Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 56

Cava e Vakadukadukalitaka na Tamata?

Cava e Vakadukadukalitaka na Tamata?

MACIU 15:1-20 MARIKA 7:1-23 JONI 7:1

  • VAKATAKILA O JISU NA IVAKAVUVULI VAKATAMATA

Sa voleka na Lakosivia ni 32 G.V., e osooso vakalevu o Jisu ena veivakavulici e Kalili. Oti e rairai gole sara i Jerusalemi me lai tiko ena soqo ni Lakosivia, me vaka ga e vakaroti ena Lawa. Ia e qaqarauni o Jisu ni tiko voli e keri nira via vakamatei koya tiko na Jiu. (Joni 7:1) Oti ga na Lakosivia e lesu sara i Kalili.

De dua ni se tiko e Kapenaumi o Jisu, era gole yani vua na Farisi kei na vunivola mai Jerusalemi. Cava na inaki ni nodra veisiko? Mera vaqara e dua na yavu e cala vakalotu mera beitaki Jisu kina. Era taroga: “Na cava era beca kina na nomu tisaipeli na nodra ivakavuvuli na qase? Me kena ivakaraitaki, era sega ni vuluvulu ni bera na kana.” (Maciu 15:2) E sega ni vakarota na Kalou mera “vuluvulu me yaco sara i duruduru ni ligadra” nona tamata. (Marika 7:3) Ia na kena sega ni muri na ivakarau qori e cala bibi vei ira na Farisi.

E sega ni sauma vakadodonu o Jisu nodra veibeitaki, e vakavotuya ga na nodra nakita mera beca na Lawa ni Kalou. E tarogi ira: “Na cava oni beca kina na ivunau ni Kalou ena nomuni ivakavuvuli? Me kena ivakaraitaki, e kaya na Kalou, ‘Mo rokovi tamamu kei tinamu,’ e kaya tale ga, ‘Me vakamatei o koya e vosavakacacataki tamana se tinana.’ Ia oni kaya, ‘O koya e tukuna vei tamana se tinana: “Na ka kece e tiko vei au me bau yaga vei kemudrau au sa yalataka me nona na Kalou,” e sega ni gadrevi vua me rokova na tamana.’”—Maciu 15:3-6; Lako Yani 20:12; 21:17.

Era kaya na Farisi ni ilavo, iyau se veika e soli vakatabakidua me nona na Kalou e dodonu me kau ena valenisoro, e sega ni rawa ni vakayagataki ena dua tale na inaki. Ia na ka e yalataka e dua me nona isolisoli e se taukena tiko ga o koya. Kena ivakaraitaki, ena kaya e dua na cauravou ni nona ilavo se iyau e “koripani,” na isolisoli e nona vakatabakidua na Kalou se na valenisoro, vaka sara ga e sa taukena tu na valenisoro na isolisoli qori. E se rawa tiko ga ni vakayagataka o cauravou nona ilavo se iyau, ia e tukuna ni sega ni rawa ni vakayagataka qori ke rau vinakata na veivuke na nona itubutubu rau sa qase. Ni cakava qori, e drovaka kina nona itavi vei rau nona itubutubu.—Marika 7:11.

E donu vinaka nona cudru o Jisu ni vakatanitaki na Lawa ni Kalou, e kaya: “Oni sa vakatanitaka kina na vosa ni Kalou ena nomuni ivakarau makawa. Ni dau veivakaisini! E tukuni kemuni vinaka o Aisea ni kaya, ‘O ira qo era vakarokorokotaki au ga ena tebenigusudra, na lomadra e yawa sara vei au. E tawayaga nodra qaravi au nira vakavulica ga na ivakaro vakatamata me ivakavuvuli.’” Era sega ni tukuna rawa e dua na ka na Farisi ni vakalewai ira o Jisu. E mani kacivi ira voleka mai na ilala levu, e kaya vei ira: “Ni vakarorogo vinaka sara moni kila na kena ibalebale. E sega ni vakadukadukalitaka na tamata na ka e curu yani i gusuna, e vakadukadukalitaki koya ga na ka e lako mai gusuna.”—Maciu 15:6-11; Aisea 29:13.

Ni ratou tiko ena dua na vale, ratou tarogi Jisu na tisaipeli: “Oni kila nira tarabe na Farisi nira rogoca na ka oni tukuna?” E sauma o Jisu: “Na kau kece e sega ni tea na Tamaqu vakalomalagi ena cavuraki. Laivi ira. O ira qori era dauveituberi mataboko. Ke tubera gona na mataboko na mataboko, erau na lutu ruarua ina qara.”—Maciu 15:12-14.

E rairai kurabui o Jisu ni kerea o Pita ena vukudratou na vo ni tisaipeli, me vakamatatataka vei ratou na veika e vakadukadukalitaka na tamata. E kaya o Jisu. “Dou lecava ni ka kece e curu i gusu e yaco sara i kete, oti e lako tani yani me benu? Ia na ka e lako tani mai na gusu e vu mai na loma ni tamata, qo ga e vakadukadukalitaki koya. Kena ivakaraitaki, e vu mai na loma ni tamata na vakanananu ca, na laba, na veibutakoci, na veiyacovi  tawadodonu, na butako, na lasu, na vosa veibeci. Qori na veika e vakadukadukalitaka na tamata, e sega ga ni vakadukadukalitaki koya na nona sega ni vuluvulu ni bera ni kana.”—Maciu 15:17-20.

E sega ni tukuna tiko o Jisu ni cala na tiko savasava se meda vuluvulu nida vakarau kakana se bera na kana. E vakacala ga na nodra ivalavala veivakaisini na iliuliu ni lotu nira vakalecalecava na lawa dodonu ni Kalou ena nodra muria na ivakavuvuli vakatamata. E vakadukadukalitaka ga na tamata na veika ca e vu mai lomana.