Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 44

Vakamaravutaka o Jisu na Wasawasa

Vakamaravutaka o Jisu na Wasawasa

MACIU 8:18, 23-27 MARIKA 4:35-41 LUKE 8:22-25

  • VAKAMARAVUTAKA O JISU NA WASA O KALILI

E wawale o Jisu ni levu sara na itavi e qarava. Ni karobo na vanua, e kaya vei ratou na tisaipeli: “Tou lele mada ina baravi e tai,” e veibasai kei na yasayasa vaka Kapenaumi.​—Marika 4:35.

E tiko ena tokalau ni baravi ena Wasa o Kalili na yasayasa o Kerikesa, e vakatokai tale ga me Tikapoli. Era vakaitikotiko ena koro lelevu ena Tikapoli e levu na Jiu, ia e takalevu kina na itovo vaKirisi.

Ni kilai sa biubiu mai Kapenaumi o Jisu, era muri eso tale ena waqa. (Marika 4:36) E lekaleka ga na vodo waqa me yaco i tai. Na Wasa o Kalili e vaka ga e dua na drano levu. E rauta ni 21 na kilomita na kena balavu qai 12 na kilomita na kena raba, ia e titobu.

E uasivi o Jisu, ia e dau wawale ena vuku ni nona ogaoga ena cakacaka vakaitalatala. Ni seredali ga na waqa, e lai davo ena muaimuri ni waqa o Jisu, e vakailokoloko toka, mani moce lutu sara.

Eratou dausoko eso na yapositolo, ia e sega ni soko rawarawa qo. Era wavokita na yasayasa qo na veiulunivanua qai dau vakilai ena Wasa o Kalili ni katakata na cagi e dela ni wai. Ni rau sota ena so na gauna na cagi katakata kei na cagi batabata mai na veiulunivanua, e dau tubu vakasauri na cava qai voravora na wasawasa. E sotava sara ga qori o Jisu kei ratou na tisaipeli. E roba na yasa ni waqa na ua, “eratou lomaleqa ni sa vodo e waqa na wai.” (Luke 8:23) Ia e moce toka ga o Jisu!

Dua na ka nodratou sasaga na yapositolo me ratou veiuliyaka na waqa, ratou vakasamataka na veika ratou dau cakava e liu ena gauna ni draki ca. Ia e duatani sara na ka eratou sotava qo. Eratou vakayadrati Jisu ena levu ni nodratou domobula ratou qai kaya: “Turaga, vakabulai kedatou, tou sa voleka ni mate!” (Maciu 8:25) Eratou leqataka na tisaipeli de ratou luvu!

Ni yadra o Jisu, e kaya vei ratou na yapositolo: “Na cava dou domobula kina? Sa lailai nomudou vakabauta.” (Maciu 8:26) E vunauca na cagi o Jisu, e kaya ina wasawasa: “Mo maravu!” (Marika 4:39) E ruru sara na cagi qai maravu na wasawasa. (Rau vakamacalataka o Marika kei Luke na ka vakatubuqoroqoro ya, rau cavuta e liu na maravu vakacakamana ni wasawasa, qai tukuni e muri na lailai ni nodratou vakabauta na tisaipeli.)

Cava mada eratou vakila na tisaipeli ni ratou raica ni sa maravu na wasawasa a seuseua tu? Eratou rere vakalevu, ratou kaya: “O cei mada qo, ni talairawarawa sara ga vua na cagi kei na wasawasa?” Eratou mani yaco bula i tai ni wasawasa. (Marika 4:41–5:1) De dua era sa lesu tale ga i baravi na vo ni waqa.

E veivakacegui dina meda kila ni lewa na draki na Luve ni Kalou! Ni sa vakarurugi o vuravura ena veiliutaki ni nona Matanitu, eda na qai vakacegu ni sa na sega na uneune, cagilaba kei na so tale na ka vakadomobula!