Kalou se o Setani? E kaya o Jisu: “Ke oni kau vinaka, oni na vuataka ga na vua vinaka, ke oni kau ca, oni na vuataka na vua ca, ena kilai na kau ena vuana.”​—Maciu 12:33.

E vua vinaka nona vakasavi ira na timoni o Jisu, e ka vakalialia gona me tukuni ni cakava rawa ya ena vuku ni nona qaravi Setani. A tukuna o Jisu ena nona iVunau ena Ulunivanua ni kau vinaka ena vuataka ga na vua vinaka. Era vuataka kina na Farisi na vua ca nira beitaki Jisu vakailasu. E tukuna vei ira o Jisu: “Dou kawa ni gata batigaga, dou na sega ni cavuta rawa na vosa vinaka ni ca na lomamudou! Ni na cavuta ga na gusumudou na ka e sinai tu e lomamudou.”​—Maciu 7:16, 17; 12:34.

E kilai na ka e tu e lomada ena ka eda tukuna, e yavu tale ga ni noda lewai. E kaya kina o Jisu: “Au tukuna vei kemudou ni ka tawayaga kece e cavuta na tamata ena tarogi vua ena Siga ni Lewa, o na vakadonui se cudruvi ena vosa o cavuta.”​—Maciu 12:36, 37.

Era sega ni lomavakacegu na vunivola kei na Farisi ena cakacaka veivakurabuitaki i Jisu, era tukuna tale: “Qasenivuli, keimami vinakata moni vakaraitaka e dua na ivakatakilakila.” Se ra mani raica se sega na cakamana i Jisu, sa tu rawa e levu na ivakadinadina ni nona cakacaka. E rawa gona ni tukuna o Jisu vei ira nodra iliuliu na Jiu: “Era dau vaqara na ivakatakilakila na itabatamata ca era dauveibutakoci, ia ena sega ni vakaraitaki vei ira e dua na ivakatakilakila, na ivakatakilakila ga i Jona na parofita.”​—Maciu 12:38, 39.

E vakamatatataka sara vei ira o Jisu na ibalebale ni nona vosa: “Me vaka ni a siga tolu, bogi tolu o Jona ena kete ni ika vakaitamera, ena siga tolu, bogi tolu tale ga na Luve ni tamata ena lomaniqele.” A tilomi Jona e dua na ika levu, qai vaka ga e vakaturi ni lako mai tuba. E parofisaitaka tiko e keri o Jisu na nona mate kei na nona vakaturi ena ikatolu ni siga. Gauna e yaco kina qori, era cata na ‘ivakatakilakila i Jona’ nodra iliuliu na Jiu, era sega ni veivutuni se veisau. (Maciu 27:63-66; 28:12-15) Ia era veivutuni na “kai Ninive” ni vunau vei ira o Jona. Era vakadinadinataka kina na cala ni itabatamata qo. E kaya tale ga o Jisu ni na vakadinadinataka tale ga nodra cala na Ranadi ni Sipa ena ka e cakava. A via rogoca na vuku i Solomoni, qai  dua na ka nona qoroqoro. E kaya sara o Jisu: “Sa tu qo e dua e uasivi Solomoni.”​—Maciu 12:40-42.

E vakatauvatana o Jisu na itabatamata ca qo vua e dua e lako tani mai vua na yalo velavela. (Maciu 12:45) A sega ni vakatawana na lomana na tagane ya ena veika vinaka, ratou mani curumi koya e vitu tale na timoni eratou torosobu sara vua na kena e liu. E va tale ga qori na matanitu o Isireli. Era vakasavasavataki qai vakavoui​—me vaka ga na tagane e lako tani mai vua na yalo velavela. Ia era cati ira na parofita ni Kalou, era cati Jisu tale ga e vakadinadinataki ni tiko vua na yalo ni Kalou. Kena ibalebale sa torosobu sara na ituvaki ni matanitu qori mai na kena e liu.

Ni vosa tiko o Jisu, eratou sa duri tale tu ga kei ira na ilala levu o tinana kei ratou na tacina. Era kaya eso era toka e yasana: “E tiko e tuba o tinamu kei ratou na tacimu, eratou via raici iko.” Sa qai vakaraitaka o Jisu nira voleka cake vua na nona tisaipeli, era vaka na tacina dina, ganena kei na tinana. E dusi ira nona tisaipeli qai kaya: “E tinaqu, era taciqu, o ira na rogoca na vosa ni Kalou ra qai muria.” (Luke 8:20, 21) E vakaraitaka e keri o Jisu ni talei cake mai na veiwekani vakayago nona veiwekani kei ira na nona tisaipeli. Noda volekati ira na tacida vakayalo e dau veivakacegui dina, vakabibi nira vakatitiqataki keda eso tale se vosa vakacacataki keda kei na veika vinaka eda cakava!