Sa vakasalataki ira voli mai nona tisaipeli o Jisu ena kena vakayagataki na iyau. Era vakarogoci koya tiko na nona tisaipeli, ia era tiko tale ga kina na Farisi qai dodonu mera kauaitaka vakabibi na ivakasala i Jisu baleta era “matamatailavo.” Nira rogoca na vosa i Jisu, “dua na ka nodra sevaki koya.”​—Luke 15:2; 16:13, 14.

Ia e sega ni rere o Jisu, e kaya vei ira: “O kemuni qo oni vakadonui kemuni ga ena mata ni tamata, ia e kila vinaka na Kalou na lomamuni. Ni ka e vakabibitaka na tamata e vakasisila ena mata ni Kalou.”​—Luke 16:15.

Sa balavu nodra ‘vakabibitaki’ se dokai voli mai na Farisi, ia sa na veisau na matanicagi. O ira era dau dokai vakalevu nira vutuniyau, veiliutaki vakapolitiki qai vosayaco ena lotu era na vakalolovirataki. Era na vakalevulevui na tauvanua era kauaitaka na nodra bula vakayalo. E vakamatatataka o Jisu na veisau qori ena nona tukuna:

“E mai yala ena gauna i Joni na Lawa kei na ka era vola na Parofita. Me tekivu tale ga mai na gauna ya, e sa vunautaki na itukutuku vinaka ni Matanitu ni Kalou, era saga tale ga na matatamata kece mera lewena. E rawarawa cake me takali o lomalagi kei vuravura, e dredre me na sega ni vakayacori e dua mada ga na tiki ni Lawa.” (Luke 3:18; 16:16, 17) E kilai vakacava mai na vosa i Jisu ni sa yaco tiko na veisau?

Era dokadokataka na iliuliu ni lotu Jiu nira muria vinaka na Lawa i Mosese. Nanuma lesu na gauna a vakabula kina o Jisu na mataboko e Jerusalemi, era qai dokadokataka na Farisi: “Keimami na tisaipeli i Mosese. Keimami kila ni vosa vei Mosese na Kalou.” (Joni 9:13, 28, 29) Dua na inaki ni Lawa a soli vei Mosese me tuberi ira na yalomalumalumu vua na Mesaia o Jisu. E vakamacalataki Jisu o Joni na Dauveipapitaisotaki me Lami ni Kalou. (Joni 1:29-34) Ni tekivu na cakacaka vakaitalatala i Joni, era sa rogoca voli mai na Jiu yalomalumalumu, vakabibi o ira na dravudravua na ka e baleta na “Matanitu ni Kalou.” Io, e rawa nira rogoca kece na “itukutuku vinaka” o ira na via vakarurugi ena Matanitu ni Kalou ra qai vakila na kena yaga.

A yaco dina na inaki ni Lawa a soli vei Mosese ni a veituberi vua na Mesaia. Ia sa na cava na kena muri voli mai. Kena ivakaraitaki, e vakatarai ena Lawa na veisere ena vica na yavu, ia sa mai vakamacalataka o Jisu ni “tagane e sereka na watina qai vakawati tale e sa veibutakoci, na tagane tale ga e vakawatitaka na yalewa sa sere mai, e veibutakoci.” (Luke 16:18) Nira dau bulia e levu na lawa na Farisi, sa na wacava na nodra katakata nira rogoci Jisu!

Sa qai vakamacalataka o Jisu e dua na vosa vakatautauvata me vakaraitaka na veisau levu sa yaco tiko. E talanoataki kina e rua na tagane e veisau  na kedrau ituvaki se ivakarau ni bula. Era vakarorogo tale tiko ga na Farisi matamatailavo era dau vakalagilagi vei ira na lewenivanua.

E kaya o Jisu: “E dua na tagane vutuniyau e dau vakaisulu ena isulu lokaloka kei na lineni, e marautaka ena veisiga nona bula vutuniyau. E dua na daukerekere, na yacana o Lasarusa, e dau mai toka ena nona matamata. E robota na yagona na vidikoso. E dau via kania na tikitiki ni kakana e lutu mai nona teveli na tagane vutuniyau. Era dau mai dramica nona vidikoso na koli.”​—Luke 16:19-21.

Nira matamatailavo na Farisi, e rawarawa noda siqema o cei e vakaibalebaletaka o Jisu vua na “tagane vutuniyau.” O ira tale ga na iliuliu ni lotu vakaJiu era dau taleitaka mera dara na isulu saulevu se rairai vinaka. Se mani vakacava na levu ni nodra iyau, era rairai vakavutuniyautaki ena itavi dokai e soli vei ira kei na ka e rawa nira marautaka. Ni tukuna o Jisu nira vakaisulu ena isulu lokaloka, qori e dusia nodra itutu dokai, na lineni vulavula e dusia na nodra vakadonui ira ga.​—Taniela 5:7.

Ia era raici ira vakacava na dravudravua se tauvanua o ira na iliuliu dokadoka vutuniyau? Era dau kacivi ira ena iru ni veibeci na ‛am ha·’aʹrets, se kawa ni qele, era sega ni kila na Lawa se ganiti ira mera vakavulici kina. (Joni 7:49) Qori sara ga na kena ituvaki na “daukerekere, na yacana o Lasarusa” e dau via kania na “tikitiki ni kakana e  lutu mai nona teveli na tagane vutuniyau.” Era vakataki Lasarusa na tauvanua nira beci, vaka ga era tauvimate tu vakayalo.

Sa dede na kena yaco tiko mai na ituvaki vakaloloma qori, ia e kila o Jisu ni sa kena gauna me veisau na kedra ituvaki o ira era vaka na tagane vutuniyau kei ira era vakataki Lasarusa.

