Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 97

iVakatautauvata ni Tamata Cakacaka ena Loganivaini

iVakatautauvata ni Tamata Cakacaka ena Loganivaini

MACIU 20:1-16

  • “LIU” O IRA NA “MURI”

E se qai vakamacalataka ga o Jisu vei ira na rogoci koya tiko mai Peria ni “levu era liu era na muri, o ira na muri era na liu.” (Maciu 19:30) E vakaraitaka qori ena dua na ivakatautauvata me baleti ira na tamata cakacaka ena loganivaini:

“Na Matanitu vakalomalagi e vaka e dua na itaukei ni vale, e lako ena matakacaca me lai kauti ira mai eso mera mai cakacaka ena nona loganivaini. Ni sa veidinadinati oti kei ira na tamata cakacaka me kedra isau ena dua na siga e dua na dinari, sa qai talai ira ina nona loganivaini. Ni lako ina makete rauta na ikatolu ni aua, e raica sara nira tu kina eso era sega ni cakacaka, mani kaya vei ira, ‘Ni lako tale ga ina loganivaini, au na solia vei kemuni na isau e veirauti.’ Era mani lako sara. E cakava tale ga qori ni lako ena ikaono kei na ikaciwa ni aua.. Ni lako yani rauta na ika11 ni aua, se baci raica nira tu kina eso era sega ni cakacaka, mani kaya tale ga vei ira, ‘Sa voleka ni cava na siga, na cava oni se sega tiko ga kina ni cakacaka?’ Era kaya vua, ‘E sega ni dua e saumi keimami.’ Mani kaya vei ira, ‘Ni lako tale ga ina loganivaini.’”​—Maciu 20:1-7.

Era na rairai vakasamataka na Kalou o Jiova na rogoci Jisu tiko ni cavuta “na Matanitu vakalomalagi” kei na “itaukei ni vale.” E vakamacalataki ena iVolatabu o Jiova me itaukei ni dua na loganivaini, qori e vakatakarakarataka na matanitu o Isireli. (Same 80:8, 9; Aisea 5:3, 4) O ira na wili ena veiyalayalati ni Lawa era vakataki ira na tamata cakacaka ena loganivaini. Ia e sega ni vakaibalebaletaka o Jisu na ka sa yaco oti. E vakamacalataka tiko ga na ituvaki a yaco tu ena nona gauna.

O ira na iliuliu ni lotu era vakataki ira na Farisi era vakatovolei Jisu ena ile me baleta na veisere. De dua era dau gumatuataka nodra qarava na Kalou. Era vakataki ira na cakacaka e veisiga ena loganivaini ra qai vinakata me soli taucoko vei ira na kedra isau, oya me dua na dinari me isau ni cakacaka ena dua na siga.

Era wili ena ilawalawa qori na bete kei na so tale, era kaya nira sega ni gumatuataka nodra qarava na Kalou na Jiu era tauvanua se ra cakacaka ga vagauna ena loganivaini ni Kalou. Ena vosa vakatautauvata i Jisu, o ira qori era vakacakacakataki ena “rauta na ikatolu ni aua” (9:00 ena mataka), ena ikaono ni aua ena sigalevu, se ikaciwa kei na ikatinikadua ni aua (5:00 ena yakavi).

Era okati mera “tamata cudruvi” na tagane kei na yalewa era imuri i Jisu. (Joni 7:49) O ira qori era dau qoli se ra cakacaka tu ena so tale na vanua e liu. Ia a talai Jisu ena 29 G.V. “na itaukei ni loganivaini” me kacivi ira na yalomalumalumu mera tisaipeli i Karisito qai cakacaka vua na Kalou. O ira qori e tukuna o Jisu nira “muri,” era vakacakacakataki ena loganivaini ena ika11 ni aua.

E tinia o Jisu nona vosa vakatautauvata ni tukuna na ka e yaco ni vakarau cava e dua na siga ni cakacaka: “Ni sa yakavi, sa qai kaya na itaukei ni loganivaini vua na nona iliuliu ni cakacaka, ‘Kacivi ira na tamata cakacaka mo saumi ira, tekivu vei ira na muri me lai cava vei ira na liu.’ Era lako yani o ira na tekivu ena ika11 ni aua, e soli vei ira e yadua na dinari. Nira sa veisaumi na tekivu e liu, era nanuma ni na levu cake na kedra isau, ia e soli tale ga vei ira e yadua na dinari. Ia nira taura na kedra isau, era vosavosa vua na itaukei ni vale era kaya, ‘O ira na muri era cakacaka ena dua ga na aua, ia oni raica me keimami tautauvata ga. Keimami oga, keimami vosota tale ga na todra ni siga ena siga taucoko!’ E kaya ni sauma nona vosa e dua vei ira, ‘Na wekaqu, e sega ni dua na noqu cala. Vakacava, daru a sega ni veidinadinati me kemu isau e dua na dinari? Taura na kemu isau, lako. Au vinakata meu solia vei koya e muri na ka vata ga au solia vei iko. Au lewa ga na noqu iyau, se vakacava? O matacataki au ena vuku ni noqu yalovinaka?’ O koya gona, o ira na muri era na liu, o ira na liu era na muri.”​—Maciu 20:8-16.

 Eratou na rairai veinanuyaka na tisaipeli na ibalebale ni vosa qori i Jisu. Na vakasama cava era na “muri” kina na iliuliu ni lotu vakaJiu era nanuma nira “liu”? Eratou na “liu” vakacava na tisaipeli i Jisu?

Era nanuma na Farisi kei na so tale ni ratou na “muri” na tisaipeli i Jisu, ia eratou na “liu” qai soli taucoko vei ratou na kedratou isau. Ni mate o Jisu, sa na vakanadakui o Jerusalemi qai digia na Kalou e dua na matanitu vou, “na Isireli ni Kalou.” (Kalatia 6:16; Maciu 23:38) A vakasamataki tiko vei ira na lewe ni matanitu vou qori o Joni na Dauveipapitaisotaki ni cavuta na papitaiso ena yalo tabu. O ira na “muri” ena vakayacori e liu vei ira na papitaiso qori ra qai lesi ena itavi dokai mera tukuni Jisu ina “veivanua yawa sara kei vuravura.” (Cakacaka 1:5, 8; Maciu 3:11) Ni ratou sa taura rawa qo na tisaipeli na veisau levu e tukuna o Jisu ni na yaco, eratou kila nira na cati ratou na iliuliu ni lotu e tukuni nira na “muri.”