Raica sara na lewena

Raica na lewenivola

WASE 70

Vakabula na Tagane e Sucu Mataboko

Vakabula na Tagane e Sucu Mataboko

JONI 9:1-18

  • VAKABULAI NA TAGANE SUCU MATABOKO

E se tiko ga e Jerusalemi o Jisu ena Siga ni Vakacecegu. Ni taubale voli kei ratou na nona tisaipeli ena korolevu, ratou raica sara e dua na daukerekere e sucu mataboko. Ratou tarogi Jisu na tisaipeli: “Rapai, o cei e valavala ca me sucu mataboko kina na tagane qo, o koya se o rau na nona itubutubu?”—Joni 9:2.

Ratou vaqaqa na tisaipeli ke rawa ni valavala ca e dua ni se tiko e kete i tinana. E sauma o Jisu: “E sega ni valavala ca na tagane qo se o rau na nona itubutubu, e yaco qo me vakaraitaki kina na cakacaka ni Kalou.” (Joni 9:3) E sega ni mataboko na tagane ya ena vuku ni nona valavala ca se nodrau valavala ca nona itubutubu. Ia eda sucu ivalavala ca na kawatamata ena vuku ni valavala ca i Atama, dua gona na kena revurevu qori na mataboko. Nona mataboko na tagane ya e rawa ni vakaraitaka tale kina o Jisu na cakacaka ni Kalou, me vaka ga nona veivakabulai ena gauna sa oti.

E cavuta sara o Jisu na cakacaka bibi me vakayacori ni kaya: “E dodonu meda cakava na cakacaka i koya e talai au mai ni se siga, sa voleka mai na bogi ena sega ni dua e cakacaka kina. Niu tiko e vuravura, au na rarama tiko kei vuravura.” (Joni 9:4, 5) E se rarama tiko kei vuravura o Jisu, ia ni sa na mate, sa na lako ina vanua buto se ibulubulu ena sega ni cakava rawa kina e dua na ka.

Vakacava ena vakabula na tagane mataboko o Jisu? Ena veivakabulai vakacava? E kasivi ina qele, wakia vata na qele kei na kasivi, boroya sara kina na mata i tagane qai kaya vua: “Lai tavoi ena tobu o Sailoama.” (Joni 9:7) E mani lai tavoi na tagane qori, ni lesu mai sa rai rawa! Dua na ka nona marau!

Era kurabui o ira era kila na tagane ya, era mani taroga: “Sega ni o koya ga qo na daukerekere?” Era kaya eso: “O koya ga.” Era kaya eso tale era sega ni vakabauta: “Sega, e vakataki koya.” Ia e kaya o tagane: “O yau ga qori.”—Joni 9:8, 9.

Era tarogi koya sara: “O qai rai vakacava?” E sauma: “Na tagane e vakatokai o Jisu e wakia na qele, boroya e mataqu qai kaya vei au: ‘Lako i Sailoama, lai tavoi.’ Au lako sara, au tavoi, au mani rai.” Era tarogi koya sara: “I vei o koya?” E sauma na daukerekere: “Au sega ni kila.”—Joni 9:10-12.

Era kauti tagane ya vei ira na Farisi nira via kila tale ga se rai vakacava. E kaya na tagane vei ira: “E boroya na mataqu ena qele, au lai tavoi au mani rai kina.” E dodonu mera marau na Farisi ni sa vakabulai na daukerekere, ia era vosavakacacataki Jisu eso vei ira nira kaya: “E sega ni tamata ni Kalou qo ni sega ni doka na Siga ni Vakacecegu.” Eso tale era taroga: “Ke tamata ivalavala ca e qai cakamana ga vakacava?” (Joni 9:15, 16) Era sa veisei ga vakataki ira.

Ni veisaqasaqa nodra rai, era mani taroga na tagane e vakabulai: “Cava o kaya me baleti koya ni a vakavuna nomu rai?” Ni vakabauti Jisu na tagane ya, e mani kaya: “E parofita o koya.”—Joni 9:17.

Era sega ni via vakabauti koya na Farisi. Era rairai nanuma ni rau nakita lo o Jisu kei na tagane qo mera lawakitaki na lewenivanua. Era nanuma kina me rau tarogi na itubutubu ke a mataboko dina na luvedrau.