Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 13

Vuli Mai na Nona Temaki o Jisu

Vuli Mai na Nona Temaki o Jisu

Ni papitaisotaki Jisu oti ga o Joni, e dusimaki koya sara na yalo tabu ni Kalou me lako ina vanua talasiga e Jutia. Levu na ka me lai vakasamataka. Nanuma tiko ni a “tadola na lomalagi” ni papitaiso o Jisu. (Maciu 3:16) Qori e rawa ni nanuma lesu kina na veika a vulica qai cakava mai lomalagi. Io, levu sara na ka me vakasamataka vakatitobu!

E tiko voli ena vanua talasiga o Jisu me 40 na siga, 40 na bogi. Sega ni bau kana ena gauna kece qori. Ni walokai sara tu ga o Jisu, e torovi koya yani na Tevoro me temaki koya qai kaya: “Ke o luve ni Kalou, mo kaya ina vatu era tu qo mera vuki mera ibuli madrai.” (Maciu 4:3) E kila o Jisu ni cala me vakayagataka nona kaukaua ni cakamana me vakacegui kina nona gagadre, mani sega ni vakamalumalumu ena veitemaki.

Sega ni soro na Tevoro. E tovolea e dua tale na iwalewale. E kaya me rika sobu o Jisu mai na dela ni bai ni valenisoro. Ia e sega ni via cakava o Jisu na ka vakatubuqoroqoro va qori. E cavuqaqataka ga na ka e kaya na iVolatabu, ni cala me vakatovolei va ya na Kalou.

Ena ikatolu ni veitemaki ni Tevoro, e vakaraitaka vei Jisu “na matanitu kece e vuravura kei na kedra lagilagi” qai kaya: “Au na solia vei iko na ka kece qo ke o cuva mo sokalou wale ga vakadua vei au.” Sega tale ni vakasama vakarua o Jisu, e tukuna ga: “Lako tani, Setani!” (Maciu 4:8-10) Sega ni vakamalumalumu o Jisu ena veitemaki ni kila e dodonu me sokaloutaki duadua ga o Jiova. A digia me yalodina tiko ga vua na Kalou.

E rawa nida vulica eso na ka ena veitemaki qori, kei na ka e cakava o Jisu. A yaco dina na veitemaki, kena ibalebale na Tevoro e sega ni dua ga na ka ca e tiko vei keda me vaka era kaya eso. Ia e dua na ka tawarairai e bula dina tiko. Eda kila tale ga mai na ivolatukutuku qori ni lewai ira tu na veimatanitu e vuravura na Tevoro. Oya na vuna e temaki Karisito kina ena nona solia vua na matanitu kece.

Kena ikuri, a kaya na Tevoro ke sokaloutaki koya mada ga vakadua o Jisu, ena solia vua na matanitu kece e vuravura. Ena rairai temaki keda tale ga nikua na Tevoro ena veika vakavuravura me vaka na iyau, veiliutaki, se na itutu. Eda vuku ke da muria na ivakaraitaki i Jisu meda yalodina tiko ga vua na Kalou se mani cava eda temaki kina! Ia nanuma tiko ni a biuti Jisu na Tevoro “me yacova e dua tale na gauna veiganiti.” (Luke 4:13) E rawa ni cakava tale ga qori vei keda, meda kua gona ni wele.