Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 27

Kacivi o Maciu

Kacivi o Maciu

MACIU 9:9-13 MARIKA 2:13-17 LUKE 5:27-32

  • KACIVI MACIU NA DAUKUMUNI IVAKACAVACAVA O JISU

  • VUKEI IRA NA IVALAVALA CA O KARISITO

Ni vakabula oti o Jisu na paralasi, e tiko tale vakalailai e Kapenaumi ena baravi kei Kalili. Era baci tabili yani vua na ilala levu qai vakavulici ira. Erau sota kei Maciu e kilai tale ga me o Livai, e dabe toka ena valenivolavola ni saumi ivakacavacava. E sureti koya sara o Jisu: “Muri au mai.”​—Maciu 9:9.

Me vakataki Pita, Adriu, Jemesa kei Joni, sa rairai kila vinaka tu o Maciu na ivakavuvuli i Jisu kei na veika e cakava ena yasayasa ya. E ciqoma tale ga o Maciu na veisureti, me vakataki ratou ga na le va sa cavuti oti mai. E vakamacalataka qori o Maciu ena nona Kosipeli, e kaya: “E tucake o Maciu a muri” Jisu sara. (Maciu 9:9) A biuta o Maciu nona daukumuni ivakacavacava me tisaipeli i Jisu.

E rairai vakarautaka e dua na magiti levu o Maciu ena nona vale me vakavinavinakataka kina nona sureti koya o Jisu. E sureti Jisu kei ratou na nona tisaipeli. O cei tale e sureti? Eso na itokani makawa i Maciu kei na so tale na daukumuni ivakacavacava. O ira qori era daukumuna na ivakacavacava ena vukudra na iliuliu mai Roma, e wili e keri na ivakacavacava ni waqa e curu ina toba, na sala ni veitosoyaki e vanua, kei na ivakacavacava ni iyaya e vakau mai. Cava nodra rai na Jiu me baleti ira na daukumuni ivakacavacava? Era sevaki nira dau lawaki ena nodra lavaka vakasivia na ivakacavacava. Era tiko tale ga ena kana magiti na “ivalavala ca,” era kilai nira dau caka ca.​—Luke 7:37-39.

Nira raici Jisu ena kana magiti na Farisi viavia yalododonu, era tarogi ratou na nona tisaipeli: “Na cava e kanavata tiko kina kei ira na daukumuni ivakacavacava kei ira na ivalavala ca na nomudou qasenivuli?” (Maciu 9:11) E rogoci ira o Jisu, e kaya sara: “E sega ni yaga na vuniwai vei ira na bula vinaka, e yaga ga vei ira na tauvimate. Ni lai saga gona moni kila na ibalebale ni vosa qo, ‘E bibi vei au na loloma, sega ni isoro.’ Au sega ni lako mai meu kacivi ira na yalododonu, meu kacivi ira ga na ivalavala ca.” (Maciu 9:12, 13; Osea 6:6) Sega ni vu mai lomadra na Farisi nodra vakatokai Jisu me “qasenivuli,” ia era rawa ni vulica vua na caka dodonu.

E rairai sureti ira na daukumuni ivakacavacava kei na ivalavala ca o Maciu ina nona vale me vakavulici ira o Jisu ra qai vakabulai vakayalo, “ni levu era sa muri koya voli.” (Marika 2:15) E via vukei ira o Jisu mera veiwekani vinaka kei na Kalou. E sega ni beci ira qori o Jisu me vakataki ira na Farisi viavia yalododonu. Ni dau yalololoma qai yalovinaka, e vakabulai ira kina na tauvimate vakayalo.

Nona lomani ira na daukumuni ivakacavacava kei na ivalavala ca o Jisu e sega ni kena ibalebale ni raica vakamamada nodra cala. Ia e vakaraitaka kina na yalololoma vata ga e vakaraitaka vei ira na tauvimate vakayago. Kena ivakaraitaki, a uqeti koya na yalololoma me tarai koya na vukavuka qai kaya vua: “Au vinakata! Mo savasava mai.” (Maciu 8:3) Me uqeti keda mada ga na yalololoma va qori meda vukei ira era vinakata tu na veivuke, vakabibi nodra vukei vakayalo.