Sa qai tomana o Jisu na nona italanoa ena veisau vakaitamera erau dui sotava na tagane e rua. E kaya: “Sa qai mate na daukerekere ra kauti koya sara na agilosi me lai dabe ena yasa i Eparama. E mate tale ga na tagane vutuniyau, lai bulu sara. Ni sa tu ena iBulubulu sa qai tacake ena nona vakararawataki tu, e raici Eparama vakayawa, kei Lasarusa ni dabe toka e yasana.”​—Luke 16:22, 23.

Era kila na vakarogoci Jisu tiko ni sa mate makawa o Eparama, sa tu ena iBulubulu. E vakamatatataka na iVolatabu ni sega ni rawa ni rai se vosa e dua e tu ena iBulubulu, se Seoli, qori e wili kina o Eparama. (Dauvunau 9:5, 10) Cava gona era nanuma na iliuliu ni lotu ni vakaibalebaletaka o Jisu ena nona vosa vakatautauvata? Cava e rairai tukuna tiko o Jisu me baleti ira na tauvanua kei ira na iliuliu ni lotu matamatailavo?

A se qai vakamacalataka oti ga o Jisu e dua na veisau ena yaco ni kaya ‘sa mai yala ena gauna i Joni na Dauveipapitaisotaki na Lawa kei na ka era vola na Parofita, ia sa tekivu vunautaki mai na gauna ya na itukutuku vinaka ni Matanitu ni Kalou.’ Ena nodrau cakacaka vakavunau gona o Joni kei Jisu Karisito, sa mai cava nodrau ivakarau ni bula makawa o Lasarusa kei na tagane vutuniyau, rau sa vakavoui ena mata ni Kalou.

Era vakila vakalevu duadua na veivakalolomataki vakayalo o ira na yalomalumalumu se dravudravua, qai yaco voli mai qori ena dua na gauna balavu. Ia e vakacegui ira nodra ciqoma na itukutuku ni Matanitu ni Kalou rau vunautaka o Joni na Dauveipapitaisotaki kei Jisu. Era sa sega ni kania na ‘tikitiki ni kakana e lutu mai nodra teveli vakayalo’ na iliuliu ni lotu me vaka e liu. Ia era sa vakamamautaki ena ka dina vakaivolatabu, vakabibi na veika totoka e vakavulica o Jisu. E rawa ni tukuni ni sa qai rawa qo mera veiwekani vinaka kei na Kalou o Jiova.

Ena yasana adua, o ira na iliuliu ni lotu era vaka na tagane vutuniyau era sega ni via ciqoma na itukutuku ni Matanitu ni Kalou e kacivaka o Joni qai vunautaka voli o Jisu e veivanua. (Maciu 3:1, 2; 4:17) E vakacudrui se vakararawataki ira sara ga na itukutuku qori, ni kena usutu na vakatauitotogi warumisa ni Kalou sa voleka  mai. (Maciu 3:7-12) Era na marau na iliuliu ni lotu matamatailavo ke ratou muduka o Jisu kei na nona tisaipeli nodratou vunautaka na itukutuku ni Kalou. O ira na iliuliu ni lotu qori era vaka na tagane vutuniyau ena vosa vakatautauvata e kaya: “Tamaqu Eparama, lomani au mai, talai Lasarusa mada me tonia na mua ni nona iqaqalo ena wai me mai vakabatabatataka na yamequ ni sa tarai au vakabibi na katakata ni buka.”​—Luke 16:24.

Ia ena sega ni yaco qori nira na sega ni veisau e levu na iliuliu ni lotu. Era sega ni via ‘rogoci Mosese kei ira na Parofita,’ na ka era vola o ira qori a dodonu me uqeti ira mera vakabauta ni o Jisu e Mesaia, e nona Tui tale ga na Kalou. (Luke 16:29, 31; Kalatia 3:24) Era sega ni yalomalumalumu se lomani ira na dravudravua era vakabauti Jisu, sa vakadonui ira tu qo na Kalou. Eratou na sega ni veisautaka na tisaipeli nodratou itukutuku mera vakalomavinakataki se vakacegui kina na iliuliu ni lotu, eratou na tukuna ga na ka dina. E vakavotuya qori o Jisu ena nona vosa vakatautauvata ena ka e cavuta na ‘tamadra o Eparama’ vua na tagane vutuniyau:

“Luvequ, nanuma na ka vinaka kece o sotava ena nomu bula, ia a sotava o Lasarusa na veika ca. Qo e sa mai vakacegu o koya, o iko o sa rarawa. Kena ikuri e sa mai wasei keda tu qo e dua na qakilo vakaitamera, e sega ni rawa vei ira eke mera dewa yani vei kemuni, e sega ni dua tale ga e rawa ni dewa mai vei keimami.”​—Luke 16:25, 26.

E dodonu qai veiganiti me yaco na veisau qori! Ena va tale ga qori na veisau ni kedra ituvaki na iliuliu ni lotu dokadoka kei ira na yalomalumalumu era ciqoma na ivua i Jisu, era sa vakacegui qai vakamamautaki vakayalo. (Maciu 11:28-30) Oti e vica na vula ena laurai levu sara na veisau qori ni sa sosomitaka na veiyalayalati ni Lawa na veiyalayalati vou. (Jeremaia 31:31-33; Kolosa 2:14; Iperiu 8:7-13) Ni sovaraka tale ga na Kalou na yalona tabu ena Penitiko 33 G.V., sa na qai vakadinadinataki kina ni Kalou e vakadonui ira na tisaipeli i Jisu, sega ni o ira na Farisi se iliuliu ni lotu era dau tokoni ira.