Raica sara na lewena

Raica na lewenivola

WASE 51

Laba ena Soqo ni Siganisucu

Laba ena Soqo ni Siganisucu

MACIU 14:1-12 MARIKA 6:14-29 LUKE 9:7-9

  • VAKAROTA O EROTI ME MUSU NA ULU I JONI

Eratou vunau voli e Kalili na yapositolo i Jisu, sa voleka tale ni rua na yabaki nona tu e valeniveivesu o Joni na Dauveipapitaisotaki a caramaka na sala i Jisu.

A tukuna vakadodonu o Joni vei Tui Eroti ni cala nona tauri Erotiasa na wati Filipi na tacina me watina. A sereka na imatai ni watina o Eroti me vakawatitaki Erotiasa. Oya e veibutakoci qai cala vakalawa me vaka e volai ena Lawa a soli vei Mosese, e kaya tiko o Eroti ni muria. E sauma o Eroti na ka e cakava o Joni ena nona balati koya e valeniveivesu qai rairai bukana qori o Erotiasa.

E sega ni kila o Eroti na ka me cakava vei Joni nira ‘okati koya me parofita’ na lewenivanua. (Maciu 14:5) Ia e sega tale ni lomalomarua o Erotiasa. E saga tiko ga me vakamatei Joni ni ‘yalocataki’ koya. (Marika 6:19) Sa basika sara qo e dua na ituvaki veiganiti.

Ni vakarau tekivu na Lakosivia ena 32 G.V., e tuvanaka o Eroti e dua na soqo ni nona siganisucu. Era sureti kina na vakaitutu lelevu, na komada ni mataivalu kei ira na tamata rogo e Kalili. Ni sa vakacagau tiko na soqo, e curu yani me meketi ira o Salome, na luvedrau o Erotiasa kei Filipi na watina e liu. Era taleitaka na tagane na nona meke.

Dua na ka nona marautaki luvena vakacabecabe o Eroti, mani kaya vua: “Kerea vei au na ka ga o vinakata, au na solia vei iko.” E yalataka sara ga o Eroti: “Na ka ga o kerea vei au, au na solia vei iko, ke veimama mada ga noqu matanitu.” E lai tarogi tinana sara o Salome: “Na cava meu kerea?”​—Marika 6:22-24.

E kila o Erotiasa ni sa na rawa e ke na lomana. Sega ni bera nona tukuna: “Na ulu i Joni na Dauveipapitaisotaki.” E lesu totolo tale vei Eroti o Salome me lai vakaraitaka vua na ka e vinakata: “Au vinakata me soli vakatotolo vei au ena dua na veleti na ulu i Joni na Dauveipapitaisotaki.”​—Marika 6:24, 25.

E rarawa vakalevu o Eroti, ia era sa rogoca tu na vulagi nona yalayala vei Salome. Ke labati mada ga e dua e sega ni cala, sa na cakava ga o Eroti ni sega ni via vakamadualaki. E tala sara e dua na sotia qai vakarota me lai musuka mai na ulu i Joni. E cakava qori na sotia, qai kauta sara o Salome vei tinana.

Ni ratou rogoca na tisaipeli i Joni na ka e yaco, eratou lai kauta mai na yagona me bulu. Eratou sa qai lai tukutuku vei Jisu.

E kidroa vakalevu o Eroti ni rogoca nona veivakabulai o Jisu kei na nona vakasavi ira na timoni. E nanuma kina de “sa vakaturi mai na mate o Joni” na Dauveipapitaisotaki. (Luke 9:7) E via raici Jisu sara ga kina o Eroti Anitipasa. E sega ni via rogoca me vunau o Jisu, ia me vakadeitaka ga e dina se sega na nona nanuma.