Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 2

Rokovi o Jisu ni Bera Nona Sucu

Rokovi o Jisu ni Bera Nona Sucu

LUKE 1:34-56

  • VEISIKO O MERI VUA NA WEKANA O ILISAPECI

Ni tukuna na agilosi o Keperieli vua na goneyalewa o Meri ni na vakasucuma e dua na gonetagane ena veiliutaki vakatui me tawamudu, e taroga sara o Meri: “Ena yaco vakacava qori niu se sega ni veiyacovi kei na dua na tagane?”​—Luke 1:34.

E sauma o Keperieli: “Ena sobuti iko na yalo tabu, ena vakaruguti iko na kaukaua i koya e Cecere Duadua. Oya na vuna ena vakatokai kina o koya o na vakasucuma me yalosavasava, na Luve ni Kalou.”​—Luke 1:35.

Me rawa ni vakabauta o Meri nona itukutuku, e tomana o Keperieli: “Raica! Na wekamu o Ilisapeci, na kenamarama e sega ni vakaluveni, sa kunekunetaka tale ga e dua na luvena tagane, qo sa ikaono ni nona vula, ni sega ni dredre vua na Kalou me vakayacora nona vosa.”​—Luke 1:36, 37.

E vakabauta o Meri na vosa i Keperieli, e vakadinadinataki qori ena nona kaya: “Raica! Au yalewa dauveiqaravi i Jiova! Me yaco mada ga vei au na nomuni vosa.”​—Luke 1:38.

Ni biubiu ga o Keperieli sa vakasosolo sara o Meri me lai sikovi Ilisapeci, erau tiko kei na watina o Sakaraia volekati Jerusalemi ena veidelana e Jutia. E rairai tolu se va na siga na ilakolako mai na koro i Meri o Nasareci ina nodrau itikotiko o Ilisapeci.

Ni yaco yani o Meri ena vale i Sakaraia, e kidavaka sara na wekana o Ilisapeci. E sobuti Ilisapeci na yalo tabu qai kaya vei Meri: “O kalougata dina vei ira na yalewa kece, me kalougata tale ga na vua ni ketemu! E ka dokai dina nomu mai sikovi au, tinai noqu Turaga. Kila na cava, niu rogoca ga nomu vakabula, e lade sara ga ena marau na gone e ketequ.”​—Luke 1:42-44.

E sauma o Meri ena vakavinavinaka: “E vakacerecerei Jiova na lomaqu, na yaloqu tale ga e marautaka na Kalou na noqu iVakabula, ni kauaitaka o koya na ituvaki vakaloloma ni nona yalewa dauveiqaravi. Raica! Me tekivu qo era na tukuna na itabatamata kece niu kalougata dina, ni cakava vei au na veika lelevu o koya e kaukaua duadua.” E ka dokai dina na ka e tukuni ni na yaco vei Meri, ia e vagolea na vakarokoroko kece vua na Kalou. E kaya: “E yacana . . . o yalosavasava, ena lomani ira tale ga era rerevaki koya ena itabatamata kece ga.”​—Luke 1:46-50.

E uqeti vakalou o Meri me vakacaucautaka tiko ga na Kalou ena nona kaya: “A vakayagataka na ligana me cakava kina na cakacaka lelevu, a ceburaki ira e viavialevu na lomadra. E vakalolovirataki ira na vetaicake mai na nodra itutu cecere, qai vakacerecerei ira na tauvanua, e vakamamautaki ira na viakana ena ka vinaka, qai vakalesui ira ligalala na vutuniyau. E vukei ira na nona tamata na Isireli, ni se nanuma tiko na nona yalololoma, a yalataka vei ira na tukada, vei Eparama kei na nona kawa me tawamudu.”​—Luke 1:51-55.

E rauta ni vula tolu nona tiko kei Ilisapeci o Meri, qai rairai vukei koya ena vica na macawa ni bera nona vakasucu. Dua dina na gauna marautaki qori vei rau na yalewa yalodina erau bukete ruarua ena veivuke ni Kalou!

A rokovi o Jisu ni bera mada ga nona sucu. E vakatokai koya o Ilisapeci me “noqu Turaga,” qai “lade sara ga ena marau” na gone e ketena ni raici Meri. E duidui sara mai na ka era cakava e muri eso tale vei Meri kei na gone sa vakarau vakasucuma. Ena qai vakamacalataki malua qori.