E se qai tokaruataka ga o Jisu na ivakasala me baleta na masu, ia eso tale na ulutaga e tarogi vakalevu ena nona cakacaka voli vakaitalatala. Ni cakamana tiko e Kalili, a beitaki vakailasu ni cakava rawa qori ena nona kaukaua na nodra iliuliu na timoni. E basika tale na veibeitaki qori e Jutia.

Dua na ka nodra kurabui na lewenivanua ni vakasava o Jisu e dua na timoni a vakavuna voli nona galu e dua na tagane. Ia e duatani nodra rai o ira na dau vakalewai koya, era beitaki koya tale vakailasu ena nodra kaya: “E vakasava na timoni ena kaukaua i Pielisipupi na nodra iliuliu na timoni.” (Luke 11:15) Eso tale era via kila se o cei dina o Jisu, era kerea kina me dua na kena ivakatakilakila mai lomalagi.

Ni kila o Jisu nira via vakatovolei koya, e vakamacalataka vei ira na ka vata ga e tukuna vei ira na dauvakalelewa mai Kalili. E kaya ni matanitu e tawase vakataki koya ena rusa, kena ibalebale: “Ke tawase tale ga vakataki koya o Setani, ena qai dei vakaevei nona matanitu?” Sa qai tukuna vakadodonu vei ira o Jisu: “Keu vakasavi ira na timoni ena iqaqaloniliga ni Kalou, oni sa calata dina na Matanitu ni Kalou.”—Luke 11:18-20.

Ni cavuta o Jisu na “iqaqaloniliga ni Kalou,” e dodonu mera nanuma lesu na vakarorogo na ka e yaco ena nodra gauna na Isireli. Era kaya na raica na cakamana i Mosese ena vale i Fero: “Qo sara ga na iqaqaloniliga ni Kalou!” A volai tale ga ena “iqaqaloniliga ni Kalou” na ivunau e tini ena rua na vatu raraba. (Lako Yani 8:19; 31:18) Nona vakasava tale ga na timoni o Jisu kei na nona veivakabulai e rawa ga ena “iqaqaloniliga ni Kalou,” oya na yalona tabu se igu kaukaua. Era calata na dauveitusaqati qori na Matanitu ni Kalou ni cakamana tiko ena kedra maliwa na kena Tui lumuti o Jisu.

Nona vakasava na timoni o Jisu e vakadinadinataka ni malumalumu o Setani. E vaka ga ni gole yani e dua e kaukaua cake, ravuti koya na tamata qaqa e vakaiyaragi vinaka qai yadrava tu na valenitui. E tokaruataka tale ga o Jisu nona vosa vakatautauvata me baleta na yalo velavela e lako tani vua e dua. Ke sega ni vakatawana e lomana na tagane qori na veika vinaka, ena lesu na yalo velavela qai kauta e vitu tale na timoni eratou torosobu sara. Na ka e yaco kina e bau vinaka cake na kena ituvaki e liu o tagane. (Maciu 12:22, 25-29, 43-45) E va sara ga qori na ka e yaco ena matanitu o Isireli.

E uqeta e dua na marama na ka e rogoca vei Jisu qai kaya: “E kalougata na katonigone a kunekunetaki kemuni kei na sucu oni sucuma!” Era diva tu na yalewa era Jiu me parofita na luvedra, sa qai totoka sara ke Mesaia. E nanuma kina na marama qori ni na marau vakalevu o Meri ni maqosa ena veivakavulici o luvena. Ia e vakadodonutaki koya o Jisu qai vakaraitaka na sala e rawati kina na marau dina: “Sega, era marau o ira na rogoca na vosa ni Kalou ra qai muria tiko ga!” (Luke 11:27, 28) A sega ni bau tukuna o Jisu me dokai o Meri. E vakaraitaka ga ni marau dina na tagane se yalewa e yalodina ni qarava na Kalou, sega ni vakatau qori ena veiwekani vakayago se na rawaka.

Me vaka ga e cakava mai Kalili o Jisu, e vunauci ira tale na lewenivanua nira kerea e dua na ivakatakilakila mai lomalagi. E tukuna ni na sega ni soli vei ira e dua na ivakatakilakila, “na ivakatakilakila ga i Jona.” Na tolu na siga e tiko voli kina o Jona ena kete ni ika kei na nona doudou ni vunau e vaka na ivakatakilakila, ni uqeti ira na kai Ninive mera veivutuni. E kaya o Jisu: “Ia raica! sa tu qo e dua e uasivi Jona.” (Luke 11:29-32) O Jisu tale ga e uasivi Solomoni, a via lai rogoca nona vuku na ranadi ni Sipa.

E tomana o Jisu: “Ni waqa na cina, ena sega ni vunitaki se biu ena ruku ni basikete, ena biu ga ena  kena itutu.” (Luke 11:33) De dua e kaya tiko o Jisu ni nona veivakavulici kei na nona cakamana vei ira eso e vaka ga e vunitaki na rarama ni cina. Era sega ni kila na inaki ni veika e cakava ni cala nodra rai.

E se qai vakasava ga na timoni o Jisu, e vakabula tale ga e dua na galu. Qori me uqeti ira na lewenivanua mera vakalagilagia na Kalou ra qai tukuna na veika sa cakava tiko o Jiova. E veivakasalataki kina o Jisu vei ira na dau vakalewai koya: “Mo qarauna, de butobuto tiko na nomu rarama. O koya gona, ke rarama na yagomu taucoko me sega tale ni dua na tikina e butobuto, ena qai serau me vaka na cina ramase.”—Luke 11:35, 36.