Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 84

Na Nona iTavi na Tisaipeli

Na Nona iTavi na Tisaipeli

LUKE 14:25-35

  • VEIKA ENA SOTAVA NA TISAIPELI

Levu sara na ka e vakavulica o Jisu ena kanavata a sureti koya kina e dua nodra iliuliu na Farisi. Ni biubiu o Jisu me gole i Jerusalemi, era tomani koya e dua na ilala levu. Vakacava era vinakata mera imuri dina i Jisu ra qai cakava na ka kece e tukuni vei ira?

Ni toso tiko na ilakolako, era rairai kidacala eso ni tukuna vei ira o Jisu: “Ke lako mai vei au e dua qai sega ni cati tamana, tinana, watina, luvena, tacina, ganena, se nona bula sara mada ga, ena sega ni rawa ni noqu tisaipeli.” (Luke 14:26) Na cava e kena ibalebale qori?

E sega ni kaya tiko o Jisu mera cata na wekadra na nona imuri. E tukuna ga mera lomani ira vakalailai na wekadra, mera lomani Jisu vakalevu cake. Mera kua ni vaka na tagane ena vosa vakatautauvata i Jisu, a sega ni ciqoma na veisureti bibi ni se qai vakawati ga. (Luke 14:20) Ni tukuni e “cati” Lia o Jekope na tukadra na Jiu, kena ibalebale ni lomani koya vakalailai, e lomani Raijeli vakalevu cake na tacina.—Vakatekivu 29:31; ivakamacala e ra.

E tukuna tale ga o Jisu ni dodonu me cata ‘sara mada ga nona bula’ e dua na tisaipeli. Kena ibalebale na tisaipeli dina e lomani Jisu vakalevu cake, e sega ni dua na ka vua nona bula. Ena bolemate tale ga ke gadrevi. E macala eke ni dua na itavi bibi e lesi vua e dua na tisaipeli. E sega kina ni dodonu me raici vakamamada se vakatulewataki vakariri.

Ena rawa ni sotava na veika dredre kei na veivakacacani na tisaipeli, e kaya o Jisu: “O koya e sega ni colata nona kaunirarawa me muri au, e sega ni rawa ni noqu tisaipeli.” (Luke 14:27) Io, me tu vakarau na tisaipeli dina i Jisu me vosavakacacataki me vaka ga e caka vei Jisu. A kaya mada ga ena dua na gauna o Jisu nira na vakamatei koya na kena meca.

E bibi gona mera vakasamataka vinaka na ilala levu era tomani Jisu tiko i Jerusalemi, na veika e vauci ena nona itavi na tisaipeli i Karisito. E vakabibitaka qori o Jisu ena dua na vosa vakatautauvata. E kaya: “Me kena ivakaraitaki, o cei vei kemuni e via tara e dua na valececere ena sega ni dabe mada me cakacakataka na kena isau, me raica se sa veirauti me vakaotia kina se sega? De lakolako ena viria oti ga na kena yavu sa na sega tale ni vakaotia rawa.” (Luke 14:28, 29) E bibi gona mera vakadeitaka rawa na ilala era tomani Jisu tiko nira na vakayacora na ka kece e vinakati me rawa nira qai tisaipeli. E vakamacalataka qori ena dua tale na vosa vakatautauvata:

“Se tui cava ena tayabe yani ina buca ni ivalu me sega ni dabe mada me veivosakitaka, ena vala rawa na 10,000 na nona sotia kei na 20,000 na sotia e kauta mai na kena meca? Ke sega ni rawata, ena tala yani nona mata ni se  yawa mai na kena meca qori, me rawa nira veivakameautaki.” Sa qai vakabibitaka o Jisu: “Ena vakatale ga kina o kemudou, ena sega ni rawa ni noqu tisaipeli o koya e sega ni vakanadakuya nona iyau kece.”—Luke 14:31-33.

E sega ni vosa tiko ga e keri o Jisu vei ira na ilala levu era muri koya voli. Ia mera yalorawarawa kece ni muria na ivakasala qori na imuri i Karisito. Kena ibalebale mera tu vakarau ni cabora na ka kece e tu vei ira wili kina nodra iyau kei na nodra bula mera qai nona tisaipeli. E bibi mera vakasamataka vinaka qori ra qai masulaka.

E cavuta sara o Jisu e dua na ka e vakamacalataka ena nona iVunau ena Ulunivanua, e kaya kina nira “masima kei vuravura” nona tisaipeli. (Maciu 5:13) Me vaka ga na kena maroroi dede na ka e vakamasimataki, era rawa ni veitaqomaki tale ga na tisaipeli mai na itovo dukadukali kei na veika e veivakaleqai vakayalo. Sa voleka tiko ni cava na cakacaka vakaitalatala i Jisu, e kaya: “E vinaka dina na masima, ia ke yali na kena tuituina, ena qai vakatuituinataki tale ena cava?” (Luke 14:34) Era kila na vakarogoci koya tiko ni sega ni vinaka eso na masima ena gauna ya ni waki tu kei na so tale na ka, e tawayaga ni sa yali kena tuituina.

E vakaraitaka tiko gona e keri o Jisu ni o ira mada ga era sa tisaipeli voli mai vakadede e dodonu mera gumatua tiko ga. Ke sega, era na tawayaga me vaka ga na masima sa yali na kena tuituina. Qori era na vakalialiai kina, ena sega ni vakadonui ira na Kalou qai vosavakacacataki na yacana. Me kua ni yaco na ka vakaloloma ya, e veivakasalataki o Jisu: “Me rogoca o koya e vakadaligana, me rogoca sara.”—Luke 14:35.