Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 38

Via Kila o Joni na iTukutuku kei Jisu

Via Kila o Joni na iTukutuku kei Jisu

MACIU 11:2-15 LUKE 7:18-30

  • VIA KILA O JONI NA ITAVI I JISU

  • VAKACAUCAUTAKI JONI O JISU

Sa yabaki dua nona tu e valeniveivesu o Joni na Dauveipapitaisotaki, qai rogoca mai kea na cakacaka veivakurabuitaki i Jisu. Eratou tukuna vei Joni nona tisaipeli ni vakabula na luve ni yada ni Neini o Jisu. Ni via rogoca sara ga vei Jisu o Joni eso tale na ivakamacala, e tala e rua nona tisaipeli me rau lai tarogi Jisu: “O kemuni o koya ena lako mai, se me keimami waraka e dua tale?”​—Luke 7:19.

Ena rairai kurabuitaki na taro qori, ni vakasamataki na ka e yaco ena rauta na rua na yabaki yani e liu ni papitaiso o Jisu. A raica na turaga yalodina o Joni ni lako sobu vei Jisu na yalo tabu ni Kalou qai rogoca nona tukuna na Kalou ni vakadonui Jisu. Me kua ni nanumi ni sa malumu na vakabauta i Joni se ni vakatitiqa baleta a vakacaucautaki koya mada ga o Jisu. Cava ga e vaqaqa kina na veika me baleti Jisu?

De dua e vinakata ga o Joni me vakadeitaka o Jisu ni o koya na Mesaia. Ena vakayaloqaqataki Joni dina qori ena nona tu e valeniveivesu. Ia e rairai tiko e dua tale na vuna e taro kina o Joni. E kila vinaka tu ni a parofisaitaki ni na tui, ena ivakabula tale ga na Lumuti ni Kalou. Ia oti ga e vica na vula nona papitaiso o Jisu, sa bala e valeniveivesu o Joni. E via kila gona o Joni ke na lako tale mai e dua me isosomi kei Jisu, me qai vakaotia na veika e parofisaitaki ni na cakava na Mesaia.

Sega ni tukuna ga o Jisu vei rau na tisaipeli i Joni, ‘Io, o yau o koya ena lako mai,’ e vakadinadinataka ga ni tokoni koya na Kalou ena nona vakabulai ira e levu mai na mate kece e tauvi ira. Sa qai tukuna vei rau na tisaipeli: “Drau lako drau lai tukuna vei Joni na ka drau rogoca kei na ka drau raica: Era sa rai na mataboko, era lako na lokiloki, era vakasavasavataki na vukavuka, era rogo na didivara, era vakaturi na mate, sa tukuni tale ga vei ira na dravudravua na itukutuku vinaka.”​—Maciu 11:4, 5.

Ni laurai tale ga na taro i Joni, de dua a namaki me cakava e levu tale na ka o Jisu qai sereki Joni mai valeniveivesu. Ia e tukuna vei Joni o Jisu me kauaitaka ga na cakamana sa vakayacora tiko.

Ni rau sa lesu na tisaipeli i Joni, e tukuna vei ira na ilala levu o Jisu ni sega wale ga ni parofita o Joni. E “italai” i Jiova a parofisaitaki ena Malakai 3:1, e vakatakarakarataki Ilaija tale ga na parofita me vaka e parofisaitaki ena Malakai 4:5, 6. E vakamacalataka o Jisu: “Au tukuna vakadodonu vei kemuni, vei ira kece na sucu mai, e sega ni dua e uasivi Joni na Dauveipapitaisotaki, ia o koya e lailai duadua ena Matanitu vakalomalagi e uasivi vua.”​—Maciu 11:11.

E tukuna o Jisu ni uasivi Joni o koya e lailai duadua ena Matanitu vakalomalagi, kena ibalebale ena sega ni wili o Joni ena Matanitu vakalomalagi. A caramaka na sala i Jisu o Joni, ia e mate ni bera ni dolava o Karisito na sala me rawati kina na bula e lomalagi. (Iperiu 10:19, 20) E parofita yalodina ni Kalou o Joni, ena vakarurugi ga ena veiliutaki ni Matanitu ni Kalou e vuravura.