Raica sara na lewena

Raica na lewenivola

WASE 78

Tu Vakarau, Dauniyau Yalodina

Tu Vakarau, Dauniyau Yalodina

LUKE 12:35-59

  • ME TU VAKARAU NA DAUNIYAU YALODINA

  • KAUTA MAI NA VEITAWASEI O JISU

A vakamacalataka o Jisu ni na veiliutaki ena Matanitu vakalomalagi e dua ga na “qelenisipi lailai.” (Luke 12:32) Ia me kua ni raici vakamamada na icovi totoka qori. E vakabibitaka o Jisu ni na gadrevi me donu nona rai o koya e via veiliutaki ena Matanitu ni Kalou.

A vakadreti ira na nona tisaipeli o Jisu mera tu vakarau ina nona lesu mai. E kaya: “Dou vakaisulu dou tu vakarau, me caudre tiko ga na nomudou cina. Mo dou vakataki ira era waraka na lesu mai ni nodra turaga mai na soqo ni vakamau, ni gauna e yaco mai kina me mai tukituki, era na dolava totolo vua na katuba. Era marau na dauveiqaravi qori ni lako mai nodra turaga qai raica nira vakatawa tiko!”—Luke 12:35-37.

Eratou taura rawa na tisaipeli na ka e via vakabibitaka tiko o Jisu. Era tu vakarau ra qai waraka nona lesu mai na nodra turaga na dauveiqaravi e cavuta o Jisu. E vakamacalataka sara o Jisu: “Era na marau dina ke yaco mai [na turaga] ena ikarua ni yadra [mai na ciwa ena bogi ina bogilevu tutu], se mani ikatolu [mai na bogilevu tutu ina rauta na tolu ena mataka], qai raica nira vakatawa tiko!”—Luke 12:38.

E sega ni vakabibitaki ga ena ivakatautauvata qo me gugumatua na dauveiqaravi se tamata cakacaka. E kilai qori ena nona okati koya ena ivakatautauvata o Jisu na Luve ni tamata. E kaya vei ratou nona tisaipeli: “Mo dou vakarau tale ga o kemudou, ni na lako mai na Luve ni tamata ena aua dou sega ni namaka.” (Luke 12:40) Ni lako mai o Jisu ena dua na gauna mai muri, e vinakata mera tu vakarau nona imuri, vakabibi o ira na “qelenisipi lailai.”

E via kila vinaka o Pita na ibalebale ni vosa i Jisu, mani taroga: “Turaga, oni cavuta tiko vei cei na vosa vakatautauvata qori? Vei keitou se vei keimami kece?” E sega ni sauma vakadodonu o Jisu, ia e tukuna tale e dua na vosa vakatautauvata: “O cei sara mada na dauniyau yalodina e vuku, e lesia na nona turaga me lewa na nona ilawalawa dauveivuke, qai solia tiko ga na kedra ivakarau kakana ena kena gauna dodonu? Ena marau na tamata ya ke lako mai na nona turaga qai raica ni vakayacora dina tiko! Au tukuna vakadodonu vei kemudou, ena lesi koya me qarava na ka kece e taukena.”—Luke 12:41-44.

Ena imatai ni vosa vakatautauvata, na “turaga” e dusi Jisu na Luve ni tamata. Na “dauniyau yalodina” era okati kina na lewe ni “qelenisipi lailai” era na veiliutaki ena Matanitu ni Kalou. (Luke 12:32) E tukuna tiko o Jisu ni so vei ira na lewe ni ilawalawa qori era na qaravi ira “nona ilawalawa dauveivuke,” era na vakarautaka na “kedra ivakarau kakana ena kena gauna dodonu.” E kila mai keri o Pita kei na so tale na tisaipeli e vakavulica qai vakania tiko vakayalo o Jisu, ni na lako mai na Luve ni tamata ena dua na gauna e muri. Sa na muri tale tiko ga ena gauna qori e dua na ituvatuva ni veivakani vakayalo me baleti ira na imuri i Jisu, na “nona ilawalawa dauveivuke” na Turaga.

E vakamacalataka tale o Jisu ni bibi me ratou vakatawa nona tisaipeli ratou qai dikeva tiko ga nodratou ivakarau ni rai, me ratou kua kina ni wele se saqati ira tale na tacidratou vakayalo. E kaya: “Ia ke kaya e lomana na tamata ya, ‘Sa rui bera na noqu turaga,’ mani mokuti ira na tagane kei na yalewa dauveiqaravi, e kana e gunu, e mateni. Ena lako mai na nona turaga na tamata ya ena siga e sega ni namaka kei na aua e sega ni kila, ena totogitaki koya sara vakaca qai lesi koya vata kei ira na sega ni yalodina.”—Luke 12:45, 46.

E tukuna o Jisu ni lako mai me “tekivu vakamakama e vuravura.” E vakaibalebaletaka tiko e keri nona dau vakamacalataka eso na ile e veiletitaki vakalevu, e talaraki kina na ivakavuvuli lasu kei na ivakarau vakavanua. Qori ena rairai tawasei ira mada ga e namaki mera duavata, ena tawasei ira “na veitamani tagane, na veitinani yalewa, kei na veivugoni yalewa.”—Luke 12:49, 53.

E vagolei vakatabakidua qori vei ratou na tisaipeli. Sa qai vosa vei ira na ilala levu o Jisu, ni levu era bese ni ciqoma na ivakadinadina ni Mesaia o koya. E kaya: “Ni oni raica ni sa uku na loaloa mai na ra, oni dau kaya sara, ‘sa voleka na draki ca,’ mani yaco dina. Ni oni raica tale ga ni sa bula mai na ceva, oni kaya, ‘sa na wacava na katakata,’ mani yaco dina. Ni dauveivakaisini, oni sa lai kila sara na irairai ni vuravura kei na lomalagi, ia na cava oni sega ni kila kina na ibalebale ni ka kece e yaco tiko ena gauna qo?” (Luke 12:54-56) E macala ga e keri nira sega tu ni vakarau